Manifestazions atuales

Data

26 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 26 de otober
Teater
Chef a teater
Insnet, vender 26 de otober, te Navalge a Moena da les 20.00 prum apuntament de "Chef a teater" con Moena Perla Alpina, n show cooking ensema a joegn con desabilità de "The Staff". Chesta sera l'é i chef Paolo Donei, Paolo Naccari, Martino Rossi, Alessandro Bellettato e Alessio Rasom. En vender ai 9 de november l'é Nicola Vian.
Rassegna de teater del Comun general de Fascia
Doman, sabeda ai 27 de otober, te chino de Cianacei h. 20.30 "I batadoes de bron" met dant "La storia del sudà". En vender ai 9 de november h. 20.30 te Oratorie de Poza e en domenia ai 11 de november h. 15.30 a La Gran Ciasa de Soraga l spetacol de "INOUT TEAnTER" che portarà dant "L circo di talenc".
"Achtung Deutsch" a S. Cristina
L pez de teater da rì, chëst ann tla rujeneda tudëscia, mparà ite dala Grupa de Teater de S. Cristina sot ala regia de Erich Meraner, sarà mo da udëi duman sada ai 27.10. dala 20.30 y n dumënia ai 28.10. dala 18.00 te sala de Chemun a S. Cristina. Chertes danora pòssen apusté tla Boutique Parisienne, tel. 0471 793334.
"Nia de Parora" - la pasciun a La Val
L'Uniun Teater La Val adöm al Cor de Dlijia da La Val porta sön paladina la storia dla Pasciun de Gejú, cun situaziuns y personaji dal stamp modern. Les rapresentaziuns é te dlijia da La Val, ciamó indoman sabeda ai 27/10 dales 20:00 y en domënia ai 28/10 dales 16:00. I posć n'é nia numerá. Les chertes vëgn venüdes n'ora dan les rapresentaziuns. Informaziuns al 333/8236384.

Mujiga
Blues cun Joe Louis Walker
Ncuei vënderdi ai 26.10. a Stanecia tla Cësa de Cultura dala 20.30. La lijënda dl US-Blues per l prim iede te Südtirol. L ie la nuet dl Blues de Steinegg Live cun ghesć coche Nik Lee & The Jingle Fellas, Marco Pandolfi. Chertes: te duta la Casses Raiffeisen de Südtirol, tla butëighes Athesia y online sot a www.ticketone.it.
Windkraft & I Virtuosi Italiani cun Erika Mussner y Priska Malsiner
N juebia ai 8.11. dala 20.30 tla dlieja de Sëlva saràl l cunzert di Jëuni de Mujiga de Gherdëina, ulache la doi ciantarines solistes de Gherdëina cianterà cun l ensemble de mujiga nueva y l'urchestra de mujiga da camera.
Conzert del Cor Valfassa
Doman, sabeda ai 27 de otober, al Palaz polifunzionèl de Condino da les 21.00, l Cor Valfassa tol pèrt a la 11^ rassegna "Uton en Cor" ensema al Cor Valchiese e al Cor Lago di Tenno.
Finela dl festival "Steinegg live"
Ai 27.10. dala 20.30 tla Cësa de Cultura cun la doi grupes de cësa "VinoRosso" y "The Fonzies" de Bulsan y ala fin mo cun DJ Peter dla ex Eule. Unide a ve devertì, la ntreda ie debant.

Temp lede
Jon a Gardaland
N mierculdi ai 31.10. cun i jëuni dl "Saut". Pion via dala 13.00 te Sëlva y fermon damprò ora. Da paië it iel 50,00 €. Tl priesc iel laite la ntreda y l viac. Pudëis ve lascé nuté su diretamënter tl local di jëuni Saut a Urtijëi cherdé su te ufize al 0471 799006 o al 371 3164572. Nviei ie duc i jëuni dala scola mesana inant.
Törggelen cun i Jëuni dla Lia da Mont y i Jëuni de Sëlva
Nvion bele śën al Törggelen urmei cunesciù n sada ai 10.11. S'ancunton dala 18.00 dala Betula a n aperitif y furnon cun la curiera de linia dala 19.30 ora Solaion per jì dal Putzerhof. Dala 1.00 uniràl i taxi a nes menerà, chiche uel a Laion al Schmierberball, o de reviers te Gherdëina. Per chëi che vën cun diendl o brea de pel iel da paië 35 € per la cëina cun vin y ega y taxi, per i autri 40 €. Pudëis ve scrì su da Daniel (3339454642) o Karin (3924387958) o da zachei di doi cunsëies nchin ai 7.11..
Domisde cun jüc da mësa
La Biblioteca Sas dla Crusc inviëia a n domisdé d'aorela cörta cun jüc por döta la familia, deboriada cun le Spieleverein Dinx. An s'incunta en jöbia ai 8 de novëmber dales 15.00 ales 17.00, te biblioteca a La Ila.

