Manifestazions atuales

Data

14 de dezember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 14 de dezember
Dotors y Apoteches
Dotors
L dutor de servisc te Gherdëina da n sada ai 15.12. dala 8.00 daduman nchin la 8.00 daduman de n lunesc ai 17.12. ie la dutor Valentin Tröbinger de Sëlva, tel. 0471/773073 o l 335 6844944.
Doturs Val Badia: Le dotur en sorvisc tl fin dl'edema di 15 y 16 de dezëmber, ti comuns de Corvara, Badia y La Val, é le dotur Letterio Taormina, Badia, tel. 375/6261774. Ti comuns de Mareo y San Martin él en sorvisc le dotur Edoardo Agreiter, San Martin de Tor, tel. 0474/523315 o 338/7280518.
Apoteches
L'apoteca che ie de servisc per Gherdëina, ora dl orar ordiner de giaurida, da n vënderdi ai 14.12. nchin n vënderdi ai 21.12. ie chëla de Urtijëi, tel. 0471/796125 (orar de giaurida 9.00-12.00/15.00-19.00).
L'apoteca en sorvisc tla Val Badia, fora dl orar ordinar, dal vëndres ai 14 de dezëmber dales 19:00 al vëndres ai 21 de dezëmber ales 19:00, é chëra da Corvara, tel. 0471/830237.

Chino
LiteraKino da Nadel
N juebia ai 20.12. dala 17.00 nchin la 18.30 tla Bibliotech S. Durich a Urtijëi, proiezion de n film da Nadel per mutans, mutons, jëunes y jëuni.
Chino de Tieser
Insnet, vender ai 14 de dezember h. 21.15, sabeda ai 15 h. 16.00 e 18.00 en 3D e domenia ai 16 h. 17.30 se pel veder "Alpha, un'amicizia forte come la vita"; en sabeda ai 15 h. 21.15, en domenia ai 16 h. 20.30 e en lunesc ai 17 h. 21.15 vegn moscià "Bohemian Rhapsody" di Queen; en mercol ai 19 h. 21.15 vegn moscià "Alla salute" n projet per l 70° de la Declarazion universèla di Deric Umans.
Chino de Pardac
Insnet, vender ai 14 de dezember h. 21.15 se pel veder "La casa delle bambole"; en sabeda ai 15 e en domenia ai 16 h. 21.15 vegn dat "Bohemian Rhapsody".

Cursc
Curs per se njenië ca a parturì
Per ëiles che aspieta y genitores dl daunì, che à l terminn de fauré/merz 2019. L'ancuntedes sarà tla palestra dla cësa de paussa a Urtijëi, dai 7.1.2019 ai 11.2.2019 uni lunesc dala 16.00 ala 18.00/19.00. Iscrizions: CUPP tel. 0471/457457, 8.00-16.00 dal lunesc al vënderdi; email vormerkung.bz@sabes.it; ëifoma 0471/797778, assistënta sanitera tel. 0471/794290.
Curs de pastelné cun Ines
Per mutons dla scoles elementeres, n mierculdi ai 19.12. dala 14.00 tla sala dla NJG a Urtijëi. N fajerà na cripl da Nadel. N scumëncia dala 14.00, ma n possa unì nce mpue plu tert sce n à dant mo vel' lezion o auter. Da paië ite iel 10 € y da se scrì ite iel tl ufize dla NJG, tel. 0471 799006.

Viadi y jites
A Desproch cun l'Uniun Maestri Ladins
En sabeda ai 29 de dezëmber vá l'UML al Landestheater de Desproch a ti ciaré al teater musical Carmen. Orars dl bus: 13:00 a Corvara (Kostner), 13:10 La Ila, 13:15 Pedraces, 13:25 Pidrô, 13:35 Picolin, 13:45 Longega. Cost: 45,00€ por iscric y 55,00€ por i atri. Prenotaziuns anter i 14 de dezëmber pro Ubi al 0471/839174 (da sëra), tres whatsapp al 338/3462087 o e-mail pro ubivalentini@yahoo.it.

