Manifestazions atuales speziales

Data

15 de fauré 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 15 de fauré
Iade tla Maremma Toscana
La Lia da Munt Ladinia - Val Badia mët da jí dala jöbia ai 16 cina ala domënia ai 19 de ma n iade tl süd dla Toscana, raiuns dla Maremma, cun escurjiuns, vijites culturales y bun mangé
Le iade á chësc program:
- 1. de ai 16 de ma piarán ia cun le bus por jí fina Orbetello. Söl iade stán chic por n picnich y de piceres palses. An fajará le check-in y cëna tl Hotel Relais I Presìdi.
- 2. de ai 17 de ma: Escurjiun saurida tl parch natural dla Maremma, tres le Parco dell'Uccellina fina sön la spona dl mer, cun poscibilité da jí ince ciamó a nodé. Dedô zoruch cun le bus te hotel y cëna.
- 3. de ai 18 de ma: Escurjiun do Le vie Cave, che foss de vedli trus di etruscs che coliëia i "borghi" carateristics de Sovana cun Pitigliano, n vedl paisc costruí sön crëp de toghe.
Zoruch cun le bus te hotel y cëna.
- 4. de ai 19 de ma: Söl iade da gní zoruch s'architon a marëna te n restorant tipich emilan.
Le iade costa 460,00€ a porsona te ciamena da 2 lec (suraprisc te ciamena da 1 n let: 60,00€). Tl prisc él döt ci che é descrit tl program. La prenotaziun vél cun le paiamënt dla soma de 460€ (+60€ por ciamena singula) fina ai 28.02.2019 pro la Cassa Raiffeisen Val Badia - IBAN: IT81C0801059130000303016315
Por tó pert mësson ester scrić ite - o se scrí ite - a öna dles Lies da Munt dla Val Badia. Le iade vëgn ma fat sce almanco 35 porsones tol pert. Dan le iade gnarál ciamó mené fora na cherta cun indicaziuns menüdes sön orars y program. Por stlarimënc o informaziuns plü avisa pón cherdé sö Christof al 340/4910875.

"Eppes Nuis" cun Thomas Hochkofler
Al 1. de merz organisëia le Sorvisc ai Jogn Val Badia na sëra de cabaret cun Thomas Hochkofler a La Ila
Thomas Hochkofler, conesciü sciöche "Hausmeister" tl cabaret "Hell werd sein", á ince inventé d'atres figöres, sciöche "Joe von Afing", "Motschuner Peppn" o "Herr von Wegen", che l'á porté a n gran suzes. Ince "Ban Luis" y la "Wöchenschau" é dlungia le program "Fockelotti" dër conesciüs.
Tla Ciasa dla Cultura a La Ila portarál dant al 1. de merz dales 21:00 le program da rí nü "Eppes Nuis". Prenotaziuns por la rapresentaziun vëgn tutes sö tres SMS al numer 342/8410721. Al é da dé dant inom, cognom y numer de partezipanc. L'entrada é dales 20:00 inant, al cost de 18,00€. Les chertes apostades é resservades fina na cherdora dan le mëte man.

N mistier por le dagní
Ai 19 de forá na serada d'informaziun sön i mistiers dla cura y assistënza
Sce i sëis interessé o interessada da ciafé informaziuns sön i mistiers dla cura y assistënza y plü avisa sön le mistier de operadú/dëssa soziosanitar y operadú/dëssa sozioassistenzial, ves apetunse en mertesc ai 19.02.2019 dales 20:00, te Ciasa de Palsa a San Martin.
Tratan la sëra gnaral dé informaziuns sön i mistiers dla cura y assistënza y sön la Ciasa de Palsa, le sorvisc de Assistënza a Ciasa dl Raiun Sozial y sön le zënter sozial La Spona.

Spetacul sön i schi a Calfosch
La scora de schi da Calfosch tëgn en lönesc ai 18 de forá na show sön i schi, caraterisada dala tematica "velozité y füch"
Dales 18:00 sarál i maestri dla scora de schi che fej na desmostraziun sön la pista "Colfosco" tl zënter dl paisc. Ince le grup de freestyle Pirates, metü adöm da jogn dl post apascioná dl schi y dla brëia, mostrará cun tröpa adrenalina y aziun salc y acrobazies tl'aria. En chësta ocajiun ti gnarál mostré al publich le laur dla preparaziun dles pistes, fat vigni sëra dai iac dala nëi, por ti pité ai sciori de bones condiziun da jí cun i schi. Al ne manciará sambëgn nia musiga dal DJ, tröp devertimënt y ince n spetacul de füc artifiziai.

