Manifestazions atuales speziales

Data

01 de otober 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 01 de otober
Marcià di libri adurvei de Segra Sacun
Dai 11 nchin ai 13 de utober tla Cësa de Cultura a Urtijëi
Coche l ie bele tradizion meterà la trëi biblioteches publiches dla valeda – San Durich, Tresl Gruber y O. v. Wolkenstein – nce chëst ann a jì l marcià di libri adurvei de Segra Sacun. I libri tëuc ora dala biblioteches – ajache danejei o nia plu atuei – y chëi dunei dai privac unirà vëndui a 1 € per liber.
I scioldi che vën trac ite unirà pona inò dac ora per l bën dla trëi biblioteches.
L marcià di libri ie a Urtijëi tla Cësa de Cultura dan l ufize dla Lia dl Turism y l scumëncia n lunesc ai 11.10. dala 8:00 y ie daviert nchin la 18:00. N merdi ai 12.10. saràl daviert dala 8:00-12:00 y 14:00-18:00, n mierculdi ai 13.10. mo dala 8:00 nchin la 12:00.
La trëi biblioteches San Durich de Urtijëi, Tresl Gruber de S. Cristina y Oswald v. Wolkenstein de Sëlva se ncun­forta sun vosc unì.

Marcià bio 2021
N sada ai 9 de utober sun Pitla Plaza de S. Antone
L cunsëi dla Lia per Natura y Usanzes nvieia duc de cuer al 19ejim marcià bio, n sada ai 9 de utober a Urtijëi, sun Pitla Plaza S. Antone, dala 9:00 danmesdì inant.
L ie l blòt marcià, ulache de plu paures bio dl Südtirol vënd si prudoc. Nce nëus dla Lia per Natura y Usanzes ve piton velch de bon pra nosc stonc: tëurtes y strudli fac nstësc, pans ntegrei d'uni sort, dut sambën fat cun prudoc biologics. L bon tof da castanies pratedes ne mancerà y l stont dal craut sarà ënghe inò sun plaza. Chëi che uel se mplenì si barijel possa se lascé fé ju l craut da nosc esperc, ma prion bel pervia dla urganisazion de se nuté su cherdan su l numer de tel. 334 1630081.
L sarà nce inò n valgun jëuni che torna sun plaza.
L unirà sambën tenì ite la normes de segurëza scrites dant per l Coronavirus.

Abineda de guant de segonda man
Ai 12 y 13 de utober tla sala Raiffeisen te Cësa de Chemun a S. Cristina
La Lia de S. Vinzënt de Bulsan n cunlaurazion cun la Majon dal Guant de Urtijëi mët a jì na azion per abiné adum guant da d'inviern per granc y pitli, nce cazines, manëces y ciauzei o nce chëutres.
La roba dassëssa vester nëta y mo tenida bën.
N possa dé ju l guant n merdi ai 12.10. dala 14:30-17:30 y n mierculdi ai 13.10. dala 9:30-11:30 y dala 14:30-17:30.
Per nfurmazions pòssen cherdé su Nadia al 366 4084919.
La azion ie penseda per ti judé a jënt dl Südtirol y che viv tl Südtirol, che n à de bujën.

17 obietifs por n miú monn
Le Consëi de Formaziun de Badia inviëia en lönesc, ai 4 d'otober 2021, dales 20:00 ales 21:30 tl zënter jonil SajUN a La Ila (Ciasa de cultura) a na serada interessanta por vigni porsona y por döta l'umanité
Al sará n dialogh cun la »Rëi por la Sostenibilité de Südtirol« y na discusciun daverta sön vari concrec dlvers de deplü soste­nibilité por düc. Al gnará baié de aspec ecologics y economics, dla sozieté. Dl acompagnamënt musical fistidiará Gabi y Susi Mutschlechner. La sëra vëgn portada dant por todësch y en pert por ladin.
Partezipaziun cun greenpass y prenotaziun danfora tres e-mail ala misciun cf.badia@rolmail.net 
I posć é limitá.
Por plü infor­maziuns: www.future.bz.it – www.manif.it 

»Metamorphosis« de Simon Oberbacher y Paolo Rossetto
Te Tublà da Nives te Sëlva saràl, n vënderdi ai 8.10.2021 da mesa la nuef da sëira, la giaurida dla mostra
Ntan l mëns de utober saràl da udëi tl Tublà da Nives te Sëlva na mostra de n duet de artisć che ie danter l auter nce cumëmbri dl'Unika; l se trata plu avisa de Simon Oberbacher de Urtijëi che torna y dl depenjadëur Paolo Rossetto de Branzoll.
Oberbacher ti dà a si lëures formes arcaiches. Tres chëstes lecórdel la prima generazion dla raza umana, che adurvova chësta formes per purté roba da maië y ega, formes che n abinova bele tla natura (p.ej. l uef). Tulan ca n to' de lën ie Simon bon de lauré ora de gran scudeles, formes essenzieles che ie liedes al argumënt antich dl grëm de na oma. Ël à la capazità de les turné tan giut nchin che les giapa n ëur sutil, scialdi fin che se trasfurmea ntan che l lën sëcia. Ala fin garàtel n lëur asimetrich, cun de pitla sfëntes y sfësses, che l artist va mo a abelì cun decurazions.
Rossetto uel cun si pitura sureéla mëter a lum n dialogh lonch y sot danter persona y natura y depierpul sorissé la realtà umana te si formes desfrëntes. La persona se desmëncia de fé pert dla natura da chëla che la vën cherdeda, daviadechël sons natura, ncertlei ite dala natura y l ie chësc l mond che ti dà dl am. N mond che l mostra mescedan pensiers, sëmies, sentimënc, la cosses che se semea l manco purtedes a n dutun cun la persona. L ie na metafora dla vita. La natura ie per ël na cherdeda sterscia, na sort de vocazion.
Pra la giaurida fajerà Paola Bassetti y Valeria Stuflesser la ntroduzion artistica. La mostra resterà davierta nchin ai 31 de utober, uni di dala 17 nchin ala 20, ora che de lunesc. Davierta iela nce de dumënia danmesdì dala 10 nchin ala 12.
Duc ie nviei de cuer. Nfurmazions giàten nce sot a www.tubladanives.it 