Teater
Rassegna de teater
Insnet vender ai 14 de dezember h. 20.30 te Oratorie de Moena e en domenia ai 16 h. 15.30 al Paladolomites de Ciampestrin la sociazion "Antermoa" porta dant l toch de teater "Vijita de condolianzes".
A teater coi Bontemponi
En lunesc ai 17 e en jebia ai 20 de dezember da les 20.30 te Oratorie de Poza e en sabeda ai 22 da la medema ora te La Gran Ciasa a Soraga, i Bontemponi porta dant la comedia "Le ciampane de la sabeda sènta".

Prejentazions
Prejentazion dl liber "Der verlorene Brief"
Manifestazion da Nadel per mutons n mierculdi ai 19.12. dala 15.00 tla Bibliotech Tresl Gruber a S. Cristina. La autora Ursula Zeller lijerà dant ora de si liber y da dedò puderà duc i mutons fé nstësc na si lëtra persunela a Gejù Bambin.

Radio y Televijion
RADIO
"LADINIA LIVE": Microfons davierc sun atualità y cultura
La trasmiscion ie da audì uni merdi y mierculdi dala 13:45 ala 14:00 sun la frecuenzes de RAI LADINIA
La trasmiscion "DAI CRËPS DL SELA" ie da audì uni di dala 19:05 ala 19:30 sun la frecuënzes de RAI LADINIA
Vender, 14 de dezëmber - L'ega de Plan de Cunfin y l cunliamënt Mont de Pana – Sautria
Dai ani vëniel rujenà dl cunliamënt danter Sautria y Mont de Pana. L chemun de S.Crestina à dit de sci per fé na ferata te chël raion, Ciastel ulëssa alincontra realisé n mplant portamont. Ma l ie mo n problem y chël ie chël dl'ega da bever de Urtijëi. Trasmiscion de Simon Moroder.
Sabeda, 15 de dezëmber - Momënc de vita – intervista a Giovanni Agreiter
Giovanni Agreiter d'Altin é nasciü tl 1927 a La Ila, olache al é chersciü sö te na gran familia. So pere â na siëia a ega y Giovanni se recorda de tan tröp che al gnô sié taies jö Altin. Do la scora elementara é Giovanni jü a fá la scora d'ert a Badia por dui agn alalungia, olache al á imparé da ziplé, da dessigné y le laur da tistler. Tl 1943 é la scora d'ert gnüda stlüta a gauja dla vera y Giovanni instës á messü jí te vera. N program de Erika Castlunger.
Domenia, 16 de dezëmber - Te Stua de Florian Mussner (01)
Mo àl si ncëria tla jonta provinziela, ma de jené fajeral cufer y se n jirà demez dal palaz provinziel a Bulsan. Son jic tla stua dl assessëur ladin Florian Mussner a fé na ciaculeda de si atività ntan chisc 17 ani de vita politica. Trasmiscion de Simon Moroder.
Mercui, 18 de dezëmber - Viac virtuèl e emozionèl
Tel chèder de la setemèna "Enrosadira" endrezèda dal Comun General de Fascia Luisa Bertacco à sport n laboratorie sul viac al feminil e tres la glottodidattica l'à menà l grop te n viac virtuèl e emozionèl.
TELEVIJION
Mertesc, 18 de dezëmber dala 20:50 - Df: Fèr politica per forza, pascion o doer?
Aldidanché la eles les é n grumon te vigni ciamp, mingol de manco l'é la femenes te la politica. Acioche l numer se auze, la Provinzia de Trent à mudà la lege litèla. Per chest, ma no demò, te chesta ultima litazions provinzièles se à metù a la leta de la politica e candidà ben 33 eles de Fascia. Set de chestes conta l'esperienza che les à fat e vèlch pensier dintornvia l fèr politica ativa. Program de Olimpia Rasom, rencurà da Anna Mazzel.
Mercui, 19 de dezëmber dala 20:50 - Cult rituai da inier y incö: Iac dala nëi
La nëi á aldedaincö na gran importanza, dantadöt tla economia dl turism. Nia ma plü la nëi che toma dal cil mo dantadöt chëra tecnica vëgn odüda de bun edl por i tröc miliuns de euro che brodora tles gofes di implantisć. Program de Daria Valentin y Hanspeter Karbon, a cura de Alessandro Dapunt.
Juebia, 20 de dezëmber dala 20:50 - Trail spezial
Les gares de Copa dl Mond tla Ladinia. Trasmiscion de Alexander Stuffer y Armin Moroder.

