Manifestazions atuales speziales

Data

14 de dezember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 14 de dezember
Sommelier sön pista
Do le gran suzes di ultims inverns, vëgnel metü da jí ince en chësc ann sön les pistes dl'Alta Badia l'iniziativa Sommelier sön pista, che valorisëia y fej conësce i mius vins de Südtirol
Indöt sarál sis apuntamënc: ai 18 de dezëmber, ai 15 y 29 de jená, ai 5 y 19 de forá y l'ultim iade ai 12 de merz. An s'incunta dales 13:30 por jí cun i schi tl comprensor dl'Alta Badia, acompagná da n maester de schi, che dará ince val' consëi sön la tecnica dl jí cui schi. Tratan le domisdé storjon pro te trëi üties che tol pert al'iniziativa, olache al gnará ciarcé i mius vins de Südtirol adöm cun n sommelier. Le sommelier spligará les carateristiches di vins che vëgn ciarciá. La manifestaziun vëgn metüda da jí da Alta Badia Brand en colaboraziun cun le Consorz di Vins de Südtirol y l'Assoziaziun di Sommelier de Südtirol. Por tó pert mësson se scrí ite pro öna dles Assoziaziuns Turistiches dl'Alta Badia al prisc de 30,00€ a porsona.

Altissimo - le brunch da stëres
En lönesc ai 17 de dezëmber vëgnel metü da jí por le pröm iade la manifestaziun "Altissimo", le brunch cun i coghi da stëres dl'Alta Badia, pro la ütia Club Moritzino al Piz La Ila
I coghi Norbert Niederkofler*** dl restorant St. Hubertus - hotel Rosa Alpina, Matteo Metullio** dl restorant La Siriola - hotel Ciasa Salares y Nicola Laera* dl restorant La Stüa de Michil - hotel La Perla y Marco Spinelli dla ütia Club Moritzino arjignará ca de vigni sort de spezialités gastronomiches por le brunch, che mët man dales 11:00. Implü podarán tratan le de ince ciarcé de vigni sort de produc de cualité presentá da sü produturs, y i partezipanc pó jí cun i schi cun i atlec de Copa dl monn da n iade Manuela Mölgg, Peter Runggaldier y Max Blardone. Deplü informaziuns y les chertes por le brunch ciafon ti ofizi turistics dl'Alta Badia.

Cujiné spezialités da Nadé
Ai 21 de dezëmber n curs cun le cogo Andrea Irsara
Sce an pënsa ala gastronomia tratan le tëmp d'Advënt y da Nadé, spo tomel ite atira i biscoti, che vëgn arjigná ca te vigni ciasa da pici y gragn. Mo al esist ince tröpes d'atres spezialités gastronomiches liades al Nadé. De ci spezialités che al se trata y co che an fej da les arjigné ca pón imparé tratan le curs da cujiné metü da jí dal'Assoziaziun Turistica de Badia cun le cogo Andrea Irsara. Le curs vëgn tigní en vëindres ai 21 de dezëmber dales 15:00 tl hotel Gran Ander a Badia. Prenotaziuns anter le de denant te un di ofizi turistics dl'Alta Badia.

Le Marcé da Nadé a Corvara
Ai 14 de dezëmber deura indô le Marcé da Nadé sön plaza de Comun a Corvara
Tles piceres ciasotes vëgnel venü de vigni sort de patüc da Nadé, sciöche articui de artejanat, decoraziuns da Nadé o ince spezialités y produc dl post. Al ne manciará sambëgn nia n bun tê cialt o n gote de vin cöt. La cripele en grandëza naturala, metüda sö sön paiun i fajará da cornisc al pice marcé. La sabeda ai 15 de dezëmber él le cuartet de posaunes "Resonn" che sona dales 17:00 inant. Le marcé resta davert cina la domënia ai 16 de dezëmber tres dales 16:00 ales 19:00. Tratan le tëmp da Nadé gnará spo le marcé daurí ai 22 de dezëmber cina ai 6 de jená.

