Manifestazions atuales speziales

Data

10 de jugn 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 22 de jugn
Erbes de Börz
Dai 18 ai 26 de jügn vëgnel metü a jí n’edema plëna de saus y curiosités sön les erbes da munt
L’edema »Erbes de Börz«, cun jites menades y derzades é gnüda ponsada por fá conësce les erbes da munt, ciüfs y lëgns che crësc chiló da nos. Insciö podarán tó pert a trëi  ativités, sciöche ince ciarcé les erbes y d’atres scincundes dla natöra tles derzades che gnará pitades te bëgn 6 üties y restoranc a Antermëia, sön Börz y incëria. Les iscriziuns por les ativités vëgn tutes sö cina le de denant, tres i ofizi dla Cooperativa Turistica Al Plan/San Martin, al numer 0474 501037.
21.06.: Mi lersc – n lëgn por le clima
Adöm cun n verdabosch podarán jí fora por pra y bosc y senté deboriada de pici lersc, por curí l’öt lascé zoruch dai lëgns tomá tratan la tempesta Vaia. Orar: dales 9:30 ales 13:00. An s’incunta a Pe de Börz.
22.06.: Les erbes da descurí
Adöm cun na esperta de erbes jarán fora por i pra de Börz y incëria. Dailó nes spligarára y mostrára les erbes che an pó adoré nia ma te ciasadafüch, mo ince desco erbes de medeji­na o da fá sofc y anghënc. Orar: dales 14:00 ales 16:00; an s’incunta sön Börz.
24.06.: I mituns descür la botanica
Imparé bele da pici insö ci che fej bun y ci che la natöra nes scinca é de gran valüta. Porchël pón anuzé chësta ocajiun: descurí adöm cun na esperta d’erbes la botanica che florësc incër le paisc d’Antermëia y abelí l’esperiënza cun jüc. Orar: dales 15:00 ales 17:00; an s’incunta sön plaza de dlijia a Antermëia.

Cëna da morin a morin
Tla Val di Morins a Lungiarü vëgnel metü a jí en vëndres ai 17 de jügn dales 18:00 inant na serada particolara
Por festejé adöm che al vëgn l’isté, é düc canc inviá a n momënt de aurela cörta y compagnia tla Val di Morins a Lungiarü. En vëndres ai 17 de jügn dales 18:00 inant gnarál pité derzades cun produc dl post, n pice marcé di paurs y sambëgn de bela musiga dal ví.
Tolesse impara na löm da gofa, ajache al sará n evënt zënza forza eletrica y iluminaziun artifiziala. Sce al ess da ester bur’ tëmp, vëgn la manifestaziun spostada ai 24 de jügn.

Lia Guanc dala gherdëina
L program dl 2022. Duc ie nviei a fé pea cun la troht
19.06. Dumënia dai Andli. S’ancunton dala 7:35 sun Plaza S. Antone, dala 8:00 santa mëssa y dopro pruzescion; gusté tl hotel Genziana.
04.07. Urtijëi da viver (sëires cun la troht per la Lia dl Turism). S’ancunton dala 21:00 sun Plaza S. Antone per jì tres l raion da jì a pe. De chësta sëires n iel mo trëi, plu avisa: ai 25.07., ai 01.08., ai 22.08.
10.07. Segra de Urtijëi. S’ancunton dala 8:35 sun Plaza S. Antone per jì ala gran mëssa. Dopro defileda da noza da dlieja demez.
07.08. »Gherdëina n troht«, gran defileda dala 16:00 te Sëlva. S’ancunton dala 14:45 sun Plaza S. Antone per furné ite cun la curiera.
15.08. Gran Santa Maria. Gran mëssa y benedescion dl maz de ciofs y craitles che se tulon pea. S’ancunton dala 8:40 sun Plaza S. Antone. Do mëssa vëniel jit tres l raion da jì a pe; gusté jal Genziana.
11.09. Festa da d’instà via n Fascia. Furnon cun la curiera a Cianacëi.
02.10. Segra dl Rosar. S’ancunton dala 8:05 sun Plaza S. Antone, dala 8:30 gran mëssa y pruzescion.
06.11. Rait de S. Lenert tla Val Badia.

La Mujiga nvieia ala Segra da Bula
Chësta dumënia, ai 12 de juni dala 9:30 inant
Do doi ani chiec nvieia la Mujiga da Bula cun plajëi, chësta dumënia ai 12.06.2022 ala segra.
L di de festa scumëncia dala 9:30 cun na Santa Mëssa suneda da n cuartet dopl de strumënc a banda. Inant jiràla dala 10:30 cun l’inaugu­razion y benedescion ufiziela dla cësa dla lies nueva. Dala 11:00 inant saràl la Mujiga de Pruca a ve tenì cumpania cun si cunzert y nce via per l domesdì uniràl sunà.
Da bever y da maië ne manceràl sambën ënghedenó.
Sun vosc unì se ncunforta la Mujiga da Bula. Assudëi ala Segra da Bula.

