La Usc di Ladins

Cunzert dla grupa »The Waydlee«
Duman sada ai 03.09. dala 20:30 tl self dla mostres dla Lia Mostra d’Ert-Circolo a Urtijëi
La Lia Mostra d’Ert-Circolo nvieia duta la jënt apasciuneda de mujiga a chësc cunzert dla grupa »The Waydlee«, metuda adum da trëi musizisć de Gherdëina: Stefan Demetz (usc, chitara eletrica, chitara acustica), (Ivan Schenk–usc, bas, chitara) y Maikol Demetz (usc, bateria).
L cunzert sarà duman sada ai 03.09. dala 20:30 tl self dla mostres dla lia tl zënter de Urtijëi.
Lia lia se ncunfora sun vosc unì.
Gara dla roda »Crono Fanes«
En sabeda ai 17 de setëmber él indô la gara a tëmp cun roda da munt o E-Bike, da Pederü cina sön Fanes
La gara mët man dales 11:00, cun start dlungia la ütia Pederü. Les concorëntes y i concorënc pëia ia un al menüt. Al sará categories desvalies: pro la roda da munt váres do eté, pro la e-bike do pëis; al sará iniann ince na categoria nöia por chi che á na e-bike che dëida jí plü co 25 km/h. Informaziuns plü menüdes y iscriziuns danfora sön www.eventsdolomites.org o telefonan al 327 3698176. L’iscriziun costa 18,00€ sce an la fej danfora (da paié ite söl post); chi che se scrí ite al start paia 20,00€. Pro la cuota de iscriziun él ince na pasta tla Ücia Lavarella o Ücia de Fanes. Le numer de partezipanc é limité a 150. Cun l’iscriziun vëgnel azeté che l’organisadú ne surantol degüna responsabilité por ci che podess sozede dan, tratan y do la manifestaziun. Iscriziuns ma cun majera eté.
Avis politich a paiamënt
Serada de discusciun politica »Ladins Dolomites incunta le zënter man dërta« é le titul dla serada, söl program ai 07.09. a Badia
En mercui ai 7 de setëmber dales 20:00 vëgnel tigní tla Ciasa J. B. Runcher a Badia na serada politica dal titul »Ladins Dolomites incunta le Zënter-man dërta (Forza Italia, Fratelli d’Italia y Lega)«.
Al sará na serada de discusciun politica sön temesc desvalis de atualité politica nazionala y locala. Al gnará dé la poscibilité da porté dant propostes, che gnará portades dant te Consëi Provinzial y tl Parlamënt talian.
125 agn Stödafüs d’Al Plan
En gaujiun dla segra dl paisc, festejëia i Stödafüs d’Al Plan le iubileum de 125 agn. Dui dis de festa, cun la presentaziun de n liber
Ai 10 y 11 de setëmber fej i Stödafüs d’Al Plan festa por i pröms 125 agn dla uniun. La festa mët man la sabeda ai 10 dales 18:00, pro paiun de paisc. Da sëra sarál musiga dal ví cun »Alexander dal Plan & Band« y dedô cun la »Keller Band«.
La festa cun at ofizial é spo la domënia ai 11 de setëmber, segra d’Al Plan. Stödafüch, ghesć d’onur y delegaziuns fajará dales 9:30 l’ingres da magazin demez cina te dlijia, olache al é la santa mëssa da festa. Dales 11:00 za. él spo l’at ofizial sö da paiun, cun salüt ai ghesć da pert dl comandant. Dedô gnarál presenté le liber »125 Agn Stödafüs d’Al Plan«, metü adöm da Pablo Palfrader, por passé spo ales onoranzes y discursc d’ocajiun. Le de vá inant dales 13:00 za. cun n conzert dla Musiga d’Al Plan, spo dales 15:00 cun musiga da pert di »Veglfoucha« y dales 17:00 cun musiga da pert di »Klausberga«. Dales 21:00 sarál ciamó i Stödafüch da Rasun Dessot che mostrará n spetacul cun jüc d’ega. Por spëisa y boanda vëgnel fistidié.
Conzert dles Ganes
Ai 8 de setëmber n conzert pro Dlijia Vedla da La Val
Les sorus Elisabeth y Marlene Schuen, chersciüdes sö a La Val, fej bele da plü de 10 agn musiga deboriada sciöche »Ganes« y dal 2018 inant é ince Natalie Plöger gnüda tuta sö tl grup. Les Ganes cianta da dagnora por ladin, so lingaz dla uma che le publich ascuta sö cun le cör. Ares porta dant toc energetics, magics, epics y emozionanc.
Ai 8 de setëmber vëgn les Ganes zoruch te süa patria, te n post idilich de belëza cun Piza dales Nü che ti fajará da cornisc a n spetacul plëgn de emoziuns. Dales 20:30 pó düc i interessá tó pert a chësc beliscim conzert pro la Dlijia Vedla da La Val, püch sura la Dlijia de Santa Berbora. Por l’ocajiun gnarál stlüt la strada dal zënter da La Val cina sö Tolpëi y al sará n sorvisc shuttle che condüj sö la jënt. Al vëgn ince pité la poscibilité da arjunje Dlijia Vedla a pe, dal momënt che le Tru de meditaziun gnará iluminé por l’ocajiun. Por podëi tó pert ne mësson nia se prenoté y sce al foss bur’ tëmp, vëgn le conzert sposté te dlijia da La Val.


