Manifestazions atuales speziales

Data

26 de agost 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 26 de agost
De dles families a La Val
L’Uniun dl Sport da La Val organisëia en domënia ai 28 de agost la terza ediziun dl »De dles families«. N domisdé de devertimënt por pici y gragn, sön la plaza dal sport »Plans« a La Val
Le program dl de mët man dales 14:00 cun de vigni sort de jüc por copies, formades da n genitur y n möt o na möta. De vigni sort de competiziuns metará ala proa la conzen­traziun y les abilités di concorënc. De bi pesć ves aspeta!
Por pici y gragn vëgnel ince organisé n torné de »foot darts«, cun la poscibilité da davagné n bel pest! Tratan le domisdé podará i mituns se devertí da trá salc tl ciastel a aria.
Dales 17:00 é spo la grilia cialda por arjigné ca de bun patüc da mangé. Por le bëre y la musiga vëgnel sambëgn fistidié tratan döt le domisdé. Düc é dër bel inviá a tó pert al evënt. Le devertimënt é assiguré!

»fiat lux«: vigni mertesc cun conzert
Tla Engelsburg a Neustift, pert dl convënt dër conesciü che festejëia en chësc ann i 880 agn de vita, él da odëi le tritich de tesć sacrai cristians, musiga y pitöra. Le proiet é davert vigni de, aldefora dles domënies, dales 10:00 ales 17:00. Le conzert dl cor moscedé sot la direziun de Ludwig Rindler é söl program vigni mertesc dales 16:00
L’EPL presentëia tla Engelsburg a Neustift cina ai 6 de setëmber 2022 la mostra cun draps intënc y musiga ciantada dal titul »fiat lux«. I draps é gnüs intënc dal artist Albert Mellauner, la musiga componüda dal maester Ludwig Rindler. L’idea, le conzet y la cerna di tesć fora dla tradiziun di convënc cristians por latin y ajuntes ladines dala liturgia contemporana é de Iaco Rigo.
Vigni mertesc dales 16:00 él söl program la presentaziun dla musiga originala da pert dl cor moscedé de set usc y percusciuns. Le conzert vëgn presenté vigni mertesc dales 16:00 cina le de dla finissaja programada por i 6 de setëmber 2022.
»fiat lux« interpretëia danü la sostanza dles ores de convënt (hores) sciöche secuënza de nüsc dis y nosta vita tla mainira dl movimënt di corusc intënc sön peza y tla sintesa di lalc tradizionai y dles cianties atuales de dlijia, la composiziun döra 25 menüc. Le proiet artistich é sostegní finanziariamënter dala Repartiziun dles Mendranzes dla Regiun Trentin – Südtirol.
L’entrada ai conzerc vigni mertesc dales cater domisdé é debann; daverta é la mostra vigni de (aldefora dla domënia) danter les 10:00 ales 17:00.

Mostra culetiva: »Capacity of Line«
N sada ai 27.08. dala 20:30 giaurida tla Galaria Vijion a Puntives
L sarà da udëi lëures de Magdalena Bolego, Flavio Senoner, Daniel Mirchev, Luise von Rohden y Egon Digon. La mostra se dà ju cun l’astrazion, analisan par­ticularmënter l putenziel dla linia.
Perdrët se basa duta l’ert sun la linia, che ie si funtana y fundamënta. Te uni ciamp artistich, sibe figuratif che astrat, à la linia na gran valuta. Da d’ëila depënd la dinamica, tenscion o armunia dl’opra.
Tla mostra tla Gala­ria Vijion vëniel mustrà lëures artistics astrac, che auza ora l valor dla linia. L ie n’ert che ne se fërma nia sun n’este­tica tlera y de purëza, ma gëura nce la pertes plu persuneles y emuziu­neles dl:a artist:a.
L’opres nes descëida sentimënc, che va sëura l sëul cialé ora, arjunjan sensazions che va dal sublim nchin al ngian.
La mostra »Capacity of Line« resterà davierta dai 29.08. nchin ai 24.09., da lunesc nchin sada danter la 16:00 y la 19:00.

30 ani Orchestra Sonoton Gherdëina
Doi i cunzerc per festejé chësc iubileum, n vënderdi ai 26.08. y n dumënia ai 28.08. dala 21:00 sun Plaza de Chemun de Sëlva
»Music shapes generations«. Chësc l titul di doi cunzerc pra chëi che n jirà de reviers tla generazions y puderà audì pec desferënc coche per ejëmpl »Varia­tionen über ein Thema von Haydn« de J. Brahms, »The Complete Harry Potter« de J. Brubaker, »Argentaria« y »All generation’s lead to Orchestra Sonoton Gher­dëina«, doi opres scrites dal diri­ghënt dl’Orche­stra y cumposidëur y musizist Matthäus Crepaz.
Chertes pòssen cumpré dan i cunzerc o se lascian scrì su danora tl ufize dla Lia dl Turism de Sëlva, al numer 0471 777900.
L’Orchestra se ncunforta sun Vosc unì per festejé deberieda i trënt’ani de atività dl’Orchestra Sonoton Gherdëina.