»School’s out« tl Saj.un
Por stlü jö chësc ann de scora vëgnel organisé ai 16 de jügn tl zënter dla jonëza y dla cultura Saj.un a La Ila n conzert dla band »Rebel Rootz«
Le Saj.un dauriará sües portes dales 18:00 inant en compa­gnia de n DJ, che metará sö musiga cina che le conzert mët man. So post gnará spo surantut dai »Rebel Rootz«, che sonará süa musiga por le rest dla serada. L’entrada é por düc debann y an mëss avëi complí i 16 agn. Le conzert se rovará dales 22:00. Le Team dl Sorvisc ai Jogn se conforta bele sön osc gní!

»FuTurismo« adöm a Michil Costa
»Sunse sön la dërta strada?« En mertesc ai 14 de jügn vëgnel metü a jí tla Ciasa dla Cultura a La Ila na incuntada de reflesciun sön le turism, cun la presentaziun dl liber de Michil Costa
En mertesc ai 14 de jügn dales 17:00 él l’ostí da Corvara che presentëia so liber »FuTurismo – un accorato appello contro la monocultura turistica«, che porta dant na vijiun por fá turism tl respet di valurs dla sostenibilité, umanité y dl bëgn coletif, y cuntra l’industrialisaziun dl’economia turistica. Al’incuntada tolará pert ince la vizedireturia dles Scores Altes da La Ila Elisabeth Frenner, le presidënt dla Cooperativa Turistica Alta Badia Christian Pescollderungg y le presidënt de Alta Badia Brand Andy Pertot. Diego Clara fistidiëia dla moderaziun.

La Val: Musiga da film
Le conzert d’aisciöda dla Musiga da La Val é iniann dediché ala musiga da film. L’apuntamënt é por i 11 de jügn
La Musiga da La Val inviëia a so conzert d’aisciöda, en sabeda ai 11 de jügn dales 20:30, te palestra da La Val. La serada é döta dedi­cada ala musiga da film. Sot la bachëta de Stephan Ploner gnarál porté dant tla pröma pert le »Police Academy March« de Robert Folk, por jí inant spo cun »Also sprach Zarathustra« de Richard Strauss, »Cast Away« de Alan Silvestri y »The Da Vinci Code« de Hans Zimmer.
Al sará spo na palsa cun la surandada dles onoranzes, por jí inant cun »The Imperial March« de John Williams, »Fly with me« de Stefan Nilsson, »Titanic–Medley« de James Horner y »At World’s End« de Hans Zimmer. Le conzert gnará stlüt jö cun le toch conesciü »I will follow him«, aranjé da Ron Sebregts. La Musiga da La Val inviëia düc dër bel.

N de tla natöra a Lungiarü
Chësta domënia ai 12 de jügn él a Lungiarü la »AVS Sternfahrt«, na incuntada por families sot al sëgn dla natöra, dl jüch y dla sostenibilité
»Mantigní nosc tesur naturalistich« é le motto dla »AVS Sternfahrt«, na manifestaziun che vëgn metüda a jí vigni 3 agn y olache al s’abina jogn cun families de döt Südtirol. Iniann sarára tl paisc dl alpinist Lungiarü, chësta domënia ai 12 de jügn.
An s’incunta danter les 9:30 y les 10:00 pro la plaza da parché Val di Morins, y dailó piará spo ia na picia escurjiun, passan fora por la vila de Miscí y rovan spo indô düc adöm te paisc. Söl misdé mët man le program cun deplü staziuns tematiches y jüc por mituns. Da mangé y da bëre él vignun che se tol para. Dales 15:00 él preodü la premiaziun y conclujiun. La manifestaziun vëgn organisada dal AVS – Alpenverein Südtirol deboriada cun le grup jonil dla Lia da Munt Ladinia y le AVS »Jugend – Familie«. Informaziuns plü menüdes ciafon sön www.alpenverein.it/sternfahrt

»Dolomites Ladinia Trail«
Ai 2 de messé vëgnel indô tigní la gara da salté cun start a San Martin y travert sön la Plose
Tla pröma fin dl’edema de messé vëgnel lié bëgn 5 gares da salté te öna na manifestaziun sora, sot al tët dl »Dolomiten Brixen Marathon«. De chësta manifestaziun fej pert ince le »Dolomites Ladinia Trail«, nasciü dl 2019, che gnará tigní la sabeda ai 2 de messé.
La gara de 29 km se sleria fora danter sëmenes, trus y munts dl patrimone Dolomites UNE­SCO. Le start é a San Martin de Tor. I con­corënc vá spo cuntra Lungiarü, Göma cina ala Ütia de Fornella. Da iló vára inant cina ala Schatzerhütte y sön la Rossalm, por fá l’ultima ascensiun cina sön la Plose. Le deslivel é de 1.852 metri söpert y 545 jöpert. Por infor­ma­ziuns plü menüdes sön döt l’evënt y por les iscriziuns, bastel jí sön la plata internet
www.brixenmarathon.com