»fiat lux«: ultim conzert en mertesc
Tla Engelsburg a Neustift, pert dl convënt dër conesciü che festejëia en chësc ann i 880 agn de vita, él da odëi le tritich de tesć sacrai cristians, musiga y pitöra. Le proiet é davert vigni de, aldefora dles domënies, dales 10:00 ales 17:00. Le conzert dl cor moscedé sot la direziun de Ludwig Rindler é söl program ciamó en mertesc dales 16:00
L’EPL presentëia tla Engelsburg a Neustift cina ai 6 de setëmber 2022 la mostra cun draps intënc y musiga ciantada dal titul »fiat lux«. I draps é gnüs intënc dal artist Albert Mellauner, la musiga componüda dal maester Ludwig Rindler. L’idea, le conzet y la cerna di tesć fora dla tradiziun di convënc cristians por latin y ajuntes ladines dala liturgia contemporana é de Iaco Rigo.
Vigni mertesc dales 16:00 él söl program la presentaziun dla musiga originala da pert dl cor moscedé de set usc y percusciuns. Le conzert vëgn presenté vigni mertesc dales 16:00 cina le de dla finissaja programada por i 6 de setëmber 2022.
»fiat lux« interpretëia danü la sostanza dles ores de convënt (hores) sciöche secuënza de nüsc dis y nosta vita tla mainira dl movimënt di corusc intënc sön peza y tla sintesa di lalc tradizionai y dles cianties atuales de dlijia, la composiziun döra 25 menüc. Le proiet artistich é sostegní finanziariamënter dala Repartiziun dles Mendranzes dla Regiun Trentin – Südtirol.
L’entrada ai conzerc vigni mertesc dales cater domisdé é debann; daverta é la mostra vigni de (aldefora dla domënia) danter les 10:00 ales 17:00.


La festa dl jol
N dumënia ai 04.09. a Albions, metuda a jì dala lia di mudelisć Curnacins

• 
•  

View the embedded image gallery online at:
https://www.lausc.it/manifestazions-y-evenc/20778-manifestazions-atuales-speziales#sigProIdd81a066519

