Manifestazions atuales

Data

08 de fauré 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 8 de fauré
Iadi, jites y escurscions
Viac a Praga cun l KVW
La grupa KVW de Gherdëina fej al savëi che chisc dis vëniel tëut su la iscrizions per l viac dai 25. ai 28.4. tla Republica Ceca, ulache n jirà a vijité la ziteies de Pilsen y de Praga cun si bel ciastel, si plazes y puenc. Sun l viac de ëuta fermeràn a Budweis, drët cunesciuda per l pier. Per nfurmazions o per se scrì ite pòssen cherdé su Emmerich Senoner, tel. 335 5713575.
Cun l KVW a Dresden
Dai 7. ai 10.6. (Pasca de Mei) mët l KVW de Urtijëi a jì n viac a Dresden per jì a ti cialé ala truepa marueies dla zità. N furnerà nce cun la berca sun la Elbe da Dresden a Pillnitz y fajerà na jita tl parch naziunel "Sächsische Schweiz".
L viac ie daviert a duc! Bele śën pòssen apusté l viac da Reziatours a Urtijëi, tel. 0471 798500.

Cuncorsc
Val Gardena Shot of the Year
L Freeride Club Gherdëina mët a jì n contest de fotografia y video, pra chël che duc possa fé pea. L'idea ie scëmpla, jì cun i schi te Gherdëina, fé na bela foto o n video, i mandé ite a www.shotoftheyear.com. Chiche vënc uniràl cris ora da na giuria cun gran esperienza tl freeride y freestyle. L pensier do dut chësc ie che l Freeride Club ulëssa purté chësc sport danter i jëuni, ma nce manco jëuni y ti dé n fruz de mutivation deplù per jì ora danter nosc biei crëps.

Avisc
Dé ite la manifestazions te www.manif.it
L Servisc Furmazion Gherdëina uel lecurdé duta la lies che per publiché la manifestazions de auril, mei, juni y lugio tl "Cudejel dla manifestazions", ieles da dé ite nchin ai 3.3. tl portal www.manif.it. La manifestazions dates ite tl Manif vën nce mandedes inant ai media ladins y nsci dates tres y publichedes plu iedesc. Les ruva nce ite tla plates de chemun sce dates ite per tëmp y ëura. Duta chësta formes de retlam ie debant per la lies, perchël nuzëve de chësc servisc!
Senteda generela dla Lia per Natura y Usanzes
N vënderdi ai 15.2. dala 20.00 tl sotët dla Cësa de Cultura a Urtijëi. Do la prejentazion dl'atività fata cun fotografies y la relazions cun rëndicont de cassa, saràl nce la vela dl cunsëi nuef. Duc i nteressei ie nviei ala sëira y a purté dant minonghes, ideies y prupostes ntan la descuscion.
Di dla porta davierta tl Vinzentinum
N vënderdi ai 15.2. dala 8.30-12.30 y dala 14.00-17.00 y n sada ai 16.2. dala 8.30-12.30 arà sculées y sculeies cun si genitores la puscibltà de vijité, zënza se nunzië danora, l gymnasium y l internat y se nfurmé n cont de cie che l Istitut pieta.
Udiënzes dla Uniun di Ostis
La Uniun di Ostis HGV tëgn udiënzes ince tla Val Badia, vigni secundo y cuarto lönesc dl mëis, dales 16.00 ales 17.00 tla ciasa de Comun a Badia.
L'Ofize de "Ëres dëida Ëres"
L'ofize a Bornech é da ciafé tla str. Paul von Sternbach nr. 6, info.bruneck@frauenhelfenfrauen.it. Al é davert dal lönesc al vëndres dales 8.30 ales 11.30. Fora de chësc orar, vëgnel tut sö termins sön prenotaziun. Tel. 0474/410303.
Iniziativa di ëi de Puster - MIP
L'ofize dla MIP - Männerinitiative Pustertal dëida i ëi y peri pro caje de devorz, pîta aiüt por ciafé na soluziun te situaziuns de dificolté. L'ofize é da ciafé tl Paternsteig nr. 1 a Bornech y é davert lönesc 14-19h, mercui 14-19h y vëndres 8-12h, telefon: 0474/555848, info@mip-pustertal.it
Senteda generala dla Union di Ladins da Persenon
Ai 13 de fauré da les 18:30, tl salf Adrian Egger a Persenon. Dlongia la relazion sun l'ativité 2018, l'aprovazion dl rendicont finanziar y l'aprovazion dl program 2019, gniràl ence lité l diretif nuef y al gnirà tout su les iscrizions a la Union. Dedò pice aperitif y sté adum.
Concors "Cher e talent"
Fin ai 18 de firé se pel se scriver ite al concors giornalistich e fotografich "Cuore e talento" dedicà a la memoria del joen giornalist da Pardac Benjamin Dezulian. Chest an l'é doi categorìes: joegn (14-20 egn) e gregn. Per manèr ite articoi e retrac i enscinué à temp fin ai 17 de mèrz. Info www.cuoretalento.it
Mascherèdes ta Penìa
L Grop de la Mèscres de Dèlba e Penìa à endrezà 2 mascherèdes per chest an da Carnascèr. Doman, sabeda ai 9 de firé te la veia scoles de Penìa h. 20.30 vegn spilenà "Vic e ac te na cèsa de mac" de Stefen Dell'Antonio Monech, che se podarà veder ence ai 5 de mèrz, mèrtesc gras. Ai 28 de firé, jebia grassa, sarà enveze "N pat a vita" de Simon de Giulio.
Premiazion del concors de fotografìa
En sabeda ai 9 de firé da les 4 domesdì te Museo Ladin vegn fat la premiazion di venjidores del concors nazionèl "2019 Photography Contest - Ambient da mont" che à vedù la colaborazion de la Pro Loco de Vich e de l'ICL. Vegn orì ence la mostra con la operes premièdes e na selezion de autres retrac en concors.
Radunanza de la Coprativa de Moena
La Coprativa de Moena chiama ite i sozi per sia radunanza generèla doman, sabeda ai 9 de firé da les 15.00 te teater de l'Oratorie. Vegn portà dant bilanz e atività.
Radunanza Fassa Coop
La Coprativa de Fascia chiama ite i sozi per sia radunanza generèla doman, sabeda ai 9 de firé da les 14.30 te palestra de la scoles mesènes de Sèn Jan. Vegn portà dant l bilanz, renovà la encèries e consegnà l Pest "Fassa".

