Manifestazions atuales speziales

Data

26 de november 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedea tla edizion dl 26 de november
La Val – ala descurida dl paisc
Sot al moto »Nosc paisc, le plü gran tesur« gnarál organisé a La Val n avenimënt scialdi particolar y nü
Ara se trata de na sort de »ciacia al tesur« fora por le zënter y les viles da La Val. Chësta iniziativa é nasciüda por ti dé al jí a pe n sëns plü da jüch, por che al ne ti plejes nia ma ai pici, mo ince ai gragn. Fora por i mëisc de dezëmber cina ai 10 d'aurí sarál la poscibilité da tó pert ala spazirada interativa. Le travert dl jüch é chël da abiné adöm dötes les lëtres che an ciafará ala fin de vigni staziun. Tratan le percurs podarán im­paré tröp sön la storia dl paisc, la jënt y les tradiziuns. Partico­larités naturalistiches y archite­toniches ará ince na gran impor­tanza tratan le jüch. Por tó pert a chësta iniziativa, pón damané do te asso­ziaziun turistica a La Val, olache an ciafa dötes les informaziuns y ince i materiai de pié ia.

Emoziuns da Nadé tl'Alta Badia
Ti paisc dl'Alta Badia ne mancel nia les poscibilités da se senté ite tl'atmosfera nadalina
Tratan le tëmp da Nadé se trasformëia i paisc dl'Alta Badia te posć da na atmosfera parti­colarmënter sintida. Les contrades curides de nëi, les beles melodies tl'aria y les löms che slomina fej desmentié por n momënt i crüzi da vigni de.
A Corvara y Calfosch
Tl zënter de Corvara sarál da odëi na cripele de lëgn de grandëza naturala. Te deplü ocajiuns, plü avisa ai 4, 8, 10, 17, 24 y 29 de dezëmber y al 1., ai 4 y 9 de jená 2022, podarán aldí da­les 16:00 ales 19:00 musiga da Nadé te plaza, pro n bun gote de vin cöt. Ai 8 de dezëmber, sciöche ince ai 17 de dezëmber y ai 9 de jená, sarál la poscibilité por i mituns da se fá na picera roda cun le pony.
Ince a Calfosch sarál la poscibilité anter trëi termins da ascuté cianties da Nadé y se gode l'atmosfera d'Advënt, plü avisa ai 05.12., olache al sará ince San Micurá che vëgn a ciafé i mituns, ai 23.12. y ai 07.01. dales 16:30 ales 18:30 cun musiga dal vi.
San Ciascian y Badia
Le paisc da San Ciascian se trasformará tratan l'Advënt te na mostra alaleria, che cunta y spliga les tradiziuns ladines dl tëmp d'Ad­vënt y da Nadé. An podará spaziré fora por le paisc y descurí sön les tofles metüdes fora les usanzes ladines sciöche la cripele, la bambona, le jí a fëies y i.i. Implü sarál val' sëra ince intratignimënt musical, sciöche ai 3, 8, 11, 18 y 25 de dezëmber y al 1., ai 6 y 8 de jená.
Ince Badia slominará tl plü bel abelimënt da Nadé y al gnará metü sö na picera ciasota dlungia dlijia a San Linert, olache al gnará tigní val' conzert seral. Implü arjignará i scolars dla elementara val' decoraziuns da Nadé, che gnará metüdes fora.
La Val
La Val sará spo ince chësc ann cornisc de n calënder d'Advënt, che vëgn iluminé tres les finestres dles ciases. Dal 1. de dezëmber inant gnarál vigni de daurí simbolicamënter na finestra dl calënder d'Advënt, iluminan dales 17:00 inant na finestra implü dles ciases dl zënter dl paisc. Ai 24 de dezëmber sará dötes les finestres dl calënder iluminades y chëstes podará gní amirades cina ai 6 de jená. Vigni vëndres y sabeda sëra sarál l'uniun dl sport che dará fora val' da bëre tl barachin pro le salf dles manifestaziuns dai 26 de novëmber inant.

Referat sön la menopalsa
Ai 30 de novëmber tla Ciasa Runcher a Badia
Le Consëi de Formaziun de Badia inviëia dër bel al referat »Menopalsa«, che gnará tigní en mertesc ai 30 de novëmber dales 20:00, tla Ciasa Runcher a Badia. Le referënt dr. Graziano Angela respo­gnará a domandes sciö­che: Can scomëncia pa i agn dla menopalsa? Tan dî dörera pa? Ciügn é pa i desturbs tipics? Esistel pa terapies?
Al vëgn perié da se prenoté danfora ala mail cf.badia@rolmail.net . Por tó pert ól ester le pass vërt.

Sëra d'informaziun sön les Scores Altes da La Ila
En mercui al 1. de dezëmber dales 18:00 inant él la poscibilité da s'informé sön les scores y la manira de lauré
I geniturs di scolars y dles scolares dles secundes y terzes mesanes é inviá en mercui, al 1. de dezëmber dales 18:00, tla sënta dles Scores Altes a La Ila. Al gnará tigní na sëra d'informaziun sön les Scores Altes da La Ila. Al vëgn presenté les trëi sorts de scores altes che fej pert dl Zënter scolastich da La Ila: Istitut Tecnich Economich, Lizeum Linguistich y Lizeum dles Sciënzes Umanes. La direturia dot. ia Elena Pellegrini y a la vizedireturia dot. ia Elisabeth Frenner ti dará le bëgngnü a düc chi che á interes da conësce damí nostes scores cun sües strotöres y se fá na idea sciöche al vëgn lauré. Scolars y scolares é sambëgn ince bëgngnüs ala sëra d'informaziun. Al vëgn damané le green pass.

Olá é pa Max rové?
Presentaziun dl liber por mituns de Max Erlacher, cun mostra y marcé di libri
En sabeda ai 4 de dezëmber vëgnel tigní tl salf dl Istitut Ladin a San Martin la presentaziun dl liber por mituns »Olá é pa Max rové? – Dov'è finito Max?«, metü adöm da Max Erlacher d'Al Plan y dé fora da »Camelozampa« en colaboraziun cun l'Istitut Ladin »Micurá de Rü«. Por che al ne röies nia adöm massa jënt te n iade, vëgn la presentaziun organisada tla cornisc de n domisdé dales 14:00 ales 17:00, olache an podará ince ti ciaré ala mostra dles ilustraziuns dl liber y ascuté toc fora dla storia. Implü sarál n pice marcé di libri.2