Manifestazions atuales speziales

Data

06 de mei 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 06 de mei 2022
Edema dles families te Mareo
Le Zënter Families Mareo mët a jí a trëi referac sön la familia, le Comun inviëia ala serada d'informaziun sön l'Audit Family Plus
L'Edema dai 9 ai 13 de ma é te Mareo sot al sëgn dles families. Le Zënter Families Mareo inviëia düc da tó pert ai referac por l'Edema dles families. En lönesc ai 9 de ma sarál Irmgard Pörnbacher che baia a Rina dl tema »Gehorsam«; en mercui ai 11 de ma él a La Pli le referat »Homöopathie bei Kindern« cun Bernardette Schwienbacher, en vëndres ai 13 de ma él a Al Plan le referat »Doing Family: wie Familie heute gelingen kann«, cun Johanna Brunner. Düc trëi i referac é dales 20:00, te salf dles manifestaziuns dl paisc.
Serada sön l'Audit Family Plus
En mertesc ai 10 de ma dales 20:00 él le Comun de Mareo che inviëia la jënt te salf dles manifestaziuns d'Al Plan por la serada »Nosta jont y so dagní te Mareo«, olache al vëgn presenté le Audit Family Plus. Cun chësc proiet ciafa la popo­laziun l'ocajiun da lauré sön n dagní por düc. L'audit se referësc a vigni fascia: dai mëndri ai plü vedli. La jënt é inviada da tó en conscidraziun chësta oportu­nité y se porté ite cun idees y propostes.

»Sonns d'aisciöda« a San Ciascian
Do da dui agn á la Musiga da San Ciascian indô le plajëi da invié al tradizional conzert d'aisciöda, en sabeda ai 14 de ma dales 20:30, tla Ciasa J. B. Rinna a San Ciascian
Al sará le pröm conzert d'aisciöda sot ala bachëta dl dirighënt nü dla Musiga, Davide Donazzolo da Ampëz. Por la sëra dal titul »Sonns d'aisciöda«, ál metü adöm n program dër plajor y valgamia tradizional. An jará dales marces tradizionales sciöche »Wien bleibt Wien« de Johann Schrammel, »Castaldo Marsch« de Rudolf Novacek y »Bei der Mühle« de František Kmoch, ales polches sciöche »Böhmische Liebe« de Mathias Rauch y »Feuerfest« de Josef Strauss, cina al valzer »Wein, Weib und Gesang« de Johann Strauss. An podará ince aldí toc plü moderns sciöche »Challenger Deep« de Filippo Ledda che cunta dla spediziun dl 1960 tl post plü sot dl monn, a 10.900 metri sot le livel dl mer, o le toch »Hero« de Donato Semeraro, che sará na picera sorpresa, deache al gnará soné cun i pici musicontri da San Ciascian che impara da soné n stromënt.
Por tó pert ala manifestaziun él da respeté les normes anti Covid varëntes.

»Natöra – paraisc de corusc y emoziuns«
Le Fotoclub Val Badia inviëia ala proieziun de fotografies de Ulrike Ploner, en jöbia ai 12 de ma 2022 dales 20.30, tl Istitut Ladin Micurá de Rü a San Martin de Tor
Le tema dla proieziun fotografica de Ulrike Ploner é »Natöra – paraisc de corusc y emoziuns«. Al é na bela ocajiun da descurí cun Ulrike Ploner la varieté y i contrasć dla natöra de nosc monn ladin. La löm, i ciüfs y le savëi fotografich ves portará te n monn de morvëia, olache an pó amiré i corusc dla natöra. Ulrike Ploner é na gran apascionada de macro-fotografia y á bele davagné tröc pesć pro concurs de fotografia.

Sonns moderns por l'aisciöda
Do dui agn de palsa, tëgn la Müjiga Calfosch-Corvara en vëndres ai 13 de ma so tradizional conzert d'aisciöda, sot la bachëta dl dirighënt Gerhard Mohr
Le conzert d'aisciöda é söl program en vëndres ai 13 de ma dales 20:30 tl salf dles manife­staziuns Franz A. Rottonara a Corvara. Al mët man cun le toch »Sempre Unita« por passé spo ales melodies de »Cassio­peia«. Solist di dui toc »Nothing's gonna change my love for you« y »Silberfäden« sará Andreas Ober­kofler ala trombëta. Amesa i dui toc ite ti gnarál ince surandé les onoranzes a n valgügn mëmbri dla uniun. Le conzert jará spo inant cun »Nanga Parbat – King of Moun­tains« y dedô podará le publich ascuté sö na seleziun di plü bi toc di Beatles. La Müjiga Calfosch-Corvara stlüj jö le conzert cun la marcia »Sympatria«. Düc i amanc dla musiga é bel inviá da gní a ascuté sö le conzert y passé na serada en compagnia dles beles melodies. Le conzert gnará tigní tl respet dles regoles Covid preodüdes.

De Ecologich tl comun de Badia
En doman sabeda ai 7 de ma vëgnel romené sö i paisc de Badia, La Ila y San Ciascian. Griliada por düc, na lotaria por i mëndri
Por le De Ecologich s'incunton dales 8:30 dan i magazins di Stödafüch da Badia, La Ila y San Ciascian, olach'al gnará coordiné düc i volontars. Da misdé gnarál organisé la griliada por i partezipanc pro le bar dl ciamp dl sport da La Ila, da Pongo. I mituns che dëida romené sö pó tó pert ala lotaria. Le Consëi de Formaziun y i Stödafüch ne se tol sö degöna responsabilité.
L'iniziativa vëgn metüda a jí dal Consëi de Formaziun de Badia, en colaboraziun cun la Cooperativa Turistica Alta Badia y cun les uniuns di Stödafüch dl comun de Badia.