Chino
Chino de Cianacei
Insnet, vender ai 8 de firé h. 17.15 e 21.15, en sabeda ai 9 h. 21.15, en domenia ai 10 h. 17.15 e amò en mercol ai 13 h. 17.15 vegn moscià l film de animazion "Dragon Trainer". En domenia ai 10 e en mercol ai 13 h. 21.15 "Creed 2"; vender ai 15 e domenia ai 17, h. 21.15, "10 giorni senza mamma".
Chino de Tieser
Insnet, vender ai 8 e doman sabeda ai 9 h. 21.15 e domenia ai 10 h. 20.30 vegn moscià "10 giorni senza mamma", sabeda ai 9 h. 17.30 e domenia ai 10 h. 17.00 l'é "Dragon trainer". Jebia ai 14 h. 21.15 vegn moscià "Van Gogh" e vender ai 15 h. 21.15 "Green Book".
Chino de Pardac
Insnet, vender ai 8 de firé h. 21.15 vegn moscià "Bohemian Rhapsody", sabeda ai 9 h. 17.00 l'é "Remi" e h. 21.15 l'é "Il Corriere, The Mule"; domenia ai 10 h. 15.00 vegn dat "Dragon trainer 3", h. 17.00 "Remi" e h. 21.15 "Il Corriere, The Mule" che vegn moscià ence lunesc ai 11 h. 21.15.
En mercol ai 13 h. 21.00 l'é "La Bibbia riveduta e scorretta" di Oblivion e en jebia ai 14 e vender ai 15 h. 21.15 "Ricomincio da me".

