Manifestazions atuales speziales

Data

19 de november 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 19 de november
Gaiert tl ce – gaiert tla vita
La Edema dla sanité te Mareo vá inant chisc dis: insnöt, vëndres ai 19 de novëmber 2021, dales 20:00, cuntará la psicologa y alenadëssa mentala Lisa Gamper tl Salf dles manifestaziuns a La Pli dla importanza da crëie te se instësc/sses
Suzes profescional y bëgnsté personal mët man tl ce! Vignun de nos á n gröm de ressorses y potenziai, che aspeta madër da gní vic. Ai nes dëida respogne ales situaziuns nia saurides y arjunje soluziuns. Lisa Gamper cuntará co che an pó fá da costruí poscibilités de forza interna y resiliënza y da soporté stress y pre­sciuns.

Dal üf al pe
Edema dla sanité te Mareo: L'ortoped Carlo Sacchi dá consëis söla sanité lungia de nostes iames
I orun gní tres plü vedli, mo ince ester sagns y bogn da se möie. La ortopedia á fat vari importanc ti ultims diejens por tigní en forma nosc corp cina te na eté alta. Le dotur Carlo Sacchi dará consëis de chësc vers.
Le referat gnará tigní a Rina, tl Salf dles manifestaziuns, indoman, sabeda ai 20 de novëmber 2021, dales 20:00.

»Der Kontrabass« de Patrick Süskind
Teater tla sala dl Circolo/Lia Mostra d'Ert a Urtijëi n juebia ai 25.11. dala 20:00
Teater cun Markus Westphal y regia de Alexandra Wilke.
N berba che sona l violon, da talënt, ma cioch, rejona de si vita y l ie da rì! Si laudes per la mujiga se muda for plu tl cuntrer: ël ie perdrët n artist cun n carater stlut y zënza crëta tl daunì, cun puech talënt, che ne ti mpossa nia a si strumënt, a si lëur y si colegs de lëur de gran inuem. Cun n grum de pier cëlel de cumbater la suta che l patësc y la frustrazion per l'urchestra. Si sëul sentimënt positif ie mo per la jëuna sopranista Sarah. Ma ëila ne l vëija nia. Povester assé che chësc se muda nsnuet: ntan che l se njënia ca per l spetacul, se damàndel cie che l suzedëssa sce, dan che l'urchestra scumëncia, svaiessel ora si inuem adaut te sala...
Ntreda cun dunfierta liedia. Prëibel apusté danora la lerch: tel. 377 5936350 o info@circolo.eu

Di dla dlavea te Sëlva
Duman sada ai 20 de nuvëmber tla Pitla Sala te Cësa de Cultura
L Chemun de Sëlva nvieia duc canc, sibe chëi che sta te Gherdëina che chëi che lëura tlo, de se nuzé de chësta uca­jion per se lascé fé la dlavea contra l coronavirus, sibe sce l se trata dla prima dosa o dla segonda che nce dla terza dosa dla dlavea.
La dlaveies unirà fates tla Pitla Sala te Cësa de Cultura de Sëlva dala 9:00 nchin la 13:00 y dala 14:00 nchin la 17:00.
N ne à nia drë de se lascé nuté su. N muessa avëi da mustré su la tessera sanitera y n docu­mënt d'identità.

»Mëte limic, l'infanzia é le cör dla porsona«
Raisc y Ares: tl Istitut Ladin a San Martin vëgnel tigní referac cun discusciun, cun le pedagogh sozial Walther Frontull
Le Grup Ecuiliber, n grup metü adöm da rapresen­tantes de deplü istituziuns – Comuns, Scora, Raiun Sozial Val Badia, Sorvisc ai Jogn y rapresentanza di geniturs – mët a jí na iniziativa de döes sëres dal titul »Mëte limic, l'in­fan­zia é le cör dla por­sona« cun Walther Fron­tull, pedagogh sozial.
L'iniziativa vëgn organisada tl cërtl de »Raisc y Ares«, olache ara nen vá de presenté y sensibilisé sön tematiches dla educaziun y dla prevenziun, che é ince i obietifs che le grup de laur se tol dant. Le referënt jará plü sot sön co y can mëte limic tla in­fanzia. I referac é ponsá por geniturs, insegnanc y interessá y pitará sostëgn y impulsc por reflesciuns desvalies.
Les incuntades sará tres de vëndres ai 26 de novëmber y ai 3 de dezëmber 2021 dales 19:30 te Istitut Ladin a San Martin de Tor; i referac alda adöm porchël vára ma da se scrí ite a trames les sëres. Ai vëgn tignis por todësch, cun posci­bilité da fá domandes y discusciun por ladin y talian.
Azes ma sön prenotaziun, da fá anter i 24.11. a info@jogn.org o tl Sorvisc ai Jogn al 0474 523070. Al ó ester le green pass. I posć é limitá. Düc y dötes é dër bel inviá!

Musiga cun le »Anita Obwegs Quartetto«
Conzert y presentaziun dla CD »Forza« a Balsan y Bornech
La ciantarina Anita Obwegs d'Al Plan á le plajëi da presenté süa CD nöia »Forza«. Deboriada cun sü compagns Philip Schörghuber, Karin Kimmerswenger y Lorenz Müller se presentëiai sciöche le »Anita Obwegs QUARTETTO«. I apuntamënc é por l'edema che vëgn.
En jöbia ai 25 de novëmber dales 20:00 vëgnel tigní la pre­sentaziun tla Carambolage a Balsan (preno­taziuns sot a www.carambolage.org), en vëndres ai 26 de novëm­ber tl UFO a Bor­nech, tres dales 20:00 (prenota­ziuns sot a www.ufobruneck.it).