I mituns y le smartphone
»Pó pa le smartphone ester prigorus por nüsc mituns?« Chësc é le titul de n referat online, ai 7 d'otober
Insegnanc, geniturs y interessá é inviá al referat »Lo smartphone può diventare pericoloso per i nostri figli?«, che gnará tigní tres Zoom, en jöbia ai 7 de otober dales 19:30. Referënt sará Manuel Oberkalmsteiner dl Forum Prevenziun. Por tó pert pón chirí sö le link: https://zoom.us/j/96417560690 .
Le referat sará por talian y vëgn metü a jí tl cheder dl proiet »Stersc tres la vita«, dal Sorvisc ai Jogn, en colaboraziun cun l'educadëssa soziala dles scores, la Nëus Jëuni Gherdëina y les Scores Altes da La Ila.

Nodé y atletica por mitans, mituns y gragn
Badiasport organisëia cursc da nodé y de atletica por pici y gragn
Badiasport mët da jí n curs da nodé por prinzipianc, vigni jöbia dales 16:00 ales 18:00 (al vëgn fat dui grups) y de atletica, vigni mertesc dales 16:00 ales 18:00 (al vëgn fat dui grups) da otober cina má.
Alenamënc por progredis
Por chi che sá bele da nodé vëgnel ince pité cursc da nodé y de atletica. Al gnará insigné i stii lëde, spiné, arosch y delfin.
I alenamënc de atletica lisiera alza fora les capazités de coordinaziun y de condiziun y al vëgn ince insigné les formes de basa dles disciplines de atletica lisiera.
Curs da nodé: vigni mercui dales 15:00 ales 17:00 (al gnará fat dui grups) tla nodadoia da La Ila.
Le curs de atletica sará vigni mertesc, da otober cina má.
Nodé adöm – nodé por adulc
En mertesc ai 5 d'otober mët man le curs da nodé por adulc, pro chël che al vëgn insigné i cater stii: lëde, spiné, arosch y delfin y mioré la coordinaziun y la condiziun. Le curs vëgn tigní tla nodadoia da La Ila vigni mertesc da otober cina má. Pröm grup: 19:30-20:30; secundo grup: 20:30-21:30. Al n'é nia n curs por prinzipianc, porchël vëgnel damané les capazités de basa dl nodé. Al vëgn damané le green pass.
Cost y iscriziuns
I cursc por mituns costa 200 euro, le cost dl curs por adulc é de 220 euro. L'iscriziun mëss gní fata tres la compilaziun dl formular sön la plata internet www.badiasport.org. Iscriuns por e-mail o por telefon ne gnará nia tutes en conscideraziun.

Ujöp da Oies – teater musical
La Müjiga de Badia y le Sorvisc ai Jogn Val Badia inviëia ala sëra d'informaziun sön le proiet »Ujöp da Oies – teater musical«, chësta sabeda ai 2 d'otober dales 20:00, tla Ciasa J. B. Runcher a Badia. Entrada cun green pass o poscibilité da fá n test nasal al'entrada
Por la realisaziun dl teater musical vëgnel chirí jënt de vigni eté, mituns y mitans dala 1. mesana insö, jogn y jones, ëi y ëres che á bele esperiënza o che ó fá na espe­riënza nöia sön paiun tl jobelné y/o cianté. Al vá ince debojëgn de jënt che dëida do scenar ia pro la realisaziun di costüms, pro la sminca, assistënza ala rejia y tl'organi­saziun generala.
Tratan la sëra d'informa­ziun sarál le grup de laur che presentëia le proiet y le plan dles proes, y l'autur Carlo Suani portará dant le toch. Le proiet piará ia te chësc altonn 2021 y gnará stlüt jö cun 5 rapresentaziuns tl mëis de messé 2022 a Oies de Badia, dlungia la dlijia dedicada al Sant.
La produziun é döta tles mans de porsones dla Ladinia: la musiga vëgn scrita da Antonio Rossi da Ampëz, i tesć da Carlo Suani d'Al Plan, la regia é de Valentina Kastlunger d'Al Plan, la direziun musicala é tles mans de Fridl Pescoller de Badia.
Al tolará pert za. 70 musizisć y al vëgn ciamó chirí 15–20 jobleri y ciantadus de döta la valada.
Por informaziuns y stlarimënc pón tó sö contat cun Valentin dl Sorvisc ai Jogn, al 335 5400890 o tres e-mail a valentin@jogn.org.