Manifestazions atuales

Data

22 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 22 de merz
Chino
Chino de Cianacei
Doman, sabeda ai 23 de mèrz e domenia ai 24 h. 21.15 vegn moscià "Non sposate le mie figlie 2"; en domenia ai 24 e en mercol ai 27 h. 17.15 l'é "Asterix e il segreto della pozione magica", mercol ai 27 h. 21.15 l'é "Captain Marvel", en sabeda ai 30 e en domenia ai 31 h. 21.15 vegn moscià "Escape room".
Chino de Pardac
Insnet, vender ai 22 h. 21.15 l'é "Copia originale", sabeda ai 23 h. 21.15 e domenia ai 24 h. 17.00 vegn dat "Dragon ball super-broly", en domenia ai 24 e lunesc ai 25 h. 21.15 l'é "La casa di Jack", en mèrtesc ai 26 e en mercol ai 27 h. 21.15 l'é "Gauguin a Tahiti".
Chino de Tieser
Insnet, vender ai 22 de mèrz h. 21.15 l'é "Un uomo tranquillo", en sabeda ai 23 h. 21.15 e en domenia ai 24 h. 20.30 vegn dat "A un metro da te", en mercol ai 27 h. 21.15 l'é "Vice l'uomo nell'ombra", en jebia ai 28 h. 21.00 l'é l spetacol de teater "Margherita dalla parta calva", en vender ai 29 h. 21.15 l'é "Dumbo".

Cursc
Fajon pëiasëmies "Traumfänger"
Pastelné cun Ines per sculeies dla scoles mesanes. N sada ai 30.3. metons a jì zeche per i majeri, dala 9 ala 12 danmesdì. Do n vedl cult indian passa i biei sëmies tres la rë y nes lascia durmì saurì, i bur' sëmies resta tachei tl "pëiasëmies" y sfanta daduman canche l surëdl leva. L ie da se lascé nuté su danora tl ufize dla NJG, tel. 0471 799006.
Co sciché su l ciapel da Hellau
Dai 3. ai 6.4. dla 20.00 tla Bibliotech Tresl Gruber a S. Cristina, saràl Adele Lobis che dajerà vel' cunsëi co fé su l ciapel da jì a tré zedules. Nfurmazions plu avisa giapëis tla bibliotech Tresl Gruber, ulache l ie nce da se lascé scrì ite nchin ai 28 de merz 2019.
Pastelné cun Ines per i sculeies dla elementeres de Gherdëina
I domesdis de pastelné cun Ines sarà for de mierculdi: ai 10.4. pastelné daviert: lascia jì ti fantajia y criatività; ai 8.5. pastelnons na scincunda per l di dl' oma. Per nfurmazions y per se lascé nuté su, cherdé su la Nëus Jëuni Gherdëina al 0471 799006 o scrì n sms a 339 5208685.
Curs de cujiné sann, che fej bon al cuer y al cervel
Per n vënderdi ai 12.4. dala 17.30 tla cësadafuech dla NJG a Urtijëi, Plaza S. Antone, mët l KVW de Urtijëi a jì n curs de cujiné cun la cunsulënta de nutrimënt Ivonne Daurù. Cun la spëisa pòssen fé truep per l cuer y la zirculazion, la prescion i y grasc tl sanch. L possa fé pea al plu 12 persones. Priesc 40 €. Iscrizions nchin ai 5.4. dala NJG, tel. 0471 799006.
Curs de tennis cun l T.C. Urtijëi
Dai 18. ai 27.4. tl zënter dal tennis a Runcadic per mutons y mutans da 6 a 14 ani cun l maester Alberto Cestarollo. l cursc ie for dala 9.00 per i pitli y dala 10.00 per i majeri. L priesc per de ndut 8 ëura ie de 60 €. Se scrì ite pòssen tl zënter dal tennis, tel. 0471 797275 do la 14.00, info@tennis-valgardena.com. Nfurmazions giapèn dal maester cherdan su l 338 7048909, albertocestarollo@hotmail.it.
Curs per se njenië ca a parturì
Per ëiles che aspieta y genitores dl daunì, che à l terminn de juni/lugio/agost 2019. L'ancuntedes sarà tla palestra dla Cësa de Paussa a Urtijëi, dai 29.4. ai 3.6.2019 uni lunesc dala 16.00 ala 18.00/19.00. Iscrizions: CUPP tel. 0471/457457, 8.00-16.00 dal lunesc al vënderdi; email vormerkung.bz@sabes.it; ëifoma 0471/797778, assistënta sanitera 0471/794290.
Lungiarü: Curs de LnB Motion
Le KVW da Lungiarü mët da jí n curs de LnB Motion cun Marisa Clara. An s'incunta en lönesc al 1. d'aurí dales 20:00, te palestra da Lungairü. Ara se trata de na ginastica por renforzé i muscui y les articolaziuns de döt le corp, por ti sciampé al me de spiné, me ai üfs, ales sciables, ai jenëdli y al col. Informaziuns y iscriziuns pro Marisa al 340/2756166 anter i 27 de merz.
La Val: Curs da cujiné salverjina
La Uniun dles Patrones da La Val mët da jí n curs da cujiné de döes sëres, ai 4 y 5 d'aurí, tl Hotel Pider a La Val, cun Markus Rubatscher. Informaziuns y prenotaziuns pro Valeria al 334/9327053.
Badia: Cursc de inglesc
Le KVW de Badia organisëia cursc de inglesc de de plü liví, cun la pro. Lalena Stull. I cursc vëgn tignis te biblioteca y mët man ai 2 d'aurí. Informaziuns y prenotaziuns pro Cristina al 333/1591599.
Lungiarü: Curs da fá frisurs modernes da vignidé y da festa
Organisé dal KVW da Lungiarü, cun Nicole Nagler. N curs de döes incuntades, che mët man en sabeda ai 30 de merz dales 16:00, te salf dles uniuns a Lungiarü. Por informaziuns y iscriziuns pón telefoné a Nicole al 349/3285345.