Dotors y Apoteches
Dotors
L dutor de servisc te Gherdëina da n sada ai 9.2. dala 8.00 daduman nchin la 8.00 daduman de n lunesc ai 11.2. ie l dutor Valentin Tröbinger de Sëlva, tel. 0471/773073 o l 335 6844944.
Doturs Val Badia: Ti comuns de Corvara, Badia y La Val él en sorvisc tl fin dl'edema di 9 y 10 de forá le dotur Guido Caretta, Calfosch/Corvara, tel. 0471/836870 o 337/616080. Ti comuns de Mareo y San Martin él en sorvisc le dotur Luca Galiazzo, tel. 342/5181295.
Apoteches
L'apoteca che ie de servisc per Gherdëina, ora dl orar ordiner de giaurida, da n vënderdi ai 8.2. nchin n vënderdi ai 15.2. ie chëla de S. Cristina, tel. 0471/792106 o 333/1776615 (orar de giaurida 8.00-12.00/15.00-19.00).
L'apoteca en sorvisc tla Val Badia, fora dl orar ordinar, dal vëndres ai 8 de forá dales 19:00 al vëndres ai 15 de forá ales 19:00, é chëra da Corvara, tel. 0471/830237.

Cursc
Curs per se njenië ca a parturì
Per ëiles che aspieta y genitores dl daunì, che à l terminn de auril/mei 2019.
L'ancuntedes sarà tla palestra dla cësa de paussa a Urtijëi, dai 4.3. ai 8.4.2019 uni lunesc dala 16.00 ala 18.00/19.00. Iscrizions: CUPP tel. 0471/457457, 8.00-16.00 dal lunesc al vënderdi; email vormerkung.bz@sabes.it; ëifoma 0471/797778, assistënta sanitera 0471/794290.
Introduziun al biatlon
En mercui ai 13 de forá dales 9:30 án a San Ciascian la poscibilité da imparé adöm cun n maester de biatlon les carateristiches de chësta disciplina. Iscriziuns ti ofizi turistics dl'Alta Badia o diretamënter pro le zënter de paslunch Saré a San Ciascian.

Televijion y Radio
RADIO
"LADINIA LIVE": Microfons davierc sun atualità y cultura
La trasmiscion ie da audì uni merdi y mierculdi dala 13:45 ala 14:00 sun la frecuenzes de RAI LADINIA
Mercui, 13 de furá - Presentaziun dl program "La zingaindra"
Ghesc: Iaco Rigo y Ludwig Rindler, moderaziun: Alessandro Dapunt.
La trasmiscion "DAI CRËPS DL SELA" ie da audì uni di dala 19:05 ala 19:30 sun la frecuënzes de RAI LADINIA
Vender, 08 de furá - L pier artejanel for plu atuel
Dal produtëur de pier artejanel Lukas Demetz de S. Cristina se lascions cunté coche ie nasciuda si pascion per fé pier. Audiron nce chiche possa perdrët fé pier aldò dla lege, cieche n adrova tan n cont de materies primes y ciuldì che l pier artejanel ie al mumënt tan de moda. Program de Alex Runggaldier.
Sabeda, 09 de furá - Momënc de vita – intervista a Maria Troi
Maria Troi é nasciüda tl 1933 a Posauz, na fraziun dl comun de Col S. Lizia y tl 1961 s'ára maridé y é jüda a vire a Fosal, olache cun so om àra davert n bar y n restorant. Por tröc agn alalungia âra cujiné te so restorant, n laur che ti á dé tröpa sodesfaziun. Maria nes cunta dla vita a Posauz y de so laur te so restorant. N program de Erika Castlunger.
Domenia, 10 de furá - Marc Senoner - multilinguism
Ël à stlut ju si studi pra l'Università a Dispruch ulache l à tratà l argumënt dl multilinguism te si tesi. Tematica zentrela fova la dinamica che n à a mparé na terza rujeneda da pitli insù y de chësc y d'autri argumënc che à da nfé cun linguistica nes conta Marc zeche plu avisa. Ël ie nseniant de nglëisc tla scola prufesciunela y tl Lizeum de Ert a Urtijëi. Trasmiscion de Sofia Stuflesser.
Lunesc, 11 de furà - Cronometrisć te Gherdëina
Truepa ativiteis sportives depënd dal tëmp. Y minà ne ie tlo nia l tëmp meteorologich, ma chël cronologich. Dlonch ulache i atlec o la scuadres muessa se muserè contra l tëmp, per arjonjer l fin che i se tol dant, chël de vester miëures dl averser, chël de vëncer. Te duta chësta disciplines sportives se damandel perchël nce n cuntrol avisa dl tëmp. Chësta funzion tòl ite i cronometrisć, chëla persones che manejea l tëmp de garejeda. Nce te Gherdëina iel cronometrisć che fej chësc lëur. Ntervista cun Egon Ploner y Emmerich Senoner. Program de Leo Senoner.
Mercui, 13 de furá - Volontariat coi enfughes de la Siria
Testimonianza de Ilaria Bertacco che à fat doi meis de servije zivil europeich te na zità turca anter la jent sciampèda da la Siria. Program de Anna Mazzel.
TELEVIJION
Mertesc, 12 de furá dala 20:50 - Sport ladin magazin sportif dles valades ladines
Program de Diego Clara y Hartmann Mairhofer, a cura de Leo Senoner.
Mercui, 13 de furá dala 20:50 - La zingaindra – opereta ladina
Documentaziun cun pertes filmades y intervistes dala opereta originala ladina scrita da Iaco Rigo, musicada da Ludwig Rindler y che è gnüda rapresentada a La Plì de Mareo tl istè dl 2018. N program de Alessandro Dapunt.
Juebia, 14 de furá dala 20:50 - Nosta scola
Atualità dala scoles dla valedes ladines. Tesć y cunzet de Lena Mulser, camera y tai de Hanspeter Karbon, a cura de Alessandro Dapunt.