Chino
Chino de Tieser
Insnet, vender ai 26 de otober e sabeda ai 27 h. 21.15 e domenia ai 28 h. 20.30 vegn moscià "Halloween". Doman, sabeda ai 27 de otober, h. 17.30 se pel veder "L'ape Maia, le olimpiadi di miele". En mercol ai 31 h. 17.30 e 21.15 vegn moscià "Piccoli brividi 2, i fantasmi di Halloween", en jebia al prum de november h. 18.00 vegn dat "Zanna Bianca" e h. 21.15 "Piccoli brividi 2", en vender ai 2 h. 17.30 "Zanna Bianca" e h. 21.15 "Ti presento Sofia".
Chino de Pardac
Insnet, vender ai 26 de otober h. 21.15 vegn moscià "Venom", sabeda ai 27 h. 17.00 vegn dat "Small Foot, Amico delle nevi" e h. 21.15 "Venom"; en mèrtesc ai 30 e en mercol ai 31 h. 21.15 vegn moscià "Slender Man", en jebia al prum e en vender 2 de november h. 21.15 se pel veder "La casa dei libri".

Sozial
Portel de referiment sozièl
Ogne mercol da les 16:00 a les 18:00 te strèda di Pré de Lejia a Sèn Jan per endrez del Comun general de Fascia vegn metù a jir n portel de referiment sozièl avert a duc e no a paament. Ge vel se prenotèr. Per aer informazions chiamèr l 370.3004296 o scriver a sportello.lerais@gmail.com
Scontrèdes del DSA Trentin
L DSA (Desturbes Spezifics de l'Aprendiment) de Fiem e Fascia endreza n'outa al meis scontrèdes de aprofondiment sun empedimenc spezifics de l'aprendiment. Ai 7 de november la pedagogista Sonia Boschetto rejonarà del Pian Didatich Personalisà te la sala Spazio Giovani de la Scola populèra de Pardac.

Prejentazions
Di dla biblioteches – Autores jëunes se prejënta
N vënderdi ai 26.10. dala 20.30 tla Bibliotech S. Durich a Urtijëi. Nadia Rungger, Nadia Unterfrauner, Magdalena Ferdigg, Carmen Ramoser, Anna Maria Parteli: cin autores de Südtirol, te chëles che la pascion per l scrì ie rujënt sciche na lum tl scur, lijerà dant ntan na sëira cun mujiga ora de si libri y scric.
Nadia Rungger tla Biblioteca Tessmann
N sada ai 27.10. dala 20.00 tla biblioteca Tessmann a Bulsan, lijerà dant la trëi autores jëunes Nadia Rungger, Eva Aichner y Tanja Raichs, y s'la cunterà tl „Forum Literatur" cun l moderadëur Christoph Pichler. L "Di dla Biblioteches" scumëncia bele dala 18.30 cun mujiga gipsy, jazz, Balkan y Oberkrain. La ntreda ie debant.

