Manifestazions atuales speziales

Data

20 de mei 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 20 de mei 2022
Ensemble »Voces8«
Cunzert n merdi ai 24 de mei, dala 20:30 te dlieja de Sëlva
Per chësc cunzert se à l’ensemble de ot ujes, cun Andrea Haines y Molly Noon sopran, Katie Jeffries-Harris alt, Blake Morgan y Euan Williamson tenor, Christopher Moore bariton, Jonathan Pacey bas y l altus y art-director Barnaby Smith, tëut dant de prejenté n program de cianté cun legrëza »sing joyfully«.
La grupa britanica toca pra i miëur ensembles de ujes a livel mundiel. I ciantarins y la cian­tarines se sënt da cësa sibe tl stil scerio che te chël de devertimënt y si repertore va dala polifonia antica nchin a aranjamënc jazz y pop. I plej y tira pea l publich cun si savëi de mujiga, si sonn particuler y si prejënza ntujiasmeda sun palch.
Per chësc ultim cunzert dla sajon di Jëuni de Mujiga de Gherdëina àn bele vendù danora truepa chertes, chi che ulëssa perchël vester segur de giapé na lerch, dassëssa la apusté danora tla Lia dl Turism de Urtijëi (tel. 0471 777600).

»Utopia« dla 5. tlasses dl Lizeum d’ert Cademia
Giaurida dla mostra n merdi ai 24.05. dala 17:00 tl Circolo/Lia Mostra d’Ert
I studënc dla cuinta tlasses dl Lizeum d’ert Cademia de Urtijëi prejentarà si mostra coletiva tla sala dla Lia Mostra d’Ert-Circolo a Urtijëi. Pra la mostra fajeràl pea duta la trëi sezions, chëla de grafica, design y ert figurativa y uni studënt chirerà ora n lëur realisà a scola per mustré la nterpretazions persunles dla tematica »Utopia«, crissa ora dai studënc per la mostra.
Chësta tematica ie unida crissa ora per reprejenté i sëmies y i proiec de na generazion nueva drucheda ju da zircustanzes for plu melsegures. I obietifs ie tl lëur de se mudé for deplù te utopies, perchël mustrerà i studënc si cunzet de Utopia y tant che chësta astrazion sibe dalonc da nëus y da nosta ambizions.
La mostra sarà da udëi nchin n merdi ai 31.05. uni di dala 10:00-12:00 y 16:00-19:00.

»Da stlupé dal rì« rì, grignèr, lachen, ridere, to laugh, rire
Mandé ite la prupostes nchin ai 02.07. per la festa che sarà ai 23.07. sa Pilat a Urtijëi
L se trata de na cunfrun­tazion danter artisć o nterprec, che à la pusci­bltà de liejer dant pec o poejies, de cianté o suné, fé teater, cabaret o vel’ schec, depënjer, o cun na fotografia, dessëni o caricatura, ziplé, balé o vel’ autra matada. Mpur­­tant iel che l sibe da rì!
L possa fé pea duc, unfat de ciuna età o rujeneda, y i dëssa man­dé ite si scrit o pez dan l 2 de lugio a info@circolo.eu cun l titul: Proiet »Da stlupé dal rì«.
Na giuria chirerà ora nchin a 20 partezipanc, che arà dl’aurela uniun 5 menuc per prejenté si lëur ai 23 de lugio sa Pilat, pra la festa metuda a jì da Lidia y Gregor n cunlaurazion cun la Lia Mostra d’Ert-Circolo. La valutazion unirà fata per l 50% dal publich y per l 50% da na giuria.

Scrijes’a nce tu?
Letures y lëuratueres de scritura, n vënderdi ai 27.05. a San Martin de Tor y n sada ai 28.05. a Urtijëi
»Leteratura se mët danterite« ie n proiet de Nadia Moling y Nadia Rungger, sustenì dala SAAV.
Duc ie nviei a scrì pea pra i lëuratueres de scritura ai 27.05. dala 15:00 tl Istitut Ladin Micurá de Rü a San Martin de Tor y ai 28.05. dala 15:00 tla biblioteca dl Circolo a Urtijëi. L vën pità velch da maië y da bever. Iscrizions per e-mail a nadia.rungger@gmail.com.
N vënderdi ai 27.05. dala 20:00 tl Istitut Ladin a San Martin prejenterà Anna Hengstberger (Nieder­österreich), Bruno Maruca (Gherdëina) y Jasmin Ferdigg (Val Badia) si tesć y cunterà de si proiec letereres.
N sada ai 28.05. dala 20:00 tla biblioteca dl Circolo a Urtijëi ie duc chëi che à fat pea pra i lëuratueres nviei a prejenté si poejies y cunties.
Se ncunferton sun Vosc unì!

Jonëza: svilupé y adoré la forza mentala
Referat por jogn y jones, en vëndres ai 27 de ma dales 19:30, tl Saj.un a La Ila (Ciasa dla Cultura, alzada -2)
I jüc olimpics é jüs a piz de forá. Atlec y atletes á baié gonot dl’importanza dla »forza mentala«. Mo de ci se tratera pa chiló avisa? Tratan chësc referat te vëgnel mostré co che te pos svilupé forza mentala, ci tecniches che al esist y co che te pos la adoré sides tl sport, co tla scora y tla vita da vigni de. Referënt é Valentin Piffrader. Organisaziun: Consëi de Formaziun de Badia, en cola­­bo­raziun cun le Sorvisc ai Jogn Val Badia.