Informaziuns plü menüdes söi programs radio y televijion de RAI Ladinia pôn ciafè sön www.raibz.rai.it – Sun l medem sit i programes TV sarà da vedei sota "Mediateca" y les trasmiscions radio sota "Podcast".

Mostres y Ert
N percors sciamanich tel bosch de Beuys
Tel Museo d'Èrt Contemporana de Ciavaleis l'é la mostra "Walking in Beuys woods" rencurèda da Antonella Palladino e Elio Vanzo: n percors de Hannes Egger sul troi de Joseph Bauys, anter om e natura, te n prozess de consaputa e varijon. Averta de sabeda e domenia h. 15.30-19.00.
Cëves de Sergio Sommavilla
N juebia ai 14.2. dala 18.30 per "Kunst im Gange" tla cësa de Chemun a Laion uniràl giaurì la mostra de Sommavilla, che à vivù te Gherdëina y à fat tlo la Scola d'Ert. Bele da n pez se dàl ju cun cëves. Ora dla ideies metudes ju n iede sun papier vëniel a s'l dé, do avëi laurà n struf lessù, nia portrets ma cëves drët fantajiëusc. Ala mostra puderàn jì a ti cialé canche l Chemun ie daviert.
150 ani dala prima arpizeda de Saslonch
Per l'ucajion de chësc anuel saràl da udëi tl raion de jì a pe de Urtijëi, dai 14.2. inant, na mostra de fotografies che à da n fé cun la arpizedes dl Saslonch dal 1869 incà.
Ivan Lardschneider a Lenzerheide
Tla galaria Pesko tla Voa Principala 56 a Lenzerheide tla Svizra iel da udëi na mostra persunela dl'artista scultëur de Sëlva Ivan Lardschneider, ulache l à metù ora vint de si lëures d'ert ziplei tl lën de linda o jetei tl bront. La mostra resterà davierta nchin ai 10 de merz, uni di.
La operes de Schweizer a la galarìa Tanart
En vender ai 15 de firé da les 18.30 a la galarìa Tanart de Cianacei vegn inaugurà la neva mostra de Riccardo Schweizer, pitor e fotograf da Primier, con la partezipazion de Maurizio Scudiero. La mostra é averta dal mèrtesc a la domenia da les 10.30 a les 12.30 e da les 16.00 a les 19.30 fin ai 31 de mèrz.