Informaziuns plü menüdes söi programs radio y televijion de RAI Ladinia pôn ciafè sönwww.raibz.rai.it – Sun l medem sit i programes TV sarà da vedei sota "Mediateca" y les trasmiscions radio sota "Podcast".

Temp lede
Copa dl Mond: premiazion y tré ora i numeri dla libra
Ncuei vënderdi ai 14.12. dala 17.30 sun Plaza S. Antone a Urtijëi saràl la premiazion ufiziela dla garejeda de superG stata n chësc di y l ti unirà sëurandat ai atlec i numeri da pië via l di do tla libra.
Devertimënt ntan i dis de Copa dl Mond sun Plaza Dosses
A S. Cristina vëniel metù a jì ncuei vënderdi y duman sada ai 14. y 15.12. n program cun mujiga y devertimënt dan i do la garejedes cun la "Lucky 17" rock'n roll band, l Greta Marcolongo Quintett, i Red Shoes y l Michela Marinello Quartett, per stlù ju n sada sëira cun na party cun i "Sauguat".
Defileda di tifosi di atlec de Copa dl Mond
N sada ai 15.12. dala 10.45 tres l zënter de S. Cristina saràl la "Fan-Parade" tradiziunela cun la grupes de tifosi y si bandieres, tamburdli, ciampanes y tumbrëtes, che jirà nchin tl raion dl travert ja Ruacia.
L majer puestl
N sada ai 15.12. dala 17.00 sun Pra da Nives dlongia l Marcià da Nadel de Sëlva, uniràl cujinà n grandiscimo puestl. Unide duc a l ciarcë y a ve goder mpue de armunia da Nadel sun l pitl marcià te Sëlva. L sunerà l CDJG Brass Quintett.
Disco magic on ice
Dala 21.00 nchin al 23.00 sun la plaza dala dlacia "Setil" a Urtijëi, n merdi ai 18. y ai 25.12. y n vënderdi ai 4.1.2019.
Copa dl Mond dl'ëiles: tré ora i numeri de garejeda y premiazion
N lunesc ai 17.12. dala 17.45 te Sëlva sun Puent da Mulin uniràl trat ora i numeri per la garejeda de Libra dl di do sun la Saslonch. N merdi ai 18.12. for dala 17.45 te Sëlva, Puent da Mulin, saràl la premiazion dla Libra y n trajerà ora i numeri per l SuperG de n mierculdi dala 11.00.
Festa da Nadé cun le grup "Atmosfera"
En jöbia ai 20 de dezëmber dales 15:30, s'incunta te Raiun Sozial a Picolin le grup de autoaiüt "Atmosfera", por porsones cun problems psichics, acompagné da Irina Tavella y Barbara Rungger. Te chësta incuntada gnarál tigní na picia festa da Nadé. Informaziuns ciafon pro Sabine Rainer al 0474/524519.
Paisc da Nadé a San Ciascian
Pro le Paisc da Nadé vëgnel metü da jí deplü apuntamënc musicai, tres dales 18:00: ai 14 sona n grup de saxofons, ai 16 y ai 21 sonará n grup dla Müjiga da San Ciascian. Implü sarál ai 15 y ai 16 ince valgügn lamas y alpacas da odëi, cun chi che an pó se fá na roda a pe, dales 16:00 inant.
Copa dl Monn de schi a La Ila
Chësc fin dl'edema vëgnel tigní les gares de Copa dl Monn de schi sön la Gran Risa a La Ila. Ai 15 podarán tó pert al'estraziun di petorai, dales 19:00 a La Ila. La domënia ai 16:00 dales 10:00 él spo la pröma manche dl slalom lerch, dales 13:00 la secunda. Le lönesc ai 17 él söl program le gigant paralel, cun start dales 18:15. Program complet sön www.skiworldcup.it
Porvé fora le miú
En domënia ai 16 y en lönesc ai 17 de dezëmber - tres dales 9:30 ales 16:00 án jödapé dla pista Boé a Corvara la poscibilité da porvé fora de vigni sort de atrezadöra da jí cui schi.

