Manifestazions atuales speziales

Data

17 de jugn 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 17 de jugn
Daurida dl labirint de meditaziun
Le grup de meditaziun da La Val inviëia ala benedisciun y inaudaziun dl Labirint Dlijia Vedla a La Val
En domënia ai 26 de jügn dales 16:00 éra tan inant. Pro Dlijia Vedla da La Val vëgnel benedí y inaudé le labirint de meditaziun. Söl post sarál ince l’espert de labirinc Gernot Candolini da Desproch. Les parores de salüt gnará pronun­ziades dal Ombolt Angel Miribung, la benedisciun dl labirint gnará cherdada jö da siur Degan Iaco Willeit.
La festa vëgn abelida dal Trio de archëc Declara y da n grup dla Uniun dl Teater da La Val. Dedô vëgnel tigní n pice renfrësch. Düc é dër bel inviá, ince sce al ess da ester bur’ tëmp.


Cianté popolar
En sabeda ai 18 de jügn dales 13:30 inant vëgnel tigní na incuntada por cianté deboriada, tla Ütia Gardenacia
Le Consëi de Formaziun de Badia inviëia en sabeda ai 18 de jügn dales 13:30 inant da gní tla Ütia Gardenacia. Al gnará tigní na incun­tada por cianté adöm cianties ladines popolares y nia ma, cun acompagnamënt musical da pert de Lois Kastlunger y Bruno Pizzinini y cun l’aiüt de valgügn ciantarins. Al vëgn metü a desposiziun tesć stampá dles cianties, por che düc pois cianté para. Gnide a passé valgünes ores plajores en compagnia, te na bela cornisc musicala y amesa la natöra.
Informaziuns plü menüdes ciafon ala mail cf.badia@rolmail.net o pro Margit al 340 3438709. Le Consëi de Formaziun ne se suran­tol degüna responsabilité. Les boandes consumades te ütia vegn paiades dai partezi­panc.


Erbes de Börz
Dai 18 ai 26 de jügn n’edema plëna de saus y coriosités sön les erbes da munt
L’edema »Erbes de Börz«, cun jites menades y derzades é gnüda ponsada por fá conësce les erbes da munt, ciüfs y lëgns che crësc chiló da nos. Insciö podarán tó pert a 3 ativités, sciöche ince ciarcé les erbes y d’atres scincundes dla natöra tles derzades che gnará pitades te bëgn 6 üties y restoranc a Antermëia, sön Börz y incëria. Les iscriziuns por les ativités vëgn tutes sö cina le de denant, tres i ofizi dla Cooperativa Turistica Al Plan/San Martin, al numer 0474 501037.
21.06.: Mi lersc – n lëgn por le clima
Adöm cun n verdabosch podarán jí fora por pra y bosc y senté adöm de pici lersc, por curí l’öt lascé zoruch dai lëgns tomá tratan la tempesta Vaia. Orar: dales 9:30 ales 13:00. An s’incunta a Pe de Börz.
22.06.: Les erbes da descurí
Adöm cun na esperta de erbes jarán fora por i pra de Börz y incëria. Dailó nes spligarára y mostrára les erbes che an pó adoré nia ma te ciasadafüch, mo ince desco erbes de medijina o da fá sofc y anghënc. Orar: dales 14:00 ales 16:00; an s’incunta sön Börz.
24.06.: I mituns descür la botanica
Imparé bele da pici ci che fej bun y ci che la natöra nes scinca é de gran valüta. Porchël pón anuzé chësta ocajiun: descurí adöm cun na esperta d’erbes la botanica che florësc incër le paisc d’Antermëia y abelí l’esperiënza cun jüc. Orar: dales 15:00 ales 17:00; an s’incunta sön plaza de dlijia a Antermëia.



Cëna da morin a morin
Tla Val di Morins a Lungiarü vëgnel metü a jí en vëndres ai 17 de jügn dales 18:00 inant na serada particolara
Por festejé adöm che al vëgn l’isté, é düc canc inviá a n momënt de aurela cörta y compagnia tla Val di Morins a Lungiarü. En vëndres ai 17 de jügn dales 18:00 inant gnarál pité derzades cun produc dl post, n pice marcé di paurs y sambëgn de bela musiga dal vi.
Tolesse impara na löm da gofa, ajache al sará n evënt zënza forza eletrica y iluminaziun artifiziala. Sce al ess da ester bur’ tëmp, vëgn la manifestaziun spostada ai 24 de jügn.



Lia Guanc dala gherdëina
L program dl 2022. Duc ie nviei a fé pea cun la troht
19.06. Dumënia dai Andli. S’ancunton dala 7:35 sun Plaza S. Antone, dala 8:00 santa mëssa y dopro pruzescion; gusté tl hotel Genziana.
04.07. Urtijëi da viver (sëires cun la troht per la Lia dl Turism). S’ancunton dala 21:00 sun Plaza S. Antone per jì tres l raion da jì a pe. De chësta sëires n iel mo trëi, plu avisa: ai 25.07., ai 01.08., ai 22.08.
10.07. Segra de Urtijëi. S’ancunton dala 8:35 sun Plaza S. Antone per jì ala gran mëssa. Dopro defileda da noza da dlieja demez.
07.08. »Gherdëina n troht«, gran defileda dala 16:00 te Sëlva. S’ancunton dala 14:45 sun Plaza S. Antone per furné ite cun la curiera.
15.08. Gran Santa Maria. Gran mëssa y benedescion dl maz de ciofs y craitles che se tulon pea. S’ancunton dala 8:40 sun Plaza S. Antone. Do mëssa vëniel jit tres l raion da jì a pe; gusté jal Genziana.
11.09. Festa da d’instà via n Fascia. Furnon cun la curiera a Cianacëi.
02.10. Segra dl Rosar. S’ancunton dala 8:05 sun Plaza S. Antone, dala 8:30 gran mëssa y pruzescion.
06.11. Rait de S. Lenert tla Val Badia.



»Dolomites Bike Day«
En sabeda ai 25 de jügn vëgnel metü a jí la cuinta ediziun
I jus de Ciaulunch, Falzares y Valparola sará i protagonisć dla cuinta ediziun dl »Dolomites Bike Day«, en sabeda ai 25 de jügn. Le percurs dl »Dolomites Bike Day« a forma de anel pëia ia dal’Alta Badia sura Ciaulunch cina a Reba y passa fora por i paisc de La Pli de Fodom y Cernadoi. Da chiló ván spo sön le ju de Falzares y Valparola por rové zoruch ti paisc dl’Alta Badia y stlü jö insciö la roda. Pié ia pón sambëgn ince dai paisc de Reba o La Pli de Fodom y lascé le ju de Ciaulunch a inultima. Le percurs á na lunghëza totala de 51 km, cun n deslivel de 1.370 m. Dales 8:30 ales 14:00 gnarál stlüt les strades al trafich motorisé, insciö da ti lascé lerch ales rodes y ti pité plü segurëza fora por döt le percurs. Al vëgn aconsié da fá la roda tl vers cuntra la ora. Düc i amanc dla roda é dër bel inviá da tó pert ala manifestaziun, a chëra che an ne á nia bria da se scrí ite. Plü infos sön www.dolomitesbikeday.it