Temp lede
Domisde cun jüc da mësa
La Biblioteca Sas dla Crusc inviëia a n domisde d'aorela cörta cun jüc por döta la familia, deboriada cun le Spieleverein Dinx. An s'incunta en jöbia ai 14 de forá dales 15.00 ales 17.00, te biblioteca a La Ila.
Usservé la stëiles y galassies
N merdi ai 12.2. dala 21.00 dal hotel Interski a S. Cristina. A uedl y nce tres telescops pòssen ti cialé al ciel de nuet cun si stëiles, planec y galassies. N astronom fajerà nce na pitla prejentazion cun diapositives y dajerà stlarimënc. L ie da se nuté su nchin al di dant dala 6 da sëira tla Lia dl Turism de S. Cristina, tel. 0471 777800.
Defileda de Carnescià a Urtijëi – la plu bela mascres vën premiedes
N Juebia Grassa ai 28.2. dala 15.00. Granc y pitli ie nviei a fé pea se lascian tumé ite vel' blòta mascra. La plu beles unirà premiedes sun Plaza de Dlieja, ulache l sarà nce mpue de festa cun mujiga DJ y de bon crafons. De majera grupes o carëc ie priei bel de se nunzië danora tla Lia dl Turism (tel. 0471 777600 o ortisei@valgardena.it.)
Jí cui schi da sëra
En mercui ai 13 de jená dales 20:00 ales 22:00, án la poscibilité da jí cui schi ince da sëra, sön la pista Doninz tl zënter da La Ila. Por podëi anuzé le lift, mësson avëi na cherta dai schi de plü dis.
Serades de bal deboriada
Le Consëi de Formaziun da La Val mët da jí 10 incuntades de bal sot al titul "Tanzen ab der Lebensmitte", cun Giuvana Moling. An s'incunta ai 18 y 25 de forá, ai 4, 11, 18 y 25 de merz, al. 1., 8, 15, 29 d'aurí, dagnora de lönesc dales 14:30, te salf Dumëne Moling a La Val. Infos y prenotaziuns pro Giuvana al 338/1249472

Sozial
Scontrèdes de auto mutuo aiut
La sociazion Rencureme, col patrozinie del Comun de Sèn Jan, à endrezà na lingia de scontrèdes de auto mutuo aiut con la psicologa Cristina Rizzi per familières e care giver de persones con demenza. L'enconter che vegn sarà en mercol ai 20 de firé h. 20.30 te Ciasa de Noscia Jent a Poza.
Portel de referiment sozièl
Ogne mercol da les 16:00 a les 18:00 te Comun general, te strèda di Pré de Lejia a Sèn Jan vegn metù a jir n portel de referiment sozièl, per problemes de dependenzes o de autra sort, avert a duc e no a paament. Ge vel se prenotèr. Per informazions chiamèr l 370.3004296 o scriver a: sportello.lerais@gmail.com.
Deberieda: jon a spaz a Laion
Ncuei vënderdi ai 8.2. dala 14.00 se ancuntons dan la Cësa de Paussa a Urtijëi, per furné ora a Laion, ulache jiron a spaz y tlameron nzaul. "Deberieda" ie na grupa per se ancunté danter persones che à problems psichics o de sozialisazion cun ulenteres. Per nfurmazions tel. 0471 798015. (Respunsabla dla manifestazion: Annemarie Mair).

Musiga
„Kathedrale der Klänge"
Duman sada ai 9.2. dala 20.30 te dlieja de Urtijëi, cunzert de mujiga sacra per strumënc de banda, orgun y pauches cun l "Großes Bozner Blechbläserensemble", l ugrister Josef Piras y l dirighënt Gottfried Veit. Sunà uniràl cumposizions per plu cores tipiches dla scola veneziana, de Giovanni Gabrieli (1557-1612), ma nce dl tëmp Romantik y Modern.
Conzert y presentaziun dl grup "Girandole armoniche"
Ai 17 de forá dales 18:00 él tl salf dl Istitut Ladin a San Martin na serada dal titul "Extravacantes Seicento". Ara se trata de n conzert cun presentaziun dla CD dl grup "Girandole armoniche". Organisaziun: Badiamusica.

Referac
Se pàiel pa a jì n pension dant y cun ciuna cunseguënzes pa?
N merdi ai 12.2. dala 20.00 te calonia de Sëlva, sëira de nfurmazion metuda a jì dal KVW de Sëlva cun Waltraud Delago, che dajerà stlarimënc n cont dla desposizions nueves per jì n pension (Quota 100).

Galaria retrac