Testamënt biologich… ciodí pa?
Le Grup Volontariat Val Badia en colaboraziun cun le Consëi de Formaziun Badia mët a jí n referat cun Aichner Hartmann Ludwig, en jöbia ai 26 de ma dales 20:00, tla Ciasa Runcher a Badia
Por mirit dl progres dla medejina él aldedaincö plü saurí da varí da tröpes maraties o, almanco da les alisiré tratan so decurs, trö’ deplü co dan zacotan d’agn. Datrai pól indere sozede che da arlungé la vita dles porsones vëgnel ince arlungé lapró le patimënt o le me. Te chëstes situaziuns él da se damané ci ch’al é da fá tl caje che le paziënt n’é nia plü bun da tó dezijiuns che reverda les cures da fá o les medejines da tó ite. Insciö röion a se fá pinsiers sc’al ne foss nia dërt da stlarí nosta orenté canch’i sun ciamó bogn da le fá, por definí cun ci cures ch’i fosson a öna, ci ch’i esson ion ch’al gniss fat, ci ch’i azetasson o nia.
Tl referat »Testamënt biologich... ciodí pa?« en jöbia ai 26 de ma dales 20:00 tla Ciasa Runcher a Badia jarán ite plü avisa sön i 4 punc plü importanc: 1) Ci é pa n testamënt biologich y ciönes é pa les desposiziuns de lege? 2) Can pón pa fá n testamënt biologich? 3) Ci pól pa gní scrit te n testamënt biologich? 4) Che nes dëida pa da le mëte adöm y olá dessel pa gní tigní sö y i.i.?

Rina: aisciöda sonada y ince ciantada
La Musiga da Rina inviëia dër bel al conzert d’aisciöda, la domënia ai 22 de ma dales 20:00 tl salf dles manifestaziuns a Rina
Le program é metü adöm da toc moderns y tradizio­nai. Al sará ince da aldí n solo al eufonium tl toch »Green hill« de Bert Apper­mont y le toch ince cianté »Nessaja« de Peter Maffay, aranjé da Kurt Gäble. N toch particolar sará chël che vëgn soné adöm al Grup corgn da ciacia Ladi­nia, scrit por corgn da ciacia y musiga da fle. La direziun musicala é de Barbara Costabiei, Rein­hard Ferdigg y Tone Palle­strong. I se confortun de ves odëi tröc!

Cëna cun teater a Corvara
»En forma por tres« é le titul dl teater criminal che vëgn rapresenté a Corvara. Ince le publich é invié da stomé para
Le Consëi de Formaziun dl Comun de Corvara mët a jí en vëndres ai 27 de ma dales 19:00 tl salf dles manifestaziuns a Corvara na cëna cun n teater criminal, olache le publich é invié da stomé chi che é l’assassin dla storia, che sará da odëi tratan cëna sön paladina.
Al jobelnëia Ellen Alfreider, Alessandro Bonfanti, Andreas Peccei, Sabine Rudiferia, Tobias Stampfer y Susann Tavella. La rejia é de Erika Castlunger. Por informaziuns él da cherdé sö Sonia al nr. 349 1588485.

Sonns y melodies d’aisciöda a San Martin
Conzert d’aisciöda dla Musiga da San Martin Tor, en sabeda ai 28 de ma dales 20:30 tl salf dles manifestaziuns da San Martin
La Musiga da San Martin de Tor á indô le plajëi da porté dant n program desvalí imparé ite ti ultims mëisc, cun melodies tradizionales y ince toc plü moderns. Sot ala bachëta de Sepl Pezzei podarán aldí n conzert te döes perts. Le conzert mët man cun l’inn »Vita pro musica« de Thiemo Kraas, spo pón aldí la marcia »Unser Land« dl componist südtirolesc Robert Neumair, y »Eiger – A Journey to the Summit« de James Swearingen. Ara vá inant cun le bel toch cianté »Alegría« y por stlü jö la pröma pert »La Storia« de Jacob de Haan. La secunda pert vëgn daurida cun la polca »Jubiläumsklänge« de Peter Schad, por passé spo ala pert moderna cun »80er Kult(tour)« ar. da Thiemo Kraas y »Lady Gaga in concert«, ar. da Sean O’Loughlin.
Le conzert se stlüj jö cun la marcia ingleja »Sons of the Brave« de Thomas Bidgood, ar. da Siegfried Rundel. Düc i mëmbri dla musiga Ves inviëia cun gran ligrëza a passé na sëra cun de beles melodies.

N liber por i 125 agn Stödafüs d’La Pli
En sabeda ai 21 de ma vëgnel presenté la »Cronaca dai Stödafüs d’La Pli 1897 – 2022«. La domënia ai 29 sarál spo la gran festa de iubileum por i 125 agn dla uniun
I Stödafüs d’La Pli festejëia iniann sü 125 agn de vita. Le iubileum vëgn ince recordé cun la publicaziun de n liber, la »Cronaca dai Stödafüs d’La Pli 1897 – 2022«. La publicaziun metüda adöm da Jep Agreiter, Franz Trebo y Gustl Trebo vëgn presen­tada chësta sabeda ai 21 de ma dales 17:00, te Ciasa dles Uniuns a La Pli. La mo­de­raziun dl domisdé é de Katrin Ellecosta, deperpo che n grup de ciantadus d’La Pli fistidiëia por la cornisc musicala. Dedô sarál n pice ren­frësch.
La festa ofiziala de iubileum sará spo la domënia ai 29 de ma. Ara mët man dales 8:30 cun la santa mëssa, dedô sarál spo i discursc da pert dles autorités y les onoranzes a stödafüs che s’á fat mirit. Ara vá inant cun n conzert dla Musiga d’La Pli y aurela cörta cun Jonas Oberstaller y Theresa Falkensteiner. Dales 14:30 gran defilada da Brach cina sön plaza d’La Pli cun guanc y massaries di ultims 125 agn, por passé spo al conzert dla Musiga da San Martin y spo aurela cörta cun Anita y Philipp.