Manifestazions atuales speziales

Data

08 de otober 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 8 de otober
Marcià di libri adurvei de Segra Sacun
Dai 11 nchin ai 13 de utober tla Cësa de Cultura a Urtijëi
Coche l ie bele tradizion meterà la trëi biblioteches publiches dla valeda – San Durich, Tresl Gruber y O. v. Wolkenstein – nce chëst ann a jì l marcià di libri adurvei de Segra Sacun. I libri tëuc ora dala biblioteches – ajache danejei o nia plu atuei – y chëi dunei dai privac unirà vëndui a 1 € per liber.
I scioldi che vën trac ite unirà pona inò dac ora per l bën dla trëi biblioteches.
L marcià di libri ie a Urtijëi tla Cësa de Cultura dan l ufize dla Lia dl Turism y l scumëncia n lunesc ai 11.10. dala 8:00 y ie daviert nchin la 18:00. N merdi ai 12.10. saràl daviert dala 8:00-12:00 y 14:00-18:00, n mierculdi ai 13.10. mo dala 8:00 nchin la 12:00.
La trëi biblioteches San Durich de Urtijëi, Tresl Gruber de S. Cristina y Oswald v. Wolken­stein de Sëlva se ncun­forta sun vosc unì.

Educaziun sessuala di mituns y dles mitans – na desfida?
Te n referat online ai 14 de otober nen vára de co ti jí pormez a chësta tematica
Maria Reiterer y Hubert Fischer, dui pedagogs dla sessualité, tignará n referat dal titul »Sexuelle Entwicklung–wenn Töchter und Söhne erwachsen werden...«, en jöbia ai 14 de otober dales 19:30 tres Zoom (link: https://zoom.us/j/9895382891 – i referënc prëia da impié la camera tratan le referat). Tl referat nen vára de co acompagné i mituns y les mitans tratan la fasa dla puberté, co i sostigní y ci respostes i dé a sües domandes.
Le referat sará por todësch y vëgn metü a jí tl cheder dl proiet »Stersc tres la vita«, dal Sorvisc ai Jogn, en colaboraziun cun l'educa­dëssa soziala dles scores, la Nëus Jëuni Gherdëina y les Scores Altes de La Ila.

Mostra sön la Musiga da San Martin
En sabeda ai 9 d'otober vëgnel daurí tl Museum Ladin la mostra »100 agn Musiga da San Martin de Tor«
La Musiga da San Martin de Tor arjigna en ocajiun de so iubileum na mostra che lascia ciaré zoruch a chisc 100 agn de storia – da inlaota cina aldedaincö.
Chësta esposiziun, che é partida sö te deplü ciamps, pó gní vijitada dai 9 d'otober 2021 cina ai 7 de jená 2022 (tratan i orars de daurida dl museum).
Cun gran ligrëza ves aspetunse chësta sabeda ai 9 de otober dales 16:00 tl Museum Ladin, cun n salüt musical dla Musiga da San Martin de Tor. I posć é limitá, prenotaziuns al 0474 524062 o por email a info@museumladin.it . Entrada ma cun green pass!

»La banalità dl un di« – Sarah Solderer y Veronica Moroder
Mostra y prejentazion dl liber n vënderdi ai 15.10. dala 19:00 tla sala dla Lia Mostra d'Ert – Circolo a Urtijëi
Ntan l »lockdown« à la artistes Veronica Moroder y Sarah Solderer – una viv y lëura a Hamburg, l'autra a Urtijëi y Laion – abù l'idea de n proiet particuler. Te n dialogh artistich, tres na lingia de chertes mandedes per posta inant y zeruch, àles dat esprescion ala banalità dl uni di, scrijan y depenjan for inò lessù aldò de si mprescions y sensazions.
Ala semea de n diare, dà la chertes dl proiet artistich udledes ala banalità dl uni di tl tëmp dl coronavirus 2020 y 2021.
Tl cajo de Solderer y Moroder se à l pruzes artistich y criatif trasfurmà te strumënt de registrazion y documentazion. Na lerch defin privata y persunela che, de gra a chësta mostra, arjonj śën na dimenscion publica.
Katy Moling fajerà la ntroduzion ala mostra, che sarà da udëi nchin ai 31.10.2021 uni di dala 10:00-12:00 y 16:00-19:00.