Musiga
Rock the Dolomites
Uni di nchin n dumënia ai 24.3. saràl na grupa che sona, do marënda tla uties da mont y tl'ëures da aprés ski tla ustaries lajù tl luech. Stluta ju vën la lingia de cunzerc cun la party dla fin de sajon n sada ai 30.3. dala 16.00 ta Col da Mulin te Sëlva. L program plu avisa ie da udëi sot a www.rockthedolomites.com.
"Swing on Snow" sun Mont de Sëuc
Nchin ai 24.3. saràl da audì bele danmesdì mujiga dal vif sun i purtoies de Mont de Sëuc per jì inant da mesdì pra la uties y ustaries, cun grupes che vën caprò da dut l raion dla Elpes. L devertimënt cun mujiga va inant dala 9 da sëira ti locai a Ciastel, Sëuc, Fie y Tiers. www.seiseralm.it/swingonsnow.
Corvara: conzert sacral
En domënia ai 24 de merz dales 21:00 inant sarál da aldí te dlijia da Corvara n conzert cun n grup de archëc de Friûl y Venet. Ai portará dant ince le "Requiem" de Mozart tla verjiun por archëc de P. Lichtenthal.
A Navalge Katia Ricciarelli
Doman, sabeda ai 23 de mèrz h. 20.30 te teater Navalge a Moena la sociazion Prema Sai Organization onlus endreza "Music for love", conzert lirich de benefizenza con la sopran Katia Ricciarelli, l tenor Luca Canonici, l bariton Bruno Praticò, al piano Vincenzo Irelli. Prejenta l'ator Ivan Bellandi. Ge vel prenotèr al 333 3374768.