Presentaziun CD dl ensemble Girandole Armoniche
Extravagantes Seicento é le titul dl CD publiché da püch dala etichëta Arcana Outhere-Music. La presentaziun ai 17 de forá dales 18:00 a San Martin de Tor
Ara se trata de composiziuns por vidora, viola da gamba y cembalo, scrites danter le 1640 y le 1680 da compositurs austriacs o talians emigrá tles curts di Habsburg a Viena y Desproch. L'aspet carateristich por chisc toc (Heinrich Ignaz Franz Biber, Johann Heinrich Schmelzer, Johann Kaspar Kerll, Giovanni Antonio Pandolfi Mealli, Ignazio Albertini y Samuel Friedrich _Capricornus) é le stil virtuos che ti damana de gran abilités tecniches ai strumentalisć. La vidora y la viola da gamba röia gonot te n dialogh de amur che pó ince deventé n jüch por mosoré les acrobazies melodiches che variëia dassënn tles composiziuns.
I protagonisć é l'ensemble Girandole Armoniche cun Esther Crazzolara (vidora baroca), Federica Bianchi (cembalo) y Teodoro Baù (viola da gamba). Do avëi davagné le pest Weichlein al International H. I. F. Biber Competition á le trio concretisé chësc suzes cun la realisaziun de n CD.
Esther Crazzolara colaborëia cun ensembles sciöche Il Giardino Armonico, Il Pomo d'Oro y l'Accademia Bizantina. Teodoro Baù é le finalist dl concurs internazional de Bruge. Federica Bianchi se á spezialisé sön les tastadöres antiches dal tëmp medieval al baroch y sona pro grups desvalis, danter l'ater pro Les Musiciens de Louvre y Il Pomo d'Oro.
Le CD gnará presenté ai 17 de forá dales 18:00 a San Martin de Tor, tl Istitut Ladin "Micurá de Rü".

Jí cun i schi a lüm de ciandëra
En chësta ocajiun vëgnel ince tigní l'incuntada di amisc dl telemark "La Falda"
En mercui ai 20 de forá vëgnel metü da jí la manifestaziun "Jí cun i schi a lüm de ciandëra". Dales 20:00 ales 22:00 podarán jí cun i schi ince da sëra, sön la pista de Gherdenacia a La Ila, che gnará iluminada tres jö da chentli y füc, y les üties restará davertes ince da sëra. Pro la ütia Sponata él le trio Sassongher che abelësc la sëra cun le sonn di corgn da munt y dan la ütia Florian ne mancel nia animaziun cun jüc de füch. Vigni schiadú mëss avëi na löm da frunt, che an pó s'impresté fora pro l'implant portamunt. Te chësta ocajiun vëgnel ince tigní le pröm apuntamënt de "La Falda", l'incuntada di amisc dl telemark. Düc i amisc dl telemark, prinzipianc y progredis, é inviá da tó pert a chësta sëra, olache an podará imparé de vigni sort de tecniches söl telemark. Al gnará ince porvé da fá na gran ota düc adöm, tacá pro na gran maza. Le secundo apuntamënt cun la Falda gnará tigní ai 20 de merz cun la gara de telemark classica a ostacui, olache al gnará spo incoroné le "Re dla Falda".

Carnescià cun Canadian Brass
N juebia ai 21.2. dala 20.30 tla Cësa de Cultura a Urtijëi
L cuintet Canadian Brass, metù su tl 1970, à n repertore zënza cunfins y si sonn ie cunesciù lonc y lerch per si tlarëza y unizità. I à na gran atività de cunzerc y de produzions de mujiga, à sunà y tëut su plu de cënt trascrizions, aranjamënc y opres urigineles per cuintet de strumënc de banda. I vën nce cunscidrei l cuintet di gran recorc, per vester stata la prima grupa de strumënc de banda a suné tla Carnegie Hall a New York, che à fat na tournee tres la Cina y che à vendù doi milions de copies de si za. cënt albums tëuc su. I Canadian Brass possa propi cialé de reviers a cater dejeneies de mujiga y suzesc.
Y bele per l terzo iede vëni a Urtijëi per n cunzert di Jëuni de Mujiga de Gherdëina y lascerà audì aranjamënc de pec tlassics coche la "Zauberflöte","Carnevale a Venezia", o la "Carmen" de Bizet, ma nce n Tribute al Jazz y Dixieland, o n Jazzed up Bach nchin a n "Latin Journey" ti paejes dl Sudamerica.