Manifestazions atuales speziales

Data

08 de fauré 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 8 de fauré
Mostra de pitures
De chisc y d'autri chedri depënc a uele da Herbert Comploj iel mo da udëi nchin ala fin de fauré tl Café Surëdl a Urtijëi
Na pert miena che chësta opres stajëssa povester miec te na galaria d'ert y cultura. Ma purtruep iló ne vëniel nia tëut su motifs d'ert sce i ne n'à nia na linia plu cuntemporana, che spidlea deplù la rujeneda o esprescions artistiches d'al didancuei.
La mostra tl Café Surëdl, tla streda Roma 101 a Urtijëi, ie davierta de lunesc dala 13.00 ala 19.30 y da merdi nchin sada dala 10.00 ala 19.30.

Ie pa storia ti pascion?
N viac tl tëmp cun pedagoghes y esperc dl Museum Gherdëina
Ues'a cunëscer la culezions riches dl Museum Gherdëina y dé inant ti savëi?
Pona te nvions a fé pea n curs de furmazion, ntan n trëi domesdis tl mëns de merz y auril 2019.
Per nfurmazions y per te lascé nuté su posses cherdé su nchin ai 28 de fauré tl Museum Gherdëina, tel. 0471 797554.

"Ski Caching" n juech per duc
Fajëde duc pea duman sada, 9.2. pra l juech de jì a crì tl raion dai schi de Gherdëina
La Scola de Schi de Urtijëi mët a jì na sort de "ciacia al tesor", ulache la va de jì a crì tofles sparpaniedes ora mpue sëura dut l raion da jì cun i schi de Gherdëina. N fej pea te scuadres da doi y canche n ruva pra chësta tofles iel da se fe na foto, cun tramedoi y la tofla da udëi. Dan pië via giàpen na cherta dl raion cun la lueges dla tofles. Sun uni tofla iel n numer, chisc ie i ponc che vën cumpedei adum ala fin.
N se urta n sada ai 9.2. dala 8.30 sun la Pitla Plaza S. Antone per pië via dala 9.30 cun i schi y la cherta tla man. Da ruvé de reviers sun Plaza iel nchin la 16.00.
Fajëde pea, l sarà dessegur da se devertì! L possa fé pea jënt de uni età (almanco un te scuadra muessa avëi 18 ani). Se scrì ite pòssen tla Scola de Schi de Urtijëi, tel. 0471 796153 o dan pië via, paian ite 25 € per scuadra.
I prims vënc n bonn da 500 € da cumpré ite tla butëighes de Urtijëi, chëi che ruva l plu daujin a n numer trat ora ala busca vënc n bonn da 250 € y pona vëniel mo trat ora de biei pesć danter duc, nce n bel pèr de schi Elan.

"Shapes and colors"
Giaurida dla mostra de Matthias Sieff ai 15.2. te Tublà da Nives te Sëlva
Matthias Sieff ie nasciù tl 1982 y sta a Mazzin de Fascia. L à arjont l diplom da moster tl 1999 y da scultëur tl 2002 te Sëlva. L'Università "Angewandte Kunst"- sezion scultura a Viena, cun la pruf.ra Gerda Fassel, àl stlut ju cun n resultat ezelënt. L'ert de Sieff ie baseda sun l stude dla formes dl corp, ma si rafigurazion lascia gën da na pert la pruporzions, restan mpo for lieda y fedela al'anatomia. La formes scëmples, mpue particuleres y geometrisedes, sotrissea purempò for inò l organism. La scultures al incontra ie statiches y à sciche fundamënta n ncrëusc de urizonteles y verticheles. Per ti dé mo plu mpurtanza ala opres, depënj Sieff si lëures cun culëures stersc che dà scialdi tl uedl.
Pra la giaurida dla mostra, n vënderdi ai 15.2. dala 20.30 saràl la critica d'ert Mariangela Bognolo che fajerà la ntroduzion artistica. La mostra resterà davierta nchin ai 10.3.2019, uni di dala 16.00 nchin la 19.00, mé de lunesc iela stluta. Nfurmazions plu avisa sot a www.tubladanives.it

Aste vëia da imparé n mistier nü?
Al vëgn pité formaziuns a mez tëmp por operadësses y operadus soziosanitars y sozioassistenziai
Este interessé o interessada da lauré tl ciamp di seniors y/o dles porsones cun handicap? Spo te' l'ocajiun y scriete ite ala formaziun a mez tëmp da operadëssa soziosanitara, che vëgn tignida a Bornech, o ala formaziun a mez tëmp da operadëssa sozioassistenziala che vëgn tignida a Porsenú. La formaziun se basëia sön 550 ores de pratica y 650 ores de teoria. Les leziuns de teoria vëgn tignides danmisdé, trëi iadi al'edema.
Les iscriziuns é davertes por porsones dai 25 agn insö, dal 1. de forá cina ai 15 de merz, pro la scora por i laurs soziai "Hannah Arendt". Chiló ciafon ince informaziuns plü menüdes, telefonan al numer 0471/973494.

Show cun i schi te paisc
En jöbia ai 14 de forá dales 21:00 vëgnel metü da jí a San Ciascian na show sön i schi tl zënter dl paisc, olache al vëgn arjigné ca na pista aposta por la manifestaziun
I maestri dla scora de schi da San Ciascian mostrará le svilup y la storia dl schi, sciöche döt á metü man cina ales tecniches plü modernes d'aldedaincö.
Ince l'intratignimënt musical adöm cun Dj Elvis sará caraterisé da cianties liades ala storia dl schi. Le spetacul sará en jöbia ai 14 de forá y mët man dales 21:00. I spetadus pó s'la conforté da odëi i maestri de schi che vëgn dal hotel Diamant jö cina te plaza dan dlijia. Al ne manciará nia tröp devertimënt sciöche ince val' da bëre.

"La zingaindra" tla televijiun
En mercui, ai 13 de forá 2019, dales 20:50 inant, söl canal de Rai Ladinia
La opereta ladina "La zingaindra" é gnüda rapresentada a La Pli de Mareo, te Ciasa dles Uniuns y alaleria sön Paiun dles manifestaziuns, l'ann passé tles edemes danter fin de messé y mëteman d'agost. Tla documentaziun de Rai Ladinia, n program de Alessandro Dapunt, sarál da odëi perts filmades y intervistes tutes sö söl post de rapresentaziun. "La zingaindra" é na opereta originala ladina scrita da Iaco Rigo, musicada da Ludwig Rindler. La regia é de Tone Palfrader.

Cunzert dl'Urchesta Haydn
N mierculdi ai 13.2. dala 20.30 tla cësa de cultura a Urtijëi
Sun l program di Jëuni de Mujiga de Gherdëina ne pòssel nia mancë l cunzert dl'Urchestra Haydn de Bulsan y Trënt, te chësta sajon de cunzerc da audì bele per l segondo iede.
N mierculdi sëira, ai 13 de fauré, sunerà l'urchestra sot ala bachëta dl dirighënt jëunn Min Chung. Do avëi studià a Paris iel jit tla Corea dl Sud a se spezialisé da dirighënt pra si pere. Si prima esperienzes da dirighënt àl fat te si ncësa y se à pona fat n inuem ti stac ujins, tl'America
y nce tl'Europa.
Cun l'Urchestra Haydn àl mparà ite la Sinfonia nr. 2 in D-Dur, op. 36 de Ludwig van Beethoven, la Sinfonia nr. 4 in A-Dur , op. 90 "Italienische Symphonie" de Felix Mendelssohn Bartholdy y la sinfonia "Il signor Bruschino" de Gioachino Rossini.