Religion
Di dla solidarietà
N dumënia ai 24.3. iel te nosta Diozeja l "Di dla solidarietà". L KVW de Urtijëi nvieia a fé pea la Santa Mëssa te dlieja de San Durich dala 9.00 daduman. Te Sëlva nvieia l KVW a fé pea la Santa Mëssa dala 9.30 te dlieja dla Madona te Sëlva.
Prozesciun cun Les Staziuns da Badia a Oies
I grups di Ministranc y dla Schira Jonila Val Badia, adöm cun le grup dles families dla Unité Pastorala, organisëia indoman sabeda ai 23 de merz la prozesciun cun Staziuns da Badia a Oies.
An pëia da calonia demez dales 14:45 por rové sö ala santa mëssa che sará dales 16:00. Dedô aorela cörta y pice buffet. Düc, spezialmënter families cun sü mituns, é dër bel inviá.
Iade da Padre Pio dala Val Badia demez
Al vëgn indô organisé n iade a Padre Pio. An pëia ia tla Val Badia la sabeda ai 27 d'aurí 2019 dales cater da doman da Corvara demez, por jí cina a San Giovanni Rotondo, olache an stará cina en mertesc ai 30 d'aurí 2019. Por informaziuns y prenotaziuns: tel. 0474 520013.

Sport
24ejim Sellaronda Skimarathon
Ncuei vënderdi ai 22.3. dala 18.00 pieràl via te Sëlva dal purtoi Biancaneve 1200 schialpinisć per fé la raida ntëur al Sela, sun de ndut 42 km de purtoies cun 2700 metri de deslivel. Garejà vëniel for a pères, sibe pra i ëi che pra l'ëiles. I miëur schialpinisć sarà ënghe inò leprò y ntëur la 21.00 aspiteràn sun Plaza Nives te Sëlva bele sun i prims che ruverà te travert.
Sëires de volley
Uni mierculdi dala 20.15 inant tla palestra dl ITE pieta la Nëus Jëuni la sëires de "pallavolo". Duc ie nviei de cuer a unì a fé pea. L ie debant y n ne à nia drë de se lascé nuté su.