Radio y Televijion
Programazion ladina sul canal 642 e TV Ladina
Sul canal de la mendranzes linguistiches TML (642) ogne sabeda taca la neva programazion ladina de la setemèna, organisèda te bloches de zirca 3 ores che se enterza a la programazion per mochen e cimbro e la pea via con chisc oraries: de sabeda h. 7.00 e 17.15; de domenia h. 10.30 e 21.00; de lunesc e de jebia h. 14.00 e 21.00; de mèrtesc e vender h. 10.30 e 17.30; de mercol h. 7.00 e 14.00.
Duc i dis da les 7.00 per mesora l'é programes per ladin col TG Ladin, l program istituzionèl del Comun general "Da Fascia en curt" e dapò i spezièi de l'Aisciuda Ladina di egn passé e la neves da La Usc di Ladins.
Da les 7.45 l'é l program per i bec con la contìes animèdes de Pororo e l Contacontìes per endrez de l'Istitut Cultural Ladin; da les 9.00 l'é i TG per ladin, mochen e cimbro; da les 12.30 l'é "Da Fascia en curt" e dò n curt spezièl sui bai di Schuhplattler e amò l TG Ladin; h. 14.00 l'é amò i spezièi curc su l'Aisciuda Ladina e dò i dessegnes animé de Pororo; h. 17.15 Contacontìes e Pororo e h. 19.30 endò TG Ladin, Contacontìes, Pororo, Da Fascia en curt e h. 22.30 amò l TG Ladin.
RADIO
"LADINIA LIVE": Microfons davierc sun atualità y cultura
La trasmiscion ie da audì uni merdi y mierculdi dala 13:45 ala 14:00 sun la frecuenzes de RAI LADINIA
Mertesc, 30 de otober dala 13:45 - Mostra Gran Vera te Fodom sul jouf de Pordoi
La sociazion storico-culturèla Col de Lana à endrezà dal 2015 enscin al 2018 na mostra dintornvìa la Gran Vera sul jouf de Pordoi. Aldò di bogn ejic arjonc la é dò che la chier n post nef ajache l zenter Cai vegnarà trat jù. En rejonon col president Valerio Troi. Conduzion Anna Mazzel.
La trasmiscion "DAI CRËPS DL SELA" ie da audì uni di dala 19:05 ala 19:30 sun la frecuënzes de RAI LADINIA
Vender, 26 de otober - Nosta pitla ferata de Gherdëina
Sun scumenciadiva dla „Lia per Cultura y Usanzes" de Sëlva iel unì metù su set tofles dlongia l troi dla ferata ite. Sun chësta tofles iel da udëi na gran fotografia y leprò iel da liejer n valguna nfurmazions sun la ferata de Gherdëina. La parola ti vën data al presidënt Urban Mussner, al'assessëura Marta Senoner y Pauli Senoner. Trasmiscion de Alex Runggaldier.
Domenia, 28 de otober - La devozion ala Madona
Tla trasmiscion ora dla lingia "Vita y usanzes da zacan te nosta valedes ladines" vëniel tratà doi argumënc religëusc. Tl prim vala dla festes dla Madona che vën tenides via per l ann y dla dlieja de Sëlva dedicheda ala Madona dl Aiut, daldò nes conta Marta zeche sun l santuar de Maria Weissenstein, l majer y plu cunesciù de nosta provinzia, y de coche l univa jit n pelegrinasc. Ëila nes conta na sperienza persunela, vivuda nstëssa, scialdi nteressanta da scuté su. Program de Georg Mussner.
Mercui, 31 de otober - Lyrischer Wille: poejies te na sozietà multilinguala
"La volontà tegn sù l mond", con chest titol se averc la paroles dantfora del liber- projet „Lyrischer Wille" che se à metù dant de dèr ousc a la poejìa te na sozietà multilinguala olache emozions e sensazions sotes vegn utèdes te lengac desferenc tres traduzions o interpretazions te de più lengac dal albaneis al arab, finlandeis, talian, dialec todesc e ladin.
Program de Anna Mazzel.
TELEVIJION
Mertesc, 30 de otober dala 20:50 - Cult rituai da inier y incö: San Linêrt
N sant conesciü dantadöt tl raiun todësch mo veneré ince a Badia sciöche secunt patron dla dlijia. Da vint agn incá vëgnel implü ciamó tigní le rait de San Linert, che chërda adalerch apascioná di ciavai da dalunc y da daimpró. Program de Daria Valentin y Hanspeter Karbon, a cura de Alessandro Dapunt.
Mercui, 31 de otober dala 20:50 - Trail spezial
60 ani Museum Gherdëina. A cura de Alexia Grossi.
Juebia, 01 de novëmber dala 20:50 - Scenar ert y cultura
Walter Riz à n raport intuitif cun i culëures. Ti cialan pro vëniel ora dut si bujën de depënjer a na maniera mpulsiva. L moler fascian se dà ju cun culëures a uele y a ega, ti jan do a si mudiei preferii: i medei da mont arsii tla cuntreda svanidlënta. Jessica Noflaner y si pere Uli tën inant na tradizion nraviseda te nosc artejanat artistich. Tramedoi ie nduradëures, mestier pratigà mé plu da puec tla Ladinia. Jessica nes porta nsci te n "mond d'or", nes spiegan la tecniches dl nduré. Program de Ivan Senoner y Hanspeter Karbon. A cura de Leo Senoner.