Sozial
Portel de referiment sozièl
Ogne mercol da les 16:00 a les 18:00 te Comun general, te strèda di Pré de Lejia a Sèn Jan vegn metù a jir n portel de referiment sozièl, per problemes de dependenzes o de autra sort, avert a duc e no a paament. Ge vel se prenotèr. Per informazions chiamèr l 370.3004296 o scriver a: sportello.lerais@gmail.com.
Scontrèdes del DSA Trentin
L DSA (Desturbes Spezifics de l'Aprendiment) de Fiem e Fascia endreza l'ultima scontrèda de aprofondiment sun empedimenc spezifics de l'aprendiment. En mercol ai 9 de jené da les 20.30 te aula magna del Comun de Pardac Valentina Lucca e Sonia Boschetto rejona de co sostegnir i studenc canche mencia l'autostima.

Avisc
Marcià da Nadel a Urtijëi
L marcià da Nadel a Urtijëi ie daviert via per l'ena dala 16.00 ala 19.00, de sada y dumënia dala 11.00 ala 19.00 nchin ai 6 de jené. Ntan i fins dl'ena dala 11 danmesdì y dala 5 domesdì iel for nce vel' grupa che cianta y sona meludies da Nadel.
Marcià da Nadel a S. Cristina
L marcià da Nadel a S. Cristina pieta inò n program de devertimënt per mutons y families y uni sada y dumënia dala 17.00 iel da audì meludies da Nadel. Daviert iel for dala 10.00 ala 18.30: dai 14. ai 16., dai 21. ai 24. y dai 26. ai 30.12.2018.
Marcià da Nadel te Sëlva
Te Sëlva ie l Marcià da Nadel daviert dai 13. ai 16.12. y dai 21.12. ai 6.1. for domesdì dala 15.00 - 19.00. De sada dala 17.00 saràl tan che for na grupa che cianta o sona.
Segonda estrazion di pesć dla lotaria da Nadel
N dumënia ai 16.12. dala 16.00 sun l Marcià da Nadel a S. Cristina uniràl trat ora per l segondo iede trëi pesć da 1000 € l'un dla lotaria da Nadel metuda a jì dai buteghieres de Gherdëina. L pest unirà mé sëurandat a chëi che ie prejënc iló.
L Museum Gherdëina daviert per la sajon da d'inviern
L Museum a Urtijëi tla Cësa di Ladins gëura per la sajon da d'inviern ai 18.12.; nchin ai 23.12. iel daviert da merdi nchin vënderdi dala 14.00-18.30. Dai 26.12. nchin ai 7.1.2019 saràl daviert uni di dala 10.00-12.30 y dala 14.00-18.30.
Dai 8.1. ai 29.3. saràl inò daviert da merdi nchin vënderdi. Stlut resteràl n Ueia de Nadel y n Nadel y n Ueia dl Ann Nuef y n l Ann Nuef.
Udiënzes dla Uniun di Ostis
La Uniun di Ostis HGV tëgn udiënzes ince tla Val Badia, vigni secundo y cuarto lönesc dl mëis, dales 16.00 ales 17.00 tla ciasa de Comun a Badia.
L'Ofize de "Ëres dëida Ëres"
L'ofize a Bornech é da ciafé tla str. Paul von Sternbach nr. 6, info.bruneck@frauenhelfenfrauen.it. Al é davert dal lönesc al vëndres dales 8.30 ales 11.30. Fora de chësc orar, vëgnel tut sö termins sön prenotaziun. Tel. 0474/410303.
Iniziativa di ëi de Puster - MIP
L'ofize dla MIP - Männerinitiative Pustertal dëida i ëi y peri pro caje de devorz, pîta aiüt por ciafé na soluziun te situaziuns de dificolté. L'ofize é da ciafé tl Paternsteig nr. 1 a Bornech y é davert lönesc 14-19h, mercui 14-19h y vëndres 8-12h, telefon: 0474/555848, info@mip-pustertal.it
Reuniun generala dla Uniun Apicolturs Ladinia