Avisc
Cena pureta a Poza
En sabeda ai 30 de mèrz da les 7 da sera te oratorie de Poza l Grop Miscionarie Freinademetz-Mato Grosso endreza la Cena pureta. La proponeta per l temp de careisema é dedichèda chest an a la sensibilisazon per no trèr demez la roba da magnèr. Sarà la testimonianza di volontadives de la sociazion "Fassa Solidale". Duc é envié de cher.
Ejames de ladin
L'é avert i termins per se scriver ite ai ejames de ladin ti desvalives livìe. La domana cogn ruèr ite dant dai 29 de mèrz, portèda a man te Comun general o manèda ite per fax, racomenèda con avis de retorn o posta eletronica zertifichèda enjontan l rezepis de paament. Info e formulères te Comun General o a l'albo de l'ent.
Audizions del conseier ladin Luca Guglielmi
L conseier ladin Luca Guglielmi tol dant la jent ogne lunesc h. 9.15 te Comun de Mazin, h. 10.15 te Comun de Ciampedel, h. 11.15 te Comun de Cianacei; ogne vender h. 9.15 te Comun de Sèn Jan, h. 10.15 te Comun de Soraga e h. 11.15 te Comun de Moena.
Se scrì ite al proiet da d'instà SAKL
Per Sureghes, Runcadic, Bula, n lunesc ai 25.3. dala 8.00 tl ufize dla NJG - dajon ora i numeri dala 7.30. Per S. Cristina n merdi ai 26.3. dala 15.30 tla Bibliotech Tresl Gruber - dajon ora i numeri dala 15.00. Per Urtijëi n mierculdi ai 27.3. dala 8.00 tl ufize dla NJG - dajon ora i numeri dala 7.30. Per Sëlva n vënderdi ai 29.3. dala 15.30 tla Scola Mesana de Sëlva - dajon ora i numeri dala 15.00. La iscrizions di partezipanc vën mé tëutes su per i luesc scric dant!
La Cripl dla Pascion tla dlieja de Urtijëi
Nchin ai 21.4. iel da pudëi amiré daujin al Drap dla Pascion da Sacun nce la "Cripl dla Pascion" tla Capela dl Sacro Cuer de Gejù tla dlieja de Urtijëi. Chësta mostra la vita de Gejù dala nasciuda nchin ala mort y ressurezion. Vijita acumpanieda for de merdi dala 5 ala 6 domesdì y plu avisa ai 26 de merz, ai 4 y ai 16 de auril.
Ancunteda dl KVW per vëidues, vëiduns y jënt sëula
N dumënia ai 31.3. dala 9.30 nchin la 15.00 tl Forum a Persenon saràl chësta ancunteda a livel provinziel a chëla che l KVW nvieia duta la jënt sëula o resteda da sëula. Per mëter a jì l viac deberieda pòssen cherdé su: per S. Cristina Paula Demez tel. 339 5876970; per Urtijëi Adriana Kostner tel. 0471 797307 o 333 7402739 nchin ai 27.3..
Detlarazions dla chëutes
Bel plan iel inò da pensé ala detlarazions dla chëutes. L KVW fej a l savëi che per la detlarazions de davani (mod. 730 o mod. davani 19) ie si ufize per l aiut n cont dla chëutes gën a despusizions. N prëia bel de fé ora per tëmp y ëura n terminn te un di ufizies dl KVW. Chësc pòssen resservé nstësc, 24 ëura sun 24 y zënza messëi aspité giut al telefonn, sot a www.mycaf.eu. Sambën iel inant mesun fé ora l terminn per telefonn, cherdan su l 0471 941 704.
Borsa de lëur per studënc
Chieres'a n lëur? O es'a n lëur da pité a studënc dla tlo? Jan ite sun la plata www.njg.it posses crì o pité n lëur ntan dut l ann dajan ite ti dac. Nvion duc y dutes a se nuzé de chësc servisc. N possa nce passé diretamënter te ufize dla NJG, ulache duta la dumandes y pitedes de lëur vën publichedes sun na gran tofla. Per nfurmazions plu avisa: tel. 0471/799006 o info@njg.it.
Primules por n bun fin
Les Patrones da San Martin mët da jí la venüda de primules, a bëgn dla Südtiroler Krebshilfe. Les primules vëgn venüdes te düc i trëi paisc dl comun da San Martin, en sabeda ai 30 de merz y en domënia al 31 de merz, dagnora do mëssa.
Iscriziuns ala Scora de Musiga Val Badia
Les iscriziuns por l'ann de scora 2019/20 pó gní fates tratan le mëis de merz cina ai 29.03.2019. I formulars é da ciafé tl secretariat dla Scora de Musiga a La Ila o te internet sot a www.musikschule.it. Por informaziuns telefonede al 0471/847748.
Udiënzes dla Uniun di Ostis
La Uniun di Ostis HGV tëgn udiënzes ince tla Val Badia, vigni secundo y cuarto lönesc dl mëis, dales 16.00 ales 17.00 tla ciasa de Comun a Badia.
L'Ofize de "Ëres dëida Ëres"
L'ofize a Bornech é da ciafé tla str. Paul von Sternbach nr. 6, info.bruneck@frauenhelfenfrauen.it. Al é davert dal lönesc al vëndres dales 8.30 ales 11.30. Fora de chësc orar, vëgnel tut sö termins sön prenotaziun. Tel. 0474/410303.
Le "Grup Sportif dl Cör Val Badia" s'incunta
La ginastica é vigni lönesc dales 18.00 a les 19.00, te palestra da San Martin. Le grup é por porsones cun problems al cör, aritmies, presciun alta, operaziuns, angina pectoris y ater. Düc pó gní pormez a odëi y porvé fora. Cost: 150,00€ al ann. Al vëgn garantí la presënza de n dotur. Referënt é Markus Winkler. Infos: Markus al 338/5867867 o le coordinadú Renato Paratscha al 348/7457309.
Sentada generala dla Uniun Sport San Martin
La Uniun dl sport diletantistich da San Martin inviëia düc sü mëmbri y düc i simpatisanc al'indunada generala che gnará tignida en sabeda ai 30 de merz dales 20.00, tl salf dla Cassa Raiffeisen a San Martin. Te chësta ocajiun gnarál indô lité le consei diretif nü.
Mercià de roba durèda
La parochia de Poza endreza per trei setemènes dai 18 de mèrz te Oratorie de Poza l marcià de la roba durèda da les 14.30 a les 18.00. Chi che à ciuzé, guanc, jeghes e libres en bona condizions pel tor contat con Fernanda al 345 7077741. La bonamans jirà al Grop Freinademetz Mato Grosso.
Enscinuazions a Cistà
La sociazion de joegn INOUT endreza en domenia ai 31 de mèrz da les 20.30 te Oratorie de Poza la prejentazion del program de scomenzadives per l'istà per i joenec dai 12 ai 16 egn. Se pel se enscinuèr dal sit internet www.inoutfassa.com.
Prejentazion de ISTAGRAN
La sociazion de joegn INOUT endreza en mèrtesc ai 26 de mèrz da les 20.30 te Sorastanza de Sèn Jan la prejentazion del nef projet ISTAGRAN per i bec dai 6 ai 11 egn che tol l post de Istà per i bec.

