La Usc di Ladins

Fineles dl Challenger y festa per Seppi
N sada y dumënia semifineles y fineles de singul y dopl a Runcadic. Festa per Andreas Seppi n vënderdi dala 20:30
L turnoi Sparkasse Challenger Val Gardena Südtirol va inant nchin ai 30 de utober: ncuei vënderdi dala 10:00 inant iel i cherc de finela dl singul y la semifinela dl dopl.
Duman sada saràl dala 11:00 inant la semifineles dl singul y da dedò la finela dl dopl cun premiazion. N dumënia pona la finela dl singul dala 11:00.
La chertes de ntreda pòssen cumpré online sot a www.tennis-valgardena.com
Cun na gran festa n unëur de Andreas Seppi uelen ti mbincé dut l bon per l daunì. La festa sarà ncuei vënderdi ai 28 de utober dala 20:30 inant tl zënter dal tennis a Runcadic. L sarà na bela ucajion per festejé y l udëi dal vif y nce per damandé vel’ autograf. Duc ie nviei de cuer.

»I te cumpri jö le nene«
Chësc é le titul dl teater da rí che vëgn porté dant dal »Teater La Pli« chësc altonn. Premiera ai 29 d’otober
Le Teater La Pli á le plajëi da invié ales rapresentaziuns teatrales de chësc altonn. Sön paladina dla Ciasa dles Uniuns vëgnel porté dant le toch da ri »I te cumpri jö le nene«, sot la rejia de Hansi Comploi, che á ince fat la traduziun ladina dal toch original »Der verkaufte Grossvater« de Anton Hamik. Premiera cun renfrësch é en sabeda ai 29.10. dales 20:00, les atres rapresentaziuns é en vëndres ai 04.11 dales 20:00, la domënia ai 06.11. dales 15:00, la sabeda ai 12.11 dales 20:00 y la domënia ai 13.11 dales 15:00. Les chertes pó gní apostades danfora al 389 8158382 y vëgn ince venüdes n’ora dan le teater. Sön paladina jobelnëia Franz Rigo, Raimund Palfrader, Patrick Complojer, Maria Mühlmann, Elmar Winkler, Anna Mühlmann, Evelyn Pedevilla y Patrick Comploi.

»Toc Toc« – teater da rì
La Lia dl Teater de Sëlva nvieia ala reprejentazions dla cumedia »Toc toc« tla Cësa de Cultura te Sëlva. Regia de Igor Demetz
Sies pazienc:tes, uniun cun desturbs y fobies desferëntes, se abina tla sala da aspité de n psicote­rapëut drët cune­sciù. L ie da aspité plu giut, ajache l dutor vën tenì su sun l aeroport. Ntan che Fred à n sindrom de tourette, cumpëida y calculeia Vincent dut; Blanche se tëm da malaties y caidli, cialan che dut sibe steril. Marie muessa pudëi cuntrulé dut, Lili à l viz de dì uni frasa doi iedesc y Anna ne ie nia bona de zapé sëura linies y risses. Danz che ntan che i aspieta l dutor, muessi se lascé tumé ite zeche per se passé l tëmp...
L pez de Laurent Baffie, ciancià tl tudësch da Anna Machinek, vën prejentà tla premiere n sada ai 5 de nuvëmber dala 20:30. Da dedò saràl mo cater reprejentazions, for dala 20:30: n mier­culdi ai 9.11., n vënderdi ai 11.11., n sada ai 12.11. y n merdi ai 15.11. Chertes danora giàpen tl Minishop de Sëlva, 0471 773133 (mé danmesdì).

»Mistiers«: proiet de nrescida de Paolo Vinati
L Istitut Ladin Micurà de Rü à l plajëi de prejenté si ultim proiet de nrescida dal titul »Mistiers«, ai 10 de nuvëmber dala 18:00 tl Istitut Ladin Micurà de Rü te Sëlva
L se trata de films documenteres che dura prësciapuech ot menuc prun y che mostra su de plu erc. I films ie unii tëuc su tla cin’ valedes ladines dl raion ladin dolomitich. I:la prutagunisć:tes conta te si rujeneda dl’oma – l ladin – de si mestier, dla deficulteies y dla sudesfazions abudes, dl svilup y di mudamënc che ie unic dant ti ani te si lëur.
La prejentazion sarà n juebia ai 10.11. dala 18:00 tl Istitut Ladin Micurà de Rü te Sëlva.