Düc i zidlaés dla Val Badia, scric ite y nia tl'Uniun Apicolturs Ladinia, é dër bel inviá ala festa de Sant Ambroje y reuniun generala dla uniun. La manifestaziun gnará tignida indoman sabeda ai 15 de dezëmber dales 19:00 tl salf dla Cassa Raiffeisen a San Martin de Tor.
Concors de fotografìa per i Mondièi
La sociazion Inout, en colaborazion con l Comitat di Mondièi Junior 2019, endreza l concors de fotografìa "Neif gallery" sul tem "sport e neif te Fascia". Pel tor pèrt duc i pascioné de fotografìa, i miores retrac vegnarà premié e metui fora te na mostra. Manèr i retrac a inoutfassa@gmail.com dant dai 4 de jené del 2019.
Cripeles a Moena
Dai 8 de dezember ai 10 de jené l Grop de Turchia endreza na ventina de cripeles ti ciantons più carateristics de sie raion. La più grana vegn enjignèda te Tobià del Copeto con statues de legn a grandeza naturèla zipièdes da artisć del post.
Cripeles a Vich
Dai 20 de dezember ai 6 de jené fora per l paìsc de Vich e frazions de pel veder passa 30 bela cripeles endrezèdes con materièi desvalives da sociazions e privac de paìsc. En lunesc ai 24 te piaz de Vich da les 21.00 se pel scutèr la musega da Nadèl e da mesanet l'é la messa te la Pieif.
A Trent l liber de Alberta Rossi
En mèrtesc ai 18 de dezember da les 17.00 aló dal Spazie Alpin de la Biblioteca de la Mont SAT te strèda Manci 57 a Trent vegn prejentà l liber de Alberta Rossi "La valle di Fassa tra fantasia e realtà" con la musega pop e jazz del grop "3D Family Project" e l laboratorie creatif con Elena Corradini.
Marcià da Nadèl a Ciampedel
Te picola ciasetes de legn te piaz de Ciampedel se pel troèr manufac, magnadiva, prodoc artistics e de artejanat. L marcià da Nadèl é avert ai 15 e ai 16 de dezember e dai 22 ai 6 de jené da les 15.00 a les 19.00.
Pìcol marcià da Nadèl a Vich
Dai 22 ai 28 de dezember da les 15.30 a les 18.30, fora che l dì de Nadèl, l Comitat manifestazions Vich Events endreza te piaz de la scoles "Pìcol, bon e bel" n pìcol marcià da Nadèl con prodoc del post e pìcoi lurieres da Nadèl.
Marcià da Nadèl a Moena
Tel Piaz Perle Alpine te ciasetes de legn tipiches anter picoi feghes empeé per mingol de atmosfera se pel troèr ogec de artejanat e souvenir realisé da jent dal post. L marcià é a la leta dai 22 de dezember ai 6 de jené da les 15.00 a les 19.00.
Ujes averc a la Rosa Bianca
L'Istitut la Rosa Bianca Weisses Rose va inant a se fèr cognoscer a scolees e families. Te la senta de Pardac doman, sabeda ai 15 de dezember, da les 15.00 l'é "Ujes averc" e en mercol ai 19 da les 14.15 vegn endrezà laboratories per i scolees.
Ujes averc a la Scola Ladina
Anché vender ai 14 domesdì, da les 14.00 a les 18.00 e doman, sabeda ai 15 da les 8.00 a les 12.00 e da les 14.00 a les 17.00 tel chèder del projet "Ujes averc" scolees e families pel descorir la proponetes didatich-formatives de la Scola Ladina te la sentes di Licees Artistich, Scientifich e Ladin di Lengac a Sèn Jan.