Referac
L daunì dla Dlieja
N mierculdi ai 27.3. dala 20.00 te calonia a Urtijëi nvieia l KVW al referat cun l prof. Paul Renner sun "à pa la Dlieja mé cumpetënza tres l passà?" Soziologs, esperc d'economia y d'autri dij la sia n cont dl daunì. Cie possa pa vester drët, cie pudons'a avisé, à pa la Dlieja da dì velch de mpurtant per l daunì dl'umanità y tla Tiera?
Impresciuns da n iade tl Namibia
Le KVW da La Val inviëia a na serada cun Albina Sottara, dal titul "Impresciuns da n iade tl Namibia: jënt contënta, tiers salvar y desert che ne se röia nia". Al sará da odëi fotografies y impresciuns viüdes de porsona. L'apuntamënt é por en mercui ai 3 d'aurí dales 20:00, tl salf dles manifestaziuns da La Val.
"Le dër re dles Dolomites"
En mercui ai 27 de merz dales 20:30 él tla Ciasa dl Parch a Al Plan n referat cun David Vallazza, dal titul "Le dër re dles Dolomites: le variöl da sas tl Parch Natural Fanes-Senes-Braies". Dlungia informaziuns sön les carateristiches y le comportamënt de chësc gran vicel da rapina, spligará le referënt ince l'ecologia dl variöl da sas tl Parch natural Fanes-Senes-Braies. Referat por talian.
S. Martin: referat "Wofür es sich lohnt"
Le Consëi de Cöra da San Martin inviëia en mercui ai 27 de merz dales 20:00 tl salf di stödafüch dl paisc a na sëra cun le degan siur Josef Knapp, dal titul "Wofür es sich lohnt": chi che i vá do a süa misciun á deplü dla vita. La serada vëgn tignida tl salf di stödafüch a San Martin.

