Manifestazions atuales speziales

Data

15 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 15 de merz
Iconografia dl mal: tentaziun y castigo
Tl Medief, tl '500 o tl '700 gnô le mal odü atramënter, mo co podunse pa incö reconësce le malan?
Tratan la sëra gnarál porté descriziuns y simboi che rapresentâ ti secui le mal y le stlet y che á ala fin porté a svilupé la figöra personificada dl malan tles operes d'ert.
Y co podunse pa reconësce incö le malan?
Le referat gnará tigní dala prof. de storia dl'ert Danila Serafini, en vëndres ai 22 de merz dales 20:00, te biblioteca de Badia.
Organisaziun: Consëi de Formaziun de Badia.

Gara por le "Re dla Falda"
Na gara danter portes y lëgns por incoroné le Re dla Falda. Scrit dant vëgnel l'elm! L'apuntamënt cun le telemark tl'Alta Badia é en mercui, ai 20 de merz dales 20:00, söla pista Doninz-Gardenacia a La Ila
Düc i amisc dl telemark, prinzipianc y progradis, simpatisanc y nia, é inviá ala festa dl telemark "La Falda", en mercui ai 20 de merz dales 20:00 ales 22:00 sön la pista Doninz-Gardenacia a La Ila. Te chësta ocajiun gnarál incoroné le Re dla Falda, le telemarker plü asvelt dla serada. L'elm é n dovëi.
Informaziuns sot a info@uslaila.it o markus@altabadia.it

Roda dles saus
Ince en chësc invern vëgnel metü a jí n'edema dedicada ales spezialités y ala cultura ladina tl raiun da jí cun i schi da La Crusc a Badia
Dala domënia ai 17 cina ai 24 de merz 2019 pón ciarcé pro n valgönes üties na spezialité ladina particolara, sciöche gnoch de farina de poia, polënta cun golasc, stres ("Spätzle") cun ciajó de munt y cioce, cajencí arestis o i crafuns mori. Vignöna de chëstes spezialités vëgn arjignada ca te öna dles cin' üties tl raiun dai schi da La Crusc, da mëte man dala pista Sponata cina sön les pistes da La Crusc a Badia. Implö vëgnel tigní tratan l'edema deplö apuntamënc dales 11:00 inant, olache al vëgn presenté la spezialité te öna dles üties cun musiga dal vi.

Fibra otica
Sëira de nfurmazion n mierculdi ai 20.3. dala 20.00 te Cësa de Cultura a Urtijëi
L cunliamënt ala fibra otica sarà tosc nce puscibl te n valguna pertes de Urtijëi. La realisazion dla rë de fibra otica unirà fata dal Chemun de Urtijëi deberieda cun la firma Infranet AG, na azienda dla provinzia che ie unida nciarieda cun la planificazion y la realisazion de duta la rë publica tla Provinzia Autonoma de Bulsan.
L proiet nstës y a ce maniera che n possa se taché ite ala rë, uniràl spiegà dala sozietà Infranet SpA deberieda cun l Chemun de Urtijëi, ntan la sëira de nfurmazion ai 20 de merz 2019 dala 8 da sëira tla gran sala dla Cësa de Cultura de Urtijëi. Duc i nteressei ie nviei a unì a chësta sëira de nfurmazion.

"Dimensions"
Giaurida dla mostra de Markus Gasser ncuei vënderdi ai 15 de merz te Tublà da Nives te Sëlva
"Ziplé tl sas ne n'ie nia mé n ert, ma mo deplù filosofia. Tl tëmp lonch che n lëura te n sas, pàssel na pert dla vita te chëla che n scumëncia a ciampì cun l material y l'idea. Cun l granit dur se rënden cont coche l tëmp passa, ma l mumënt fej pert dl'eternità." Chësc ie n pensier dl artist Markus Gasser de Persenon, che à fat la scola d'ert a Urtijëi y ie jit a studië inant a Milan tl'Academia "Brera".
Per pudëi lauré cun l lën, l sas y i culëures ti cëla Gasser al lën ntan che l crësc, tl mumënt dl flurì y nce canche l mor; l crëp che se desfej cun la dlacia, l scuvierjer si urigin, plu sedimentera che vulcanica, dut chësc vën cialà, udù y ruva adum te si opra. Ti ultimi ani se àl dat ju cun l cë, cëves che se rejona y à ravises tla tiera.
La giaurida dla mostra ie ncuei vënderdi ai 15.3. da mesa la nuef da sëira, cun Vinzenz Senoner che fajerà la ntroduzion artistica. La mostra resta davierta nchin ai 14 de auril 2019, da merdi nchin dumënia dala 16:00 nchin la 19:00. De lunesc iela stluta. Nfurmazions plu avisa sot a www.tubladanives.it