Informaziuns plü menüdes söi programs radio y televijion de RAI Ladinia pôn ciafè sön www.raibz.rai.it – Sun l medem sit i programes TV sarà da vedei sota "Mediateca" y les trasmiscions radio sota "Podcast".

Dotors y Apoteches
Dotors
L dutor de servisc te Gherdëina da n sada ai 27.10. dala 8.00 daduman nchin la 8.00 daduman de n lunesc ai 29.10. ie la duturëssa Micoli Barbara de Sëlva, streda Nives 2, tel. 351 5544347.
Doturs Val Badia: Le dotur en sorvisc tl fin dl'edema di 27 y 28 d'otober, ti cin' comuns dla Val Badia, é le dotur Edoardo Agreiter, San Martin de Tor, tel. 0474/523315 o 333/1380852. Sura la festa de Gnissant sarál en sorvisc le dotur Alberto Caretta, Badia, tel. 0471/839706 o 380/3161999.
Apoteches
L'apoteca che ie de servisc per Gherdëina, ora dl orar ordiner de giaurida, da n vënderdi ai 26.10. nchin n vënderdi ai 2.11. ie chëla de Sëuc, tel. 0471/708970 (orar de giaurida lu-ve 8.30-12.30/15.00-19.00, sada 8.30/12.30. Turnus: 9.00-12.00).
L'apoteca en sorvisc tla Val Badia, fora dl orar ordinar, dal vëndres ai 26 d'otober dales 19:00 al vëndres ai 2 de novëmber ales 19:00, é chëra da La Ila, tel. 0471/847152.

Cursc
Café leterer per nglëisc
N mierculdi ai 31.10. dala 9.30 nchin la 11.00 tla Bibliotech San Durich a Urtijëi. S'la ciaculé per nglëisc pra n tòch de tëurta y n bon café. Cun Edmund Dellago. N ne à nia drë de se lascé nuté su.
Curs de cujiné
Cun Rudi Pescosta tl restaurant Concordia a Urtijëi. Davia che tl prim curs ne n'iel nia plu lerch, à l KVW de Urtijëi fat ora de n fé mo n segondo y chësc sarà ai 13., 14. y 15.11.. L scumëncia for dala 8 da sëira y uni sëira mpèren a fé n menù da 4 derzedes. Da paië ite iel 90 € y se scrì ite pòssen nchin ai 7.11. da Paul Walpoth, tel. 339 4800706. L possa fé pea al plu 15 persones.
Curs dla Crëusc Cuecena per ulenteres nueves
Es'a ueia de fé zeche per la cumenanza? Te savëssel pa bel a mparé truep sun l prim aiut y fé esperienza sun n'ambulanza? Pona vië a fé pea l curs per deventé n ulenter dla Crëusc Cuecena, n mierculdi ai 7.11. dala 20.00 tla sënta nueva a S. Cristina. L curs ie 2 iedesc al'ena y dura n mëns. Per nfurmazions cherdé su Erwin Moroder, tel. 3271803739. Per se scrì ite al curs jì sun www.gaia.cri.it.
Varì cun mitli naturei, per duta la familia
Curé nsferdides, tos y mel de col cun triaches o compresses, te chësc cajo cun uelesc eterics o roba da maië che n à te cësa. N lunesc ai 5.11. dala 19.30 tla cësadafuech dla NJGherdëina a Urtijëi, cun Karin Planker, nfermiera y pedagoga de ierbes de medejina. Priesc 15 €. N possa se scrì ite nchin ai 3.11. cherdan su l 0471 799006 o scrijan a info@njg.it. L possa fé pea al plu 15 persones. L curs ie per peresc y umans y nteressei.
Cosmetica naturela
Cun materiai naturei féjen cremes per i piesc, per i slefs y chëla tan prijeda de calendula, dut zënza chimica. Duc puderà se tò pea a cësa la cremes che i se à fat. N lunesc ai 12.11. dala 19.30 tla cësadafuech dla NJG a Urtijëi, cun Karin Planker, nfermiera y pedagoga de ierbes de medejina. Priesc 15 €. N possa se scrì ite nchin ai 10.11. cherdan su l 0471 799006 o scrijan a info@njg.it. L possa fé pea al plu 10 persones.
Pröm aiüt por mituns y jogn
Indoman sabeda ai 27 d'otober dales 16:30 ales 18:30 él tl zënter Saj.un sö La Ila n domisdé de pröm aiüt por mituns y jogn. Le grup di jogn dla Crusc Blancia Alta Badia mostra ci fá tl caje de emergënza.
Cursc de inglesc
Le KVW de Badia organisëia dui cursc de inglesc por progredis (Intermediate - Preintermediate) cun la prof. Lalena Stull. Ai mët man ai 6 y 8 de novëmber, te biblioteca a Pedraces. Informaziuns y prenotaziuns pro Cristina al nr. 333/1591599.