Televijion y Radio
RADIO
"LADINIA LIVE": Microfons davierc sun atualità y cultura
La trasmiscion ie da audì uni merdi y mierculdi dala 13:45 ala 14:00 sun la frecuenzes de RAI LADINIA
La trasmiscion "DAI CRËPS DL SELA" ie da audì uni di dala 19:05 ala 19:30 sun la frecuenzes de RAI LADINIA
Vender, 22 de merz - Massa fulestieres te nosta valedes?
N filmat ulache n vëija n purtoi straplën de schiadëures à fat rujené truep ultimamënter y l ie unì su la dumanda sce nosta valedes suporta pa tan de fulestieres. Sons'a sussot y/o safuions'a te nosc turism? Chësc argumënt se damanda sambën respostes, ma la soluzions ne n'ie nia dan man. Persones de turism dij si minonga. Trasmiscion de Simon Moroder.
Sabeda, 23 de merz - Momënc de vita – intervista a Giuvani Pescollderungg
Giuvani Pescollderungg é nasciü a La Ila tl 1937 y al á studié por deventé maester de scora elementara. Giuvani Pescollderungg é sté maester de scora por agn alalungia a La Val y a Al Plan de Mareo. Al nes cunta de süa esperiënza sciöche maester y dles sodesfaziuns che al á albü. Giuvani á ince döes gran pasciuns: jí sö por munt, fotografé la natöra y scrí. N program de Erika Castlunger.
Domenia, 24 de merz - Agorà: scioldi y cuntentëza (prima pert)
Argumënt de chësta trasmiscion ie i scioldi y dut cieche se raida ntëur al'economia. Iela pa propi nscila che scioldi porta daniëura cuntentëza o ie pa i scioldi la basa de nosta sozietà.
A chësta y mo deplu dumandes cëla l cumerzialist Hugo Perathoner de dé na resposta purtan argumënc cuncrec ma nce filosofics. Trasmiscion de Ivan Senoner.
Lunesc, 25 de merz - Chemun de Urtijëi
L chemun de Urtijëi y si lëur aministratif: nuviteies, proiec y atività tl rëndicont dl ambolt Tobia Moroder. Program de Leo Senoner.
Mercui, 27 de merz - La Bolifa: Tania Detomas la via del yoga e meditazion
La Bolifa tiza ite insnet idees per proèr a lascèr lèrga a la pesc, la respirazion, yoga e meditazion. Cinzia Pistoia é jita a chierir Tania Detomas che à troà tel yoga e la meditazion sia libertà. Program de Anna Mazzel.
TELEVIJION
Mertesc, 26 de merz dala 20:50 - Natura e ambient: L sciudament de la tera sul teritorie da mont
L sciudament de la tera l moscia sie grievia conseguenzes te dut l mond ma che el pa dò a sozeder de spezifich chiò da nos? Co vegnei pa monitoré chisc mudamenc e colugn ei pa i indicatores che segna chisc cambiamenc sul teritorie da mont? Program de Cinzia Pistoia, camera e tai Fulvio De Martin, a cura de Anna Mazzel.
Mercui, 27 de merz dala 20:50 - Turism tla Ladinia: paurs che laora pro i lifc
Da canche nosta sozieté á metü man da se svilupé tla direziun dl turism, éra mudada radicalmënter te püch tëmp. Impó vëigon che ince danter i jogn ne n'él tröc che á ligrëza y pasciun por la vita da paur. La desfida aldedaincö n'é nia ma chëra de mantigní chël che é, mo suradöt de fá a na manira che al paies la mëia le porté inant ince por les generaziuns che vëgn do. Program de Karin Pizzinini, camera y tai Fulvio De Martin , a cura de Anna Mazzel.
Juebia, 28 de merz dala 20:50 - Euro – trasmiscion d'economia
Program de Diego Clara y Hartmann Mairhofer, a cura de Leo Senoner.

Informaziuns plü menüdes söi programs radio y televijion de RAI Ladinia pôn ciafè sön www.raibz.rai.it – Sun l medem sit i programes TV sarà da vedei sota "Mediateca" y les trasmiscions radio sota "Podcast".

Mostres y Ert
N percors sciamanich tel bosch de Beuys
Tel Museo d'Èrt Contemporana de Ciavaleis l'é la mostra "Walking in Beuys woods" rencurèda da Antonella Palladino e Elio Vanzo: n percors de Hannes Egger sul troi de Joseph Bauys, anter om e natura, te n prozess de consaputa e varijon. Averta de sabeda e domenia h. 15.30-19.00.
Mostra di studenc de la Scola de Fascia
Anché, vender ai 22 de mèrz da les 16.00 a les 18.00, l'é l'ultim dì che se pel veder la mostra "Naufragio a Crycoal" de la Scola Ladina de Fascia te Sorastanza a Sèn Jan.
"Dimensions" de Markus Gasser
L artista de Persenon che à fat la Scola d'Ert a Urtijëi y pona l'Accademia Brera a Milan, se à ti ultimi ani dat ju cun l cë, cëves che se rejona y à ravises tla tiera. La mostra te Tublà da Nives resta davierta nchin ai 14.4. da merdi nchin dumënia dala 16.00 nchin la 19.00. De lunesc iela stluta. Nfurmazions plu avisa sot a www.tubladanives.it
"Mort y Ressurezion" de Viktor Senoner
L artista de Urtijëi se à dat ju te n valgun chedri cun l tema "mort y ressurezion" aposta per chësta mostra, che ie da udëi tla Catedrela de San Vigilio a Trënt, tla Aula San Giovanni. La mostra resta davierta nchin ai 30.4. uni di dala 9.00 ala 12.00 y dala 14.30 ala 20.00.
Parassit
La Lia Mostra d'Ert/Circolo à metù a jì nce chëst ann na mostra dl cunsëi cun lëures de Adam Demetz, Sophie Eymond, Johannes Herster, Mirko Insam, Andreas Mayr Kondrak, Medea Moroder, Fabio Perathoner, Simon Perathoner, Christine Runnggaldier y Sofia Stuflesser, chëst iede cun l argumënt "parassit". La mostra a Urtijëi ie mo da udëi nchin ai 24.3. uni di dala 10.00-12.00 y 16.00-19.00.
La operes de Schweizer a Tanart
A la galarìa Tanart, te Strèda Roma 66 a Cianacei, enscin ai 31 de mèrz l'é fora la operes del cognosciù artist da Primier Riccardo Schweizer. La galarìa é averta dal mèrtesc a la domenia da les 10.30 a les 12.30 e da les 16.00 a les 19.30. Info: 0462 602428 o 3408194060.

