Manifestazions atuales speziales

Data

13 de mei 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 13 de mei
Badia: conzert d’aisciöda alternatif
La Müjiga de Badia é impegnada tl proiet dl teater musical »Ujöp da Oies«, porchël garetel iniann n conzert d’aisciöda n pü’ atramënter: na matinée cun compagnia, la domënia ai 22 de ma
L’ann 2022 sará por la Müjiga de Badia n ann particolar, che jará te süa storia. Do dui agn de preparaziun, á metü man le laur concret por porté a fin le proiet dl teater musical »Ujöp da Oies«, metü en pe adöm al Sorvisc ai Jogn Val Badia, sön chël che al é bele gnü publiché cotan de informaziuns. Ara se trata de n proiet ambizius y che se damana n gran impëgn da düc i musicontri.
Por chësta rajun, á la Müjiga tut la dezijiun da fá n conzert d’aisciöda n pü’ alternatif a chi ch’i ên ausá. En domënia ai 22 de ma dessel garaté na matinée, na ocajiun por porté dant valgügn toc de bela musiga y por passé n valgönes ores deboriada. La pert ofiziala – che vëgn tignida tla Ciasa J. B. Runcher a San Linert – mët man dales 11:15 cun n pice conzert. Al sará da aldí le marsc »Frei wie der Adler« y zacotan d’atres marces conesciüdes, sciöche ince n medley fora dal musical »Elisabeth« de Johan de Meij, döt porté dant sot la direziun de Friedl Pescoller. Friedl á bele da plü agn incá ciaré da motivé jogn da surantó la direziun dla Müjiga, ince ma por val’ toch en ocajiun de n conzert particolar. Insciö i tochera en chësc iade a süa möta Hanna, che stüdia direziun tla scora de musiga a Bornech. Sot a süa bachëta portará dant la Müjiga le toch »Oregon« de Jacob De Haan.
Ala fin de chësta pröma pert dla matinée, sarál lerch por ti surandé les onoranzes a chi mëmbri che fej bele pert dla uniun da plü agn incá. Dedô jarára inant cun aorela cörta y musiga dl grup »Conturines Echo«.

Leteratura sucrëta?
Simposium n cont dla traduzion dla leteratura rumancia di Grijons y ladina dla Dolomites, n ucajion dl’ »Emna Rumantscha«. N vënderdi ai 20.05. dala 15:00 nchin la 18:00, tla Scola de Mujiga a Urtijëi
Leteratura scrita te na nsci numineda »pitla« rujeneda à de bujën de traduzions. Chi che scrij leteratura per rumanc o per ladin y uel nce unì liet oradecà, muessa unì ciancià te una dla majera rujenedes ntëurite. Mëndra che na cumenanza lingui­stica ie y plu che si rujeneda resta sucrëta. L cërtl de persones che scrij te chëla rujeneda y che ciancia da chëla rujeneda ie scialdi pitl. Muessa pa perchël scritëures dla Rumantschia y dla Ladinia ciancé nstësses o nstësc si tesć letereres? Garata pa chël? Ciuni ie pa i rëms y i lims a fé traduzions da na rujeneda puech spar­panieda ora te rujenedes standardi­sedes?
Chësta y d’autra duman­des unirà jaminedes tla descu­scion danter la y i scritëures Gianna Olinda Cadonau, Roland Verra, Leo Tour y Rut Bernardi cun la reda­dëura dla cësa d’edizion Raetia Verena Zankl y i tradutëures letereres Claudio Spescha y Alma Vallazza.
La descuscion unirà fata tla rujeneda tudëscia.
L muderadëur sarà l jurnalist de Rai-Ladinia a Bulsan y scritëur Mateo Taibon.
Danora saràl mo da audì letures letereres curtes (per vallader, sursilvan y gherdëina cun traduzions tl tudësch y/o tl talian) de Gianna Olinda Cadonau, Roland Verra, Leo Tuor, Rut Bernardi y mujiga de Bibi Vaplan.Manifestazion metuda a jì da: Consulat Svizer a Milan (tl cheder dla Emna Ruman­tscha) y ZeLT – Zënter europeich per leteratura y traduzion, cun l sustëni dl’Assessorat per la cultura ladina y la Scola de Mujiga de Gherdëina.
Ntreda liedia.