Sport
Turnoi de tennis ITF dl'ëiles
Da duman sada ai 15.12. nchin ai 22.12. uniràl jugà tl zënter dal tennis a Runcadic/Urtijëi per l turnoi nternaziunel dl'ëiles da 15.000 $. N sada y dumënia saràl la partides de cualificazion y da n lunesc scumenceràn cun l tabelon prinzipel. La partides ie bele danmesdì y dala 18.00 inant saràl for partides mpurtantes. La ntreda ie debant.
SuperG y Libra de Copa dl Mond dl'ëiles
N merdi ai 18.12. dala 12.30 pierà via la atletes sun l purtoi dla Saslonch per la garejeda de libra. La premiazion sarà dala 17.45 sun Puent da Mulin te Sëlva, ulache l unirà nce trat ora i numeri per la garejeda de SuperG dl di do. N mierculdi ai 19.12. dala 11.00 uniràl pià via per la garejeda de SuperG.
Partides de hockey dl HC Gherdëina
N sada ai 22.12. dala 20.30 tl stadio Pranives de Sëlva jugherà l HC Gherdëina contra l Renon.
"Christmas on Ice"
N juebia ai 27.12. dala 21.00 tl stadio de Sëlva cun la stëila dl jadiné Carolina Kostner y d'autri atlec de livel nternaziunel coche l pèr jëunn de jadiné Manuel Piazza de Urtijëi y Alyssa Montan, l pèr Sara Campanini y Francesco Riva y i jëuni Gabriele Frangipani, Lara Naki Gutmann y Maurizio Zandron, la grupa de jadiné sincronisà "Ice Angels" dla Val Badia y la mutans dl Eisclub mustrerà ënghe vel' bal. Chertes danora giàpen tla trëi Lies dl Turism de Gherdëina.
Plaza dala dlacia Setil davierta
La plaza dala dlacia Setil a Urtijëi ie inò davierta y chël uni di dala 9.30 ala 12.00 y dala 14.00 ala 18.00, nchin ala fin de fauré 2019. Tlo giàpen nce i jadins da se mpresté ora.