Iadi, jites y escurscions
Cures y palsa a Abano Terme
Al vëgn organisé n iade de 8 dis a Abanto Terme, dai 5 ai 12 de ma. Le cost é de 620,00€ a ce te ciamena dopla (690,00€ te ciamena da un n let). Prenotaziuns anter i 20 d'aurí pro Monica Costa al 0474/590069.
Jita al „Play festival del gioco"
N sada ai 6.4. furnea la lia Trix a Modena ala majera fiera dl juech dla Talia. Duc i nteressei ie nviei a unì pea. Pià via vëniel dala 6.30 per ruvé de reviers ntëur la 22.00. Per nfurmazions o per se lascé nuté su, cherdé dala Nëus Jëuni Gherdëina, tel. 0471 799006.
Cun i jëuni a Nobls
Cun i jëuni dl "Saut" y la grupa SKJ de Urtijëi "Jez kimmp's" jons dai 18. ai 20.4. tla cësa a Nobls, ulache stajeron deberieda sëurantulan respunsabltà, mparan a cunëscer si cunfins y se devertian, jan ala scuvierta dla natura demez dala cosses da uni di. I dis ie pensei per nasciui/des ti ani 2002/2005. Iscrizions da Sabrina, tel. 371 316 4572 o saut@njg.it. Priesc 40 €.
Instà cun l "Saut"
L local di jëuni SAUT mët a jì per d'instà de plu viages: dai 20.6. ai 24.6. al Donauinselfest per i jëuni da 18 a 22 ani; dai 29.7. ai 2.8. viac cun l ABO+ per jëuni dla scoles mesanes; dai 26.8. ai 30.8. viac ne sé ulà, per jëuni y jëunes da 15 a 17 ani. La iscrizions vën tëutes su da Sabrina, tel. 371 3164572 o saut@njg.it.

Sozial
Scontrèdes de auto mutuo aiut
La sociazion Rencureme, col patrozinie del Comun de Sèn Jan, à endrezà na lingia de scontrèdes de auto mutuo aiut con la psicologa Cristina Rizzi per familières e care giver de persones con demenza. L'enconter che vegn sarà en mercol ai 17 de oril h. 20.30 te Ciasa de Noscia Jent a Poza.
N percors per lascèr de fumèr
L Servije Dependenzes de Fascia e Fiem, col sostegn de l'APSS, endreza n percors per lascèr ló de fumèr: dai 15 ai 18 de oril a l'Istitut La Rosa Bianca de Pardac e dai 6 ai 9 de mé te la Caserma di Studafech de Ciampestrin, da les 20 a les 21.30. Info e iscrizions: donatella.vanzetta@apss.tn.it o martina.volcan@gmail.com.
Portel de referiment sozièl
Ogne mercol da les 16:00 a les 18:00 te Comun general, te strèda di Pré de Lejia a Sèn Jan vegn metù a jir n portel de referiment sozièl, per problemes de dependenzes o de autra sort, avert a duc e no a paament. Ge vel se prenotèr. Per informazions chiamèr l 370.3004296 o scriver a: sportello.lerais@gmail.com.
Orar nü dla "Portina por l'assistënza y la cura te Raiun Sozio-Sanitar Val Badia"
L'ofize dla "Portina por l'assistënza y cura", tl'alzada a tera é davert da aurí 2019 inant trëi iadi al'edema: le lönesc dales 14:00 ales 16:00, le mercui y la jöbia dales 10:00 ales 12:00, tel. 0474 586123 tratan chisc orars. An ciafa informaziuns de düc i sorvisc, dles poscibilités de sostëgn y alisiramënt, di aiüc esistënc, di dërc y dovëis, dl sostëgn finanziar, yii. y dëida fá de vigni sort de domandes y d'atres pratiches burocratiches.
Vëdui, vëdues y porsones sores: incuntada a Porsenú
51a Incuntada di vëdui, vëdues y porsones sores tl KVW en domënia, ai 31 de merz, dales 9:30 a Porsenú tl Forum, cun mëssa da festa, referat de Rudi Gamper cun le moto "Sag einfach danke". Domisdé aurela cörta cun le grup de teater. Prenotaziuns cina ai 27 de merz pro les surastantes dl KVW de paisc. La marëna costa 15€.
Orar dl bus: Corvara 7:00, la Ila 7:10, Pedraces 7:20, Pidrô 7:30, Picolin 7:40, Longega 7:50.
Se dajon na man
Istituzions de Fascia e Fiem endreza 3 scontrèdes de formazion sul sostegn te la comunità da les 20.30. Insnet, ai 22 de mèrz te sala del Consei de Comun de Moena su l'acolienza; ai 29 al Zenter Charlie Brown a Pardac sul volontariat e ai 5 de oril, endò te Comun de Moena, sul se meter en jech. Info e enscinuazions al Servije sozièl del Comun General.