»What do Landscapes dream of?«
La lia culturela Tublà da Nives nvieia ala giaurida dla mostra, duman sada 14 de mei 2022, te Val y pona te Tublà da Nives
Silvia Capuzzo, Jasmine Deporta, Lia Mazzari, Veronica Moroder, Martin Pöll, Barbara Prenka, Christine Runggaldier, Tobias Tavella, Fabio Zindaco ie i artisć y la artistes dl Südtirol che raprejënta la trëi grupes de rujeneda dla provinzia te chësta mostra cureda da Sarah Solderer & Mara Vöcking.
Semieia pa la cuntredes? Cun chësta dumanda ulons nëus se dé ju cun na cunsapevulëza sensuela y stlù per n mumënt i uedli y paussé. Ulon se lecurdé di sentimënc, dla ntraunides, dla mprescions dl tëmp passà y di sëmies dl daunì. I sëmies nes juda a giapé ispirazion y ie la funtana dla criatività. Mplu nes dài na man a lauré ora nosta realtà, nosc uni di. Nscila ons l mesun de pensé da nuef y te na maniera liedia, de se ndesdì te n aiet dla regules dl spazium y dl tëmp. La cuntredes cun duta si variazions y sfumadures mët man de semië y se definësc da nuef.
L vën a lum cunstelazions nueves, nmagi­nazions y i chedri se mplenësc de vita, ma ne son nia boni de ti ruvé permez. L suenn ie zeche de ndividuel, na sperienza persunela y mé sce la cuntreda conta la storia de si suenn, sons boni de la viver pea.
Tres chësta mostra iel propi l’ert che se deletea de ti cunzeder na usc al paesaje. Meton n descuscion l »status quo« y piton perchël na perspetiva auternativa. Che la cuntreda giape l dërt de autodeterminazion, che la ne vënie nia sfruteda y nia desdruda, ie n sëmi per n daunì plu giust. Co pudons’a furmé la cuntreda y co vàla pa de dé sustëni per la realisé? Y ciuni ie pa i sëmies dla cuntreda?
L Tublà da Nives nvieia ala giaurida n sada ai 14.05.2022 dala 17:00 te Val, Sëlva, cun la performance »Living Landscape«. Dala 18.00 jiràla pona inant tl Tublà da Nives cun la letura dl Manifest.
Orar de giaurida:
La mostra sarà da udëi nchin ai 03.07.2022, de juebia y vënderdi dala 16:00 nchin la 19:00; de sada y dumënia dala 10:00 nchin la 12:00 y dala 17:00 nchin la 20:00.


Biennale Gherdëina ∞ »Persones Persons«
Inaugurazion ufiziela n vënderdi ai 20 de mei 2022, dala 17:00.Manifestazions de giaurida nce n sada y dumënia ai 21 y 22 de mei
Vënderdi 20.05.
dala 17:00, sala Trenker, Urtijëi
Bënunì dl presidënt dla Provinzia de Bulsan Arno Kompatscher y dla autoriteies, dl presidënt dla lia »Zënza Sëida« Eduard Demetz y dla curatëures dla Biennale Gher­dëina ∞ Lucia Pietroiusti y Filipa Ramos;
dala 18:00, spazireda danter la opres d’ert tl luech, tla sala Trenker y tl hotel Ladinia;
»Seeds Offering«, ufierta dla sumënza de Sergio Rojas Chaves
dala 19:00, Plaza S. Antone, Urtijëi
Zeremonia per fé l pan, de Gabriel Chaile, n cunlaurazion cun »Forno« de Ivo De Pellegrin;
Aperitif alalergia.
Sada 21.05.
dala 10:00 inant, plaza dai auti Praplan, S. Cristina
»Sentiero« (20 menuc a pe), performance de Alex Cecchetti;
»Seeds Offering«, ufierta dla sumënza de Sergio Rojas Chaves, a Urtijëi;
dala 15:00-17:00, te Val, Sëlva
»Becoming horizontal, somatic encounters in nature«, performance de Barbara Gamper,
»An omniscience: an atmos-etheric, transnational, interplanetary cosmist bird opera spanning seven continents and the many verses«, performance de Hylozoic/Desires (Himali Singh Soin & David Soin Tappeser).
L vën cunsià de se tò pea na rola;
dala 18:00-23:00 ciastel »Fischburg«, Sëlva
Meditazion de duta la criatures, perfor­mance de Angelo Plessas;
»Memory Garden Ritual«, performance de Ignota;
Cëina alalergia y festal tl ciastel–Deejay Maxi.
Dumënia 22.05.
dala 10:00 inant, plaza dai auti Praplan, S. Cristina
»Sentiero« (20 menuc a pe), performance de Alex Cecchetti;
dala 11:00-12:00 ciastel »Fischburg«, Sëlva
»More Than Human Composition / Com­posing with the environment: the sound of nature«, ciaculeda cun Himali Singh Soin,
David Soin Tappeser, Eduard Demetz (nglëisc).
La manifestazions de giaurida ie sustenides dala Nicoletta Fiorucci Foundation.

