Manifestazions atuales speziales

Data

22 de fauré 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 22 de fauré
Al se mët ma tl ce da ester püre
La compagnia nöia de teater tl lingaz talian a Bornech vëgn a San Martin a presenté le toch conesciü de Molière "Il malato immaginario", sot la regia de Antonio Loguercio
L'apuntamënt é por chësta sabeda, ai 23 de forá, dales 20:30, tl salf de comun a San Martin de Tor. La comedia classica de Molière trata dla ossesciun dl om atempé Argante da ester amaré y da ti dé ia porchël söa fia Angelica desco fomena a Tommaso, fi de n mëde y aspirant instës a dotur (por che al pois ciaré de ël). Angelica n'ó indere n'en savëi nia...

Carnescé tl'Alta Badia
Ala fin de forá y tla pröma edema de merz vëgnel organisé de plü festes da Carnescé tl'Alta Badia
Ai 28 de forá él düc che pó tó pert ala ciacia al tesur da carnescé sön les pistes dl raiun dai schi dl'Alta Badia. Dales 10 inant, jon cun i schi da n punt al ater y s'architan pro la staziun a munt dl Piz Sorega, Piz La Ila y la staziun a val dl Boé y La Crusc, pón cöie adöm de plü toc por mëte adöm la maschera y ciafé na picera scincunda. Le medemo de dales 14:30 inant él a Calfosch, dlungia le punt tl zënter dl paisc, na festa sön pista cun musiga y animaziun de clowns por pici y gragn.
La domënia de Carnescé vëgnel tigní a Badia la tradizionala Carnival Cup. La gara en maschera jödapé dla pista da La Crusc mët man dales 14:00 y düc é inviá da tó pert cun val' meso de trasport particolar. Le mertesc ai 5 de merz dales 14:30 él söl program na festa cun defilada dles mascheres jödapé dla pista Col Alt a Corvara. Na juria premiará la maschera plü bela y originala y i mituns á ince la poscibilité da se lascé depënje sö le müs. Dedô vëgnel metü da jí l'acrobatic show adöm cun i maestri dla Scora de Schi da Corvara-Ladinia y le Freestyle Team Pirates Alta Badia. Ince tl zënter dl paisc da San Ciascian sarál le mertesc dales 14:00 inant tröpa animaziun cun jüc, bai y face-painting por mituns. Al gnará premié la maschera plü bela y al ne manciará nia val' da mangé y da bëre.

Iade tla Maremma Toscana
La Lia da Munt Ladinia - Val Badia mët da jí dala jöbia ai 16 cina ala domënia ai 19 de ma n iade tl süd dla Toscana, raiuns dla Maremma, cun escurjiuns, vijites culturales y bun mangé
Le iade á chësc program:
- 1. de ai 16 de ma piarán ia cun le bus por jí fina Orbetello. Söl iade stán chic por n picnich y de piceres palses. An fajará le check-in y cëna tl Hotel Relais I Presìdi.
- 2- de ai 17 de ma: Escurjiun saurida tl parch natural dla Maremma, tres le Parco dell'Uccellina fina sön la spona dl mer, cun poscibilité da jí ince ciamó a nodé. Dedô zoruch cun le bus te hotel y cëna.
- 3. de ai 18 de ma: Escurjiun do Le vie Cave, che foss de vedli trus di etruscs che coliëia i "borghi" carateristics de Sovana cun Pitigliano, n vedl paisc costruí sön crëp de toghe.
Zoruch cun le bus te hotel y cëna.
- 4. de ai 19 de ma: Söl iade da gní zoruch s'architon a marëna te n restorant tipich emilan.
Le iade costa 460,00€ a porsona te ciamena da 2 lec (suraprisc te ciamena da 1 n let: 60,00€). Tl prisc él döt ci che é descrit tl program. La prenotaziun vel cun le paiamënt dla soma de 460,00€ (+60,00€ por ciamena singula) fina ai 28.02.2019 pro la Cassa Raiffeisen Val Badia - IBAN: IT81C0801059130000303016315
Por tó pert mësson ester scrić ite - o se scrí ite - a öna dles Lies da Munt dla Val Badia. Le iade vëgn ma fat sce almanco 35 porsones tol pert. Dan le iade gnarál ciamó mené fora na cherta cun indicaziuns menüdes sön orars y program. Por stlarimënc o informaziun plü avisa pón cherdé sö Christof al 340/4910875.