Mostres y Ert
Mostra "n memoria" dl scultëur Vinzenz Peristi
Chëst ann iel avisa 75 ani ca che l scultëur Vinzenz Peristi ie mort. Per chësta ucajion iel tl Tublà da Nives te Sëlva na mostra n si memoria, che ie da udëi nchin ai 4.11. da merdi nchin dumënia dala 16.00-19.00. De sada y de dumënia iela nce davierta danmesdì dala 10.00-12.00. N Unissant iela stluta.
Luis Piazza y Raimund Mureda
L Museum Gherdëina nvieia a unì a ti cialé ala mostra per i 110 ani dala nasciuda di doi artisć y per i 60 ani dla Lia dl Museum, cun i doi artisć che fova danter i fundadëures. La mostra tla Cësa de Cultura a Urtijëi ie mo da udëi ncuei vënderdi 26.10. dala 10.00-12.00 y 15.00-18.00 y duman sada y n dumënia ai 28.10., ultimo di dla mostra, dala 10.00-12.30.
Ert cuntemporana tla dliejes
Ivan Lardschneider, AliPaloma & Daniele Alessi, Marianna Gostner, Thomas Huck, Giancarlo Lamonaca mët si ert te cin dliejes dla Val dl Isarch: a Ciastel, a Milland, tla dlieja de S. Bastian a Tluses, te chëla de Jevun y de Laion. Tl medemo tëmp iel nce na mostra n chësc cont tl Museum dla zità de Tluses che ie da udëi nchin ai 30.11. da merdi nchin sada.
Fazions de bënulëi
La mostra de pitura "affective effects" di artisć Philipp Messner, Dejan Dukic, Julia Frank y Martina Steckholzer, tla Galaria Ghetta a Puntives Sud 8, cureda da Sabine Gamper, ie da udëi nchin ai 30.11. da merdi nchin vënderdi dala 15.00 ala 18.00 o scenó cherdan su danora l numer 366 1500243.
"act" de Helmar Demetz
La mostra de opres d'ert de Helmar Demetz de S. Cristina ie da udëi nchin ai 1.11. tl Café Surëdl a Urtijëi tla streda Roma, da lunesc nchin sada dala 10 ala 19.
Matthias Sieff a Riva del Garda
L zipiador fascian Matthias Sieff met fora sia operes a Riva del Garda te la Sala Civica "G. Craffonara" Giardini di Porta Orientale. L'esposizion, dal titol "Antichi caratteri contemporanei" resta averta enscin ai 31 de otober, duc i dis h. 10.00-13.30 e 17.00-20.30.
Oraries del Museo Ladin de Fascia
La senta zentrèla del Museo Ladin de Fascia a Sèn Jan resta averta enscin ai 31 de otober, con l'orarie da d'uton: dal mèrtesc a la sabeda da les 15.00 a les 19.00.

Referac
Plantes y ciofs per l'apotech de cësa
N lunesc ai 29.10. dala 20.00 tl local di jëuni Saut a Urtijëi mët la Nëus Jëuni Gherdëina a jì na sëira de nfurmazion cun Karin Planker. Per vel' pitl mel iel saurì avëi te cësa vel' prudot fat cun plantes o ciofs. N mparerà a cunëscer la plantes de medejina plu mpurtantes y coche n possa les mëter n droa per dé n sustëni a nosta sanità y per curé vel' pitla malatia.
Cie adròven pa per scumencé a lauré?
N mierculdi ai 7.11. dala 20.00 tl local di jëuni Saut a Urtijëi. Sëira de nfurmazion per jëuni y nteressei. N cumerzialist dla firma „Kerschbaumer & Niederegger" dijerà cieche n adrova per lauré sot a patron y nce per se mëter per si cont te na pitla mpreja. L sarà nce doi jëuni che cunterà de si esperienza de mëter su na firma nstësc. Metù a jì dal Servisc Soziel per l proiet "Unì granc".
Sessualité - atramënter!?
Incö vëndres dales 19:30 él tl zënter dla jonëza y dla cultura Saj.un a La Ila na serada olache Tobias Stampfer cunta de süa esperiënza de vita, cun l'acompagnamënt dl psicologh Edmund Senoner.