Curs da fá pan
A Corvara vëgnel tigní n curs de dui dis ai 19 y 20 de ma
Chi che oress ciafé le förtl da fá pan, á sëgn la posci­bilité. Al vëgn organisé a Corvara n curs de lová (por tal. »lievitati«) duc y sará, cun gherm y nia. Le curs döra dui dis, plü avisa ai 19 y 20 de ma dales 8:30 ales 12:00 y dales 13:30 ales 19:00. Por plü informa­ziuns pón cherdé sö le 339 7906738.

Di dla porta davierta tl Museum Gherdëina
Di nternaziunel di museums, n dumënia ai 15.05. dala 14:00 nchin la 18:00
Tl zënter dl prugram de curnisc da chëst ann iel la zipladësses che conta de si esperienzes tl ert dl ziplé. Tres si testemunian­zes vives pudons mparé a cu­nëscer n capitul mpur­­­tant de nosta storia.
Ntan dut l domesdì vëniel nce pità vijites menedes cun nosc team dla dida­tica tla sezions singules dl Museum.
Mutons y mutons pu­derà fé pea pra n program criatif.
La Biblioteca ladina te cësa ie davierta.
Ntreda debant. Se ncunferton sun Vosc unì!

Cëna cun teater a Corvara
»En forma por tres« é le titul dl teater criminal che vëgn rapresenté a Corvara. Ince le publich é invié da stomé para
Le Consëi de Formaziun dl Comun de Corvara mët a jí en vëndres ai 27 de ma dales 19:00 tl salf dles manifesta­ziuns a Corvara na cëna cun n teater criminal, olache le publich é invié da stomé chi che é l’assassin tla storia, che sará da odëi tratan cëna sön paladina.
Sön paladina jobelnëia Ellen Alfreider, Alessandro Bonfanti, Andreas Peccei, Sabine Rudiferia, Tobias Stampfer y Susann Tavella. La rejia é de Erika Castlunger. Por informaziuns él da cherdé sö Sonia al 349 1588485.

Festa dl FC Gherdëina
N sada ai 14.05. cun partides di jëuni, dla prima scuadra, mujiga y bona ueia
Dala 10:00 scumëncen cun la partida di Panthers U10 contra l Leifers, per jì inant dala 11:30 cun i Lions U11 che juega contra l Natz Schabs y dala 13:30 jugherà i Geopards dla U8 contra l Gitschberg.
Dala 16:00 partida n cësa dla prima scuadra. Se ncunferton sun uniun che vën a fé tifo!
Do la partida meterà man la party cun DJ Sandro Ursino, y la jirà inant nchin da sëira, ulache l sunerà, dala 20:00, la grupa »Pëufla«.
Da maië y da bever ne manceràl ënghedenó y chël bele dala 10:00 danmesdì inant.
Unide duc a fé festa cun l FC Gherdëina y a sustenì nosta scuadres.