Musiga
Conzert da Nadèl con la Musega
La Musega da Vich endreza l conzert da Nadèl doman, sabeda ai 15 de dezember, da les 21.00 te la ex sala de Comun de Vich.
Conzert da Nadé dla Scora de Musiga Val Badia
En mercui ai 19 de dezëmber dales 18:00, te dlijia a San Linert. Al gnará porté dant cianties y melodies dales scolares y dai scolars dla Scora de Musiga dla Val Badia.
Conzert de Nadèl con l Pentagramma
La scola de musega "Il Pentagramma" endreza en domenia ai 23 de dezember da les 21.00 te la Pieif de Ciavaleis l conzert de Nadèl. Vegn tout sù bonamans per la restruturazion de la gejia dessatèda da n mèl de fech del 2003. Tol pèrt i Cores Note Blu e Pentagramma Young Singers e l grop de musega Pentragramma Strings.
Conzert da Nadèl a Cianacei
En vender ai 21 de dezember da les 9 da sera te gejia del Sacro Cher a Cianacei gran conzert da Nadèl con la Musega Auta Fascia, i Cores de gejia de Dèlba, de Cianacei e de Ciampedel e l Cor di bec de Cianacei e Dèlba.
Meludies d'Avënt sun l Marcià da Nadel a S. Cristina
N dumënia ai 16.12 dala 17.00 ala 18.00 cianterà la grupa Helios. N sada ai 22.12. for dala medema ëura cianterà l Cor di sculeies de S. Cristina y n dumënia ai 23.12. sunerà o corni da mont Ladinia.
Meludies d'Avënt sun l Marcià da Nadel a Urtijëi
N sada ai 15.12. dala 11.00 suneràl i sculeies dla Scola de Mujiga y dala 17.00 l campion dl mond de armonica Mattia Demetz, che sunerà sun Plaza Stetteneck. N dumënia ai 16.12. dala 11.00 saràl da audì l duo "Victor y Paolo" cun l "Dudelsack" y dala 17.00 l Cor dl'ëiles sun Plaza Stetteneck.
Meludies d'Avënt sun l Marcià da Nadel te Sëlva
Dala 17.00 nchin la 18.00 puderàn scuté su: n sada ai 15.12. la meludies sunedes dal CDGJ Brass Quintett; la sada do ai 22.12. i Hosianna y n dumënia ai 23.12. cianterà la grupa "De Cater".
Conzert d'Advënt a Rina: "Daurí mi cör"
En domënia ai 16 de dezëmber dales 16:00, te dlijia da Rina. Al sará da aldí n grup de stromënc dla Musiga da Rina, le Cor de mituns dla scora da Rina, le Cor de Dlijia da Rina, le Cor Col dla Vedla da Rina y le grup "Mosaic" d'Al Plan. Düc canc é bel inviá.

Mostres y Ert
Mostra a la galarìa TAN-ART
Doman, sabeda ai 15 de dezember da les 18.30 vegn orì la neva mostra a la galarìa TAN-ART de Cianacei: "L Trentin-Sudtirol e si artisć". Na ocajion ence per fèr n bel don da Nadèl. La galarìa é te Chieva, te strèda Roma 66. La mostra é averta duc i dis fora che l lunesc da les 10.30 a les 12.30 e da les 16.00 a les 19.30.
Mostres de Bosisio y Cremonini
Ncuei vënderdi ai 14.12. dala 19.00 tla Galaria Doris Ghetta a Puntives Sud vëniel giaurì la mostra dal titul "Bewohnt" de Robert Bosisio y la mostra dal titul "Limbo" de Rudy Cremonini. Tramedoi mostres ie curedes da Sabine Gamper y sarà da udëi nchin ai 28 de fauré 2019.
Mostra de criples tl Museum Gherdëina
Dai 18.12. ai 2.2. iel da udëi criples storiches y mandli dla cripl dl 17-19ejim secul. Sce la prima criples de Gherdëina fova ti prim ani dl '700 mo metudes adum da puec pec, unìveles cun l passé di ani for plu riches y cumpletes. Nchin ai 23.12. ie l Museum daviert da merdi nchin vënderdi dala 14.00-18.30. Tl tëmp da Nadel saràl daviert uni di.
Roba da fé damat de Gherdëina y dla Ruscia
Tla sala Luis Trenker tla Cësa de Cultura de Urtijëi iel da udëi la mostra "juech - ert", ulache n mët a cunfront la vedla roba da fé damat russa cun chëla de Gherdëina. La mostra ie da udëi nchin ai 16.1. da lunesc nchin vënderdi dala 16.00-19.00, de dumënia y dis de festa dala 11.00-19.00. Ntreda debant.

Segres y festes
Festa da Nadel dla Comunanza Ladina a Bulsan
La Comunanza Ladina a Bulsan enviëia a la Festa da Nadel tradizionala, en mertesc ai 18 de dezember 2018, da les 6 da seira inant, tla Ciasa di ladins, Streda Novacella 1.

Galaria retrac