Cunzert da Nadel
N vënderdi ai 21.12. te dliejia de S. Cristina dala 18.00
Coche uni ann mët la Scola de Mujiga de Gherdëina nce chësc vënderdi che vën a jì l cunzert tradiziunel da Nadel.
Chëst ann iel n cunzert particuler, per lecurdé i 40 ani da canche la Scola de Mujiga de Gherdëina ie unida metuda su.
Per chësta ucajion se àl anjenià ca de plu cores y de plu sunadëures cun d'uni sort de strumënc.
Vel' de nuef che sarà da audì chëst ann ie la grupa che sona la zitra y na grupa che sona l fagot. Duc ie nviei de cuer a unì a scuté su.

Cunzert dl'urchestra Haydn
N lunesc ai 17.12. dala 20.30 te Cësa de Cultura a Urtijëi
Mo dan Nadel iel l cunzert metù ai jì dai Jëuni de Mujiga de Gherdëina cun l'urchestra Haydn de Bulsan y Trënt, che sunerà sot ala bachëta de Benjamin James Bayl. Da audì saràl i pec de Wolfgang A. Mozart "Eine kleine Nachtmusik, K 525" y "Musica di balletto per Idomeneo, K 367", la Sinfonia nr. 8 in do minore de William Herschel y la Sinfonia nr. 88 in sol maggiore Hob. I: 88 de Joseph Haydn.
L'urchestra Haydn de Bulsan y Trënt ie unida metuda su tl 1960 y à sunà tla sales da cunzert plu renumedes de truep paejes dl mond. Si repertore va dala mujiga dl Baroch nchin a chëla de nosc tëmps. Truep cumpositëures à nce ulù che l sibe l'urchstra Haydn a suné la prima reprejentazions di pec che i à scrit y dirighënc coche Claudio Abbado, Riccardo Muti, Eliahu Inbal, Neville Marriner, Daniel Oren, José Serebrier, Jeffrey Tate, Juraj Valčuha, Alberto Zedda y mo d'autri à deriet l'urchestra te si cunzerc.
L cunzert dl'urchestra Haydn ie daniëura n mumënt drët aspità dal publicum de Gherdëina.

"Hüllen-Involucri"
Giaurida dla mostra de Astrid Gamper n vënderdi ai 21.12. dala 20.30 te Tublà da Nives te Sëlva
Astrid Gamper ie de Persenon y à studià grafica y design a Freiburg. Per plu de 15 ani àla laurà a Minca pra Kostas Murkudis y Rena Lange sciche designer y a fé modiei. Ëila à oradechël nce laurà a New York pra Donna Karan. Ruveda de reviers tl'Europa àla giaurì tl 2000 n si atelier a Tluses.
Tl Tublà da Nives mostra Gamper lëures sun papier, che se raida dut ntëur ala pel sciche metafora dla vita te duta si mpurtanza y funzion. La pel nes pieta scunanza y stluj ju nosc vester de viers dl dedora. Ma cie che va "sot ala pel" ne se lascia nia fermé. La pel ie coche n resservar, tlo se abìnel linëus y scur, ciaut y frëit, ujinanza y destanza, ma nce chedri, sentimënc y sëmies. La pel ie na vaina, na tea, n guant y chësc uel Gamper purté sun papier cun truepa finëza ma zënza euforia.
La mostra resterà davierta nchin ai 13 de jené 2019. Nfurmazions plu avisa sot a www.tubladanives.it.

Advënt a Al Plan
Sön plaza dl paiun de paisc gnarál daurí le pice marcé d'Advënt, cun n bel program de cornisc
Inice iniann mët da jí l'Assoziaziun Turistica Al Plan/San Martin le pice marcé d'Advënt, sot al motto dl Advënt a Al Plan. Sön plaza de paiun a Al Plan sarál deplü ciasotes olache an pó cumpré produc artejanai y spëisa da chiló. Le marcé é ciamó davert ai 14 y 15 de dezëmber, ai 21 y 22 y dai 27 ai 30, dagnora dales 17:00 ales 19:30. Vigni de sarál la poscibilité por i mituns da se fá na roda cun i ponys, les sabedes dales 18:00 gnarál cunté stories da Nadé incër le füch.