Sëires de bona ueia per Carnescià
Cun la grupa dl Teater de Urtijëi, ntan trëi sëires, da Juebia Grassa nchin Merdi de Carnescià
„Jon ma inò n iede a festejé sciche l toca Carnescià, ulache l vën ciantà, sunà y balà y ulache l ie truep da s'la rì. Magari se furnions nce su mpue n mascra, pona passenons ite pra duta la cumedia."
„Sambënzënza, bona idea! Pona jons duc canc ala Sëira da Carnescià – dla grupa dl Teater de Urtijëi."
Iló saràl truep da se devertì cun n cabaret da culëures, pitli teatri per gherdëina y per tudësch, per tò pra l nés vel' un, per fé matades cun vel' auter, ma dantaldut per s'la rì dassënn.
Mancë ne manceràl sambën nce no de bela mujiga da druch y pra velch da bever y da maië puderàn mo sté giut a se devertì y s'la rì.
L Teater de Urtijëi nvieia de cuer ala sëires da Carnescià:
n Juebia Grassa ai 28 de fauré
n sada ai 2 de merz
n Merdi de Carnescià ai 5 de merz
tla cësa de cultura a Urtijëi, for dala 7 da sëira inant.
L spetacul scumencerà pona dala 20.30.
Per apusté danora na lerch pòssen jì tla butëiga Scudela o cherdé su l 0471 797298.
Per duc chëi che vën n mascra vel l moto "Plu da culëur che n ie y miec che l ie!"

Gran defileda de Carnescià a Urtijëi
N Juebia Grassa ai 28 de fauré dala 3 domesdì. La plu bela mascres vën premiedes
N Juebia Grassa, ai 28 de fauré, mët la Lia dl Turism de Urtijëi inò a jì la gran defileda de Carnescià. Duc i mutons y la mutans, coche nce i granc, ie nviei de cuer a fé pea la defileda tres Urtijëi, che pierà via dala 3 domesdì dal Hotel Madonna (dlongia l Despar), passerà tres l raion da jì a pe y jirà inant nchin sun Plaza de Dlieja. Tlo uniràl fat na pitla festa cun mujiga DJ y partì ora de bon crafons.
Fé pea nce tu cun ti cumpanies – la plu bela mascres unirà premiedes! Chiche ulëssa fé pea cun na gran grupa o n carët dëssa, per rejons de urganisazion, prëibel se lascé nuté su tla Lia dl Turism mandan na e-mail a ortisei@valgardena.it o cherdan su l 0471-777600.

Garejeda VSS "Duca San Giusto"
N dumënia ai 24.2. sun Piz Sela, per mëndri di ani 2007 y 2008 dla categuria "cuccioli"
L Schi Club Gherdëina mët a jì n dumënia, ai 24 de fauré sun Piz Sela, da suinsom ju na garejeda de slalom strënt per mëndri dla categuria "cuccioli", nasciui ti ani 2007 y 2008.
L fajerà pea i miëur atlec de dut Südtirol de chësta categuria, che se à cualificà tla garejedes dant per chësc slalom.
L vën pià via dala 10:00 danmesdì cun la prima manche y prësc do jiràn inant cun la segonda.
La premiazion sarà ntëur la 14.00 dan la ustaria Tommaso sun Plan de Gralba.
L Schi Club Raiffeisen Gherdëina nvieia duc i apasciunei de schi a unì a ti cialé a chisc pitli campions, che garejea danter i pei strënc.