Gherdëina cun i Destudafuech de Albions
Pra la festa dl jol féjel for pea de plu grupes da tlo ntëur y da oradecà. Sun scumenciadiva dl presidënt dla lia di mudelisć Curnacins Gherdëina Ivo Demetz vëniel chëst ann inò metù a jì la festa tradiziunela dl jol. Coche zënza, vëniela nvieda via deberieda cun i Destudafuech dl luech de Albions, che se cruzia, cun si fenans, dla pert gastronomica. Sëuraprò vëniel pità per i mutons y lamutans l mesun de avisé n fliegher a motor cun l sistem »maester y sculé« – n sistem pra chël che l vën judà a julé n segurëza. Da udëi saràl sambën d’uni sort de fliegri y julieres fac cun gran amor y lezitënza. Dut l di saràl ejibizions di piloc mudelisć, che mostra si savëi tl jol. Mplu puderàn cialé pro a na ejibizion dl Aiut Alpin Dolomites.
Cie che vën trat ite da chësta scumenciadiva va a fin de bën ala lia Peter Pan.
Sce l tëmp ne lascia nia fé, vën la festa spënta de doi enes, for de dumënia, ai 18 de setëmber.


Mostra de Egon Dejori: »Limit«
Giaurida duman sada ai 03.09. dala 20:30 tl Tublà da Nives te Sëlva
Pra Egon Dejori ie la persona tl zënter. Te una na pert dla mostra persunela vëniel mustrà de gran pultredes de chëla persones che, ntan si truep viages tres l’America zentrela, ti à giaurì sibe la porta che nce l cuer. Dejori se dà ju cun l argumënt dla denità, dla lidëza y dla segurëza dla persona y nes lascia ite – tres si fotografies – te vites privates. La mostra mët adum videos, renderings tridimensciunei, fotografies y nstalazion, nes prejentan na critica soziela nmpue desferënta cun umor y bona ulentà.
Giaurida dla mostra tl Tublà da Nives te Sëlav duman sada ai 03.09. dala 20:30.
La mostra resterà davierta nchin ai 25.09., uni di ora che de lunesc, dala 16:00 nchin la 19:00. De vënderdi nce da sëira, dala 20:30 nchin la 22:00.


»Scuvrì – scuvierta fotogrametrica de Gherdëina«
Giaurida dla mostra de Martin Demetz n vënderdi ai 09.09. dala 20:00 tl self dla mostres dla Lia Mostra d’Ert-Circolo
La scultures de Martin Demetz dla seria »Scuvrì« ie dedichedes al’azions y tradizions tipiches de Gherdëina. L se trata manco dl’analisa de sënies o rafigurazions bonamënter universeles, ma plu che auter dla pratica cuncreta y dla truepa mudazion, che vën suvënz ascunduda dal dedora, o la pratiches nia tleres, nia trasparëntes y si mpurtanza semantica tla vita culturela, coche ndesfideda zënza fin. L ie n esperimënt de mustré su, cun la tecnica y si mesuns estetics, la dumanda de coche na cultura che vën vivuda da diescmile persones se mantën viva.
Giaurida n vënderdi ai 09.09. dala 20:00 cun ntroduzion de Benjamin Kasslatter y mujiga de Ermes Costa. La mostra resterà davierta nchin ai 25.09., uni di dala 09:00 nchin la 12:00 y dala 16:00 nchin la 19:00.


Na incuntada por festejé i 80 agn
I iubilars nasciüs dl 1942 dla Val Badia organisëia na incuntada por festejé deboriada i 80 agn
Ai 13 de setëmber vëgnel organisé na incuntada por chi dl 1942 dla Val Badia. An se incunta dales 10:30 sön plaza de dlijia a La Ila. La santa mëssa, zelebrada da siur degan Iaco Willeit, vëgn ciantada dai iubilars y mët man dales 10:45. Atira do mëssa vëgnel fat la foto de grup y spo ván düc deboriada al Hotel Miraval, olache al gnará tenü sö na buna marëna. Lois Kastlunger sonará i orghi y düc podará s’la dé buna en compagnia. La festa se stlujará jö incër les 17:00. Le cost dla marëna cun aperitif é de 55,00 euro. Por s’anunzié pon cherdé sö: Erica Kostner (Corvara – Calfosch) 0471 836064; Carlo Peccei (La Ila – San Ciascian) 349 2653128; Carolina Alfreider (Badia) 0471 839 629; Irma Tamers (Al Plan – La Pli) 0474 501119; Ludwig Rungger (Rina – San Martin – Lungiarü – Antermëia) 0474 501353 o 333 2940946.