Iadi, jites y escurscions
Viade a Mantova con la Comunanza Ladina de Bulsan
En domenia ai 28 de otober 2018, con partenza da les 7:30 da la senta dla Comunanza Ladina tla streda Roen nr. 6. Iade cultural y recreatif tla zité vedla UNESCO.
Prenotazions y ifnormazions pro: tel. 0471 983687 o 346-3520845 (Ivan Lezuo) da mesdí o do les set da sera.

Sport
Garejeda de sauté tl luech
N dumënia ai 28.10. dala 11.00 sun Pitla Plaza S. Antone a Urtijëi. I Gherdëina Runners mët a jì la ultima garejeda de paesc da chëst ann, dla lingia "VSS Stadt- und Dorfläufe". Pra la premiazion uniràl nce premià i miëures de duta la sajon. L se trata de na garejeda per mutons y per granc.

Avisc
Per duta la lies de Gherdëina
La Consulta per la Ntegrazion de Gherdëina y l Servisc Furmazion mët adum n database de duta la lies de Gherdëina, sibe cultureles che sportives, sozieles y n.i. L database da cunsulté unirà metù online tl portal www.manif.it y l unirà nce stampà. Duta la lies ie bele unides cuntatedes per e-mail. Sce vel' lia ne ëssa nia giapà la e-mail, iela prieda bel de cuntaté l Servisc Furmazion per dé ju si dac: tel. 0471 773225, e-mail furmazion.gh@micura.it.
Udiënzes dla Uniun di Ostis
La Uniun di Ostis HGV tëgn udiënzes ince tla Val Badia, vigni secundo y cuarto lönesc dl mëis, dales 16.00 ales 17.00 tla ciasa de Comun a Badia.
L'Ofize de "Ëres dëida Ëres"
L'ofize a Bornech é da ciafé tla str. Paul von Sternbach nr. 6, info.bruneck@frauenhelfenfrauen.it. Al é davert dal lönesc al vëndres dales 8.30 ales 11.30. Fora de chësc orar, vëgnel tut sö termins sön prenotaziun. Tel. 0474/410303.
Iniziativa di ëi de Puster - MIP
L'ofize dla MIP - Männerinitiative Pustertal é da ciafé tl Paternsteig nr. 1 a Bornech, info@mip-pustertal.it. I orars é lönesc 14-19h, mercui 14-19h y vëndres 8-12h, telefon: 0474/555848. La lia dëida i ëi y peri pro caje de devorz, pîta aiüt por ciafé na soluziun te situaziuns de dificolté.
Berlichete, jeghes per bec
L'Ofize Servijes linguistics e culturèi del Comun general de Fascia endreza con Marabeo Lab l projet Berlichete, cater domesdì de laboratories per bec. Ai 9, 16, 23 e 30 de november da les 16.00 a les 18.00 te sala grana del CGF. Iscrizions dant dai 6 de november al numer 0462/764500.
Corsc de ingleis
La Biblioteca de Sèn Jan endreza corsc de ingleis dai 29 de otober ai 28 de november. La lezions sarà de lunesc e de mercol: h. 19.00-20.30 l cors per prinzipianc e h. 20.30-22.00 l cors mesan. L cost l'é 70 euro per i sentadins de Sèn Jan e 90 per i etres. Info te biblioteca, tel. 0462.763062, mail: vigodifassa@biblio.infotn.it.
Festa con Bambi
Doman, sabeda ai 27 de otober te piaz de Comun a Poza, con scomenz da les 14.00, la sociazion Bambi endreza la festa d'uton, n domesdì en legreza con jeghes, pan e liènies e castagnes con tè ciaut. Se fossa catitemp la festa vegn fata te Oratorie.

Segres y festes
Bal dla Jonëza da Paur de Badia
Indoman sabeda ai 27 d'otober dales 20:30 inant, tla Ciasa J. B. Runcher a San Linert. Al sona le grup "Wolayersee Echo", mo al sonará y ciantará ince Melissa Naschenweng dl'Austria. Por i jogn sarál Dj Elf che mët sö de bela musiga. Al é incé la poscibilité da gní a cëna. Por resservé na mësa, pón cherdé sö Verena al nr. 346/0102118. Braia de coran y diendl é bëgnodüs.

Galaria retrac