Noza da Paur
Ai 26 de forá a Badia: na bela manifestaziun, por tigní vies les tradiziuns da n iade
Gran importanza ti vëgnel dé ciamó aldedaincö ales tradiziuns da paur. Cun deplü manifestaziuns fora por l'ann ón ti les porté dant ai plü jogn y ai sciori de nüsc paisc. Na manifestaziun liada ala vita da zacan é la "Noza da Paur", che vëgn metüda a jí en mertesc ai 26 de forá dales 21:00 a Badia. La defilada passará fora por le zënter da San Linert; dan la ciasa "Croce Bianca" sarál le gran past da noza cun les spezialités ladines y olache la Böhmische de Badia tol ite i novic. Sciöche da tradiziun, podarán odëi la liösa cun la nücia, sü geniturs, le mënanücia y la "ciamarita", la tota da bato. Sön n'atra gücia sarál le nüc cun sü geniturs y le mënanüc. A pé o sön de plü liöses sarál i atri familiars, amisc y vijins. Al ne manciará nia val' grup musical, che abelësc la noza cun i orghi da man y i guanc tradizionai.
Tröpes é les tradiziuns liades ala noza da paur, che vëgn ince portades dant te chësta ocajiun, sciöche le jí cun la cioura ai fredesc y sorus plü vedli di nüc che é ciamó da maridé, i ciapí da plömes y ciüfs de metal vistis dai jogn inviá a noza, le costüm tradizional y la gherlanda cun ciüfs blanc da cëra dla novicia y la daurida dl bal da pert dl pröm sonsel y dla pröma sonsela. Al vëgn rengrazié le Comun de Badia y sü lauranc, la polizia locala, i Stüdafüch de Badia, la Crusc Blancia Alta Badia, la sozieté di implanc La Crusc, l'alberch San Leonardo, la conditoria I Dolci di Ricky, la Uniun di Ostis de Badia, la Jonëza da Paur de Badia, la Uniun di Ciavai Haflinger y la Uniun di Ciavai Norics dla Val Badia y düc chi che tol pert ala defilada, che á metü a desposiziun i guanc o che se crüzia por le bun garaté dla manifestaziun. L'organisaziun é dl'Assoziaziun Turistica de Badia.

"Eppes Nuis" cun Thomas Hochkofler
Al 1. de merz organisëia le Sorvisc ai Jogn Val Badia na sëra de cabaret cun Thomas Hochkofler a La Ila
Thomas Hochkofler, conesciü sciöche "Hausmeister" tl cabaret "Hell werd sein", á ince inventé d'atres figöres, sciöche "Joe von Afing", "Motschuner Peppn" o "Herr von Wegen", che l'á porté a n gran suzes. Ince "Ban Luis" y la "Wöchenschau" é dlungia le program "Fockelotti" dër conesciüs.
Tla Ciasa dla Cultura a La Ila portarál dant al 1. de merz dales 21:00 le program da rí nü "Eppes Nuis". Prenotaziuns por la rapresentaziun vëgn tutes sö tres SMS al numer 342/8410721. Al é da dé dant inom, cognom y numer de partezipanc. L'entrada é dales 20:00 inant, al cost de 18,00€. Les chertes apostades é resservades fina na cherdora dan le mëte man.

Gran cunzert da Carnescià
N vënderdi ai 1. de merz dala 20.30 tla Cësa de Cultura a Urtijëi, cun l clown "Karamela" y la Scola de Mujiga de Gherdëina
N ucajion di 40 ani da canche l ie unì metù su la Scola de Mujiga, vëniel metù a jì ntan l tëmp de Carnescià n cunzert particuler.
Sambën saràl da pudëi scuté su truepa de bela mujiga, suneda y cianteda dai sculeies deberieda cun si maestri te na maniera umoristiga.
Chi ne cunësc pa nia la cianties de jì a rubé l'ola, "Chi ne à pa udù Marianna?" o la taialonges de "L flurësc pa la luna...."?
La sëira unirà meneda dal paiazo "Karamela", che ie drët cunesciù per si bona ueia, sibe te Südtirol tres la trasmiscions tla televijion che da truepa d'autra manifestazions da n bon umor.