Trading & Investing
De chësc nen vára te n referat en vëndres ai 13 de ma dales 20:00, tl Zënter dla Jonëza y Cultura Saj.un a La Ila
Tres plü gonot aldon ince te nosta Valada che jënt mët man da »fá trading«. Jogn y adulc lascia da studié/lauré o stá ciamó do le laur ores dan le PC o fonin a investí de mëndres o ince de gran somes tla börsa. Tres deplü plataformes digitales pîta chësc sorvisc debann y tira insciö sü cliënc.
Mo él pa veramënter tan saurí da davagné scioldi insciö? Che él pa che nen davagna? Che él pa che perd? Cai é pa i prighi?
Adöm cun Gunde Bauhofer dla Zentrala di consumadus y Michael Terzer – consulënt independënt dl patrimone, orunse porvé da ciafé na resposta a chëstes domandes. Düc canc, nia ma la jonëza, é bel inviá!

»L'importanza y i compic di geniturs tl sport«
Chësc é le titul de n referat por geniturs, alenadus y acompagnadus, söl program en lönesc ai 9 de ma dales 19:30 tl Saj.un a La Ila
Ci compic unse pa nos geniturs tl sport? De ci desson pa tigní cunt, por che i mituns fejes ion sport? Ci desson pa evité? Sunsi bun:a da motivé mi:a möt:a? Co pói pa sostigní mi:a möt:a da soporté la presciun? A chëstes y d'atres domandes respognará le referënt dla serada Valentin Piffrader.
Le referat vëgn organisé dal Consëi de For­maziun de Badia, en colaboraziun cun le Sorvisc ai Jogn Val Badia.

Rumon su nosc luech
L Chemun de Sëlva deberieda cun la Lia per l Turism nvieia nce chëst ann a fé pea pra l di ecologich n sada, ai 14 de mei 2022
N se anconta te Sëlva, dan la Cësa de Cultura »Oswald von Wolkenstein«, dala 8:00 daduman.
Tlo saràl i uemes di destuda­fuech y i lauranc de chemun, che cuordinerà l'azion, metan adum la grupes y les destinan ai ridli. Ëi ti partirà ora a duc chëi che vën a fé pea, sac, manëces y n gurmel (che l Chemun lascia fé aposta per chësta manife­stazion), dan che n pierà ora per l luech a tlupé su l refudam lascià ncantëur.
Duta la lies, assoziazions y duta la jënt de Sëlva ie nvieda de cuer a judé pea a rumé su nosta Sëlva!

Curs da fá pan
A Corvara vëgnel tigní n curs de dui dis ai 19 y 20 de ma
Chi che oress ciafé le förtl da fá pan, á sëgn la poscibilité. Al vëgn organisé a Corvara n curs de lová (por tal. »lievi­tati«) duc y sará, cun gherm y nia. Le curs döra dui dis, plü avisa ai 19 y 20 de ma dales 8:30 ales 12:00 y dales 13:30 ales 19:00. Por plü informaziuns pón cherdé sö le 339 7906738.

Shop&Art, segonda edizion
Nteressei a fé pea dëssa se nunzië nchin ai 15 de mei 2022
Fé pea pra Shop&Art, che sarà dai 24 de setëmber nchin ai 30 de utober, possa duc i buteghieres de Urtijëi y duc i artejans artistics y artisć de Gherdëina, che fej chësc lëur de prufescion (nce chëi che ne à nia giapà l nvit per email). Da se nunzië iel nchin ai 15 de mei, scrijan a info@valgardenawoodart.center, ulache n giapa nce nfurmazions plu avisa.
Acioche n posse lauré ora l cunzet y la cunlaurazion danter butëiga y artist, prëien bel che i artisć mande ite fotografies de si lëur che i ulëssa prejené. L fossa bel sce l unissa a s'l dé n proiet deberieda danter buteghier y artist per la nstalazion dla vedrina, ma l possa nce unì metù ora lëures che n à bele.
La scumenciadiva vën sustenida dala Cassa Raiffeisen Gherdëina y l sarà da vëncer n pest prinzipel, n pest dl publich y un da tré ala busca danter chi che à dat su la stima, for tla forma de n bon da cumpré ite.

Senteda generela dla lia culturela »Tublà da Nives«
N mierculdi ai 11 de mei 2022, dala 18:30, tl zënter culturel te Sëlva
La lia culturela Tublà da Nives nvieia duc i nteressei ala senteda generela, ulache l sarà chëst iede nce la vela dl cunsëi diretif nuef per i ani dal 2022 nchin al 2025. L presidënt Leo Senoner fajerà na pitla ntroduzions y do l salut dl'autoriteies uniràl cuntà dla mostres fates l ann passà y prejentà l'atività cultu­rela ududa dant per l 2022. Sambën uniràl nce prejentà l rendicont finanziel per passé pona ala prejentazion di candi­dac y dla candidates cun vela dl cunsëi nuef. L sarà la ucajion per rujené de plu argumënc ntan che n aspieta sun l resultat dla vela.

Galaria retrac