Temp lede
Spring Race Party
Duman sada ai 23.3. saràl inò la garejeda cun juesc da Secëda ju nchin a Urtijëi. La grupes pierà via dala 12.30 inant y se fermerà pra la uties a fé juesc drët da rì. Tl travert sun la pitla plaza S. Antone saràl dala 14.30 inant la Race Party cun DJ Ondy y DJ Simon y n giaperà nce da bever y vel' piculëza da maië. Duc ie nviei a unì a cialé, fé pea y a se devertì deberieda.
Jí cui schi da sëra
En mercui ai 27 de merz dales 20:00 ales 22:00, án la poscibilité da jí por l'ultim iade cui schi ince da sëra, sön la pista Doninz tl zënter da La Ila. Por podëi anuzé le lift, mësson avëi na cherta dai schi de plü dis.
Roda dles saús
L'edema dedicada ales spezialités tradizionales a Badia vá inant cina en domënia ai 24 de merz. Te cin' üties tl raiun dai schi da La Crusc podarán ciarcé n taí tipich cun n bun gote de vin dl Südtirol. Al ne manciará nia musiga te val' ocajiun.
La Ila: l'ora dles stories
En lönesc al 1. d'aurí dales 15:00 s'incunton te biblioteca a La Ila, olache al vëgn lit dant stories a mitans y mituns da 2 a 5 agn.

Dotors y Apoteches
Dotors
L dutor de servisc te Gherdëina da n sada ai 23.3. dala 8.00 daduman nchin la 8.00 daduman de n lunesc ai 25.3. ie l dutor Valentin Tröbinger de Sëlva, tel. 0471/773073 o l 335 6844944.
Doturs Val Badia. Ti comuns de Corvara, Badia y La Val él en sorvisc tl fin dl'edema di 23 y 24 de merz le dotur Letterio Taormina, La Ila, tel. 375/6261774. Ti comuns de Mareo y San Martin él en sorvisc le dotur Edoardo Agreiter, San Martin de Tor, tel. 0474/523315 o 333/1380852.
Apoteches
L'apoteca che ie de servisc per Gherdëina, ora dl orar ordiner de giaurida, da n vënderdi ai 22.3. nchin n vënderdi ai 29.3. ie chëla de S. Cristina, tel. 0471/792106 o 333/1776615 (orar de giaurida 8.00-12.00/15.00-19.00).
L'apoteca en sorvisc tla Val Badia, fora dl orar ordinar, dal vëndres ai 22 de merz dales 19:00 al vëndres ai 29 de merz ales 19:00, é chëra da San Martin/Picolin, tel. 0474/523020.

Galaria retrac