Manifestazions atuales speziales

Data

22 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 22 de merz
L turism tla Dolomites tl 2030
Descuscion tl'Aula Magna dl ITE "Raetia" n mierculdi ai 27.3. dala 9.00
Duc i nteressei ie nviei de cuer a unì a scuté su la descuscion, ulache n rujenerà coche n se nmagina, coche n vëija danora l turism tla Dolomites tl 2030, dla pusciblteies y ndesfidedes.
L rujenerà pea pra la descuscion l ambolt Tobia Moroder, Harald Pechlaner, Andreas Sanoner dl hotel Adler y Michil Costa dl hotel La Perla a Corvara.
La manifestazion fej pert di "Dis dl turism" metui a jì dal ITE "Raetia" ntan chësta ena, cun workshops, referac de esperc y vijites a vel' hotel.

Rolston String Quartet
Cunzert n mierculdi ai 27.3. dala 20.30 tla Cësa de Cultura de Urtijëi
L cuartet cun vidules, viola y cello stlujerà ju la lingia de cunzerc di Jëuni de Mujiga de Gherdëina dla sajon 2018/19.
L Rolston String Quartet ie unì metù su tl 2013 dai canadejes Luri Lee, Emily Kruspe, Hezekiah Leung y Jonathan Lo. Ëi à bele venciù plu pesć pra cuncorsc nternaziunei y à sunà tla sales da cunzert dl Canada, di USA, danter l auter tla Carnegie Hall a New York y dl'Europa zentrela. L cuartet à nce laurà deberieda cun artisć y cumponisć cunesciui. L inuem se ài dat do l violinist canadesc Thomas Rolston. Luri Lee sona sun na vidula de Carlo Tononi, che ti ie unida metuda a despusizion da Shauna Rolston Shaw. L cuartet ie nce unì cris ora da Simone Gramaglia dl Quartetto di Cremona per l proiet" Dimore del Quartetto".
Pra l cunzert a Urtijëi sunerài l "cuartet dl levé dl surëdl" de Joseph Haydn, la "Metamorphoses nocturnes" de Ligeti y l cuartet per archëc Op. 51 nr. 2 de Brahms.

Teater te Sëlva
N pez particuler, cun trëi atëures a mez al publich, che fej terapia per crì soluzions a si problems
Bele da n pez incà vëniel fat proes per l pez tla rujeneda tudëscia dl autor Daniel Glattauer dal titul "Die Wunderübung". La regia ie de Emanuel Demetz y i atëures ie Mjriam Novelli, Emanuel Demetz y Ingrid Mussner.
Coche dit iel na reprejentazion mpue particulera y perchël ie duc i amanc dl teater nviei a se seguré na lerch bele danora, ajache l ie mé 80 posć.
L pez unirà mustrà l prim iede n juebia ai 28.3., dopro saràl mo da udëi n sada ai 30.3., n merdi ai 2.4., n juebia ai 4.4. y n sada y dumënia ai 6. y 7.4. for dala 20.30 te calonia de Sëlva.
Chertes danora da Minishop te Sëlva, tel. 0471 794085.

Dajon nce nëus na man per la nrescida
N vënderdi ai 29.3. sun la Pitla Plaza S. Antone a Urtijëi
N chësc vënderdi saràl ntan dut l di na mëisa ulache ulenteres dl'AIL sezion de Bulsan venderà de biei ueves da Pasca de ciculata.
AIL ie na assoziazion per la nrescida sun la malaties dl sanch coche leucemies, linfoms y mieloms. Chëst ann iel 50 ani che l ie unì metù su chësta lia tla Talia. Tlo tl Südtirol se òvel metù adum tl 1997 na grupa de ulenteres, parënc de amalei, dutores y persones che lëura te chësc ciamp, per mëter a jì na tel sezion. AIL à finanzià te duc chisc ani proiec de nrescida che à purtà pro a fé de gran vares inant per chësta malaties, à judà a njenië ite l repart de ematologia de Bulsan a na maniera che i amalei possa śën sté plu saurì y ti dà nce n sustëni ala families.
Nëus de Gherdëina ulon ënghe judé pea cun chësta azion y rengrazion bele danora.

La Giatiscima 2019
L'Uniun Sport La Ila y la Scola de Schi da La Ila inviëia düc chi da La Ila ala Giatiscima 2019, en domënia ai 31 de merz. En recort de Edo Agreiter y Sepl Rottonara
L'incuntada cun i schi dales pels é dales 7:30 jödapé dl lift de Gardenacia y la gara de schi mët man dales 9:30, tres sön la pista de Gardenacia. Do la gara é düc i iscric inviá tla Ütia Florian sö Plaön ala premiaziun y ala trata dla ola dla fortüna. Da davagné sarál n iade, n bun pér de schi, n schipass Alta Badia por la sajun 2019/2020 y tröc d'atri bi pesć.
Düc chi da La Ila che ne fej nia la gara de schi, é dër bel inviá da se scrí ite por podëi tó pert ala ola dla furtüna y ala marëna tla ütia. Les iscriziuns vëgn tutes sö pro la Scola de Schi da La Ila al 0471/847258 cina en sabeda ai 30 de merz anter les 12:00. Informaziuns plü menüdes ciafon ince sön www.uslaila.it.

"Na cëna (perfeta) da temëi" o... massa cöghes rovina la jopa
L'Uniun dl Teater da San Martin inviëia da gní a ti ciaré al teater da rí de Marc Camoletti y Michael Niavarani
N fin dl'edema romantich cun l'amanta te n pice chalet, tratan che la fomena é a ciafé süa uma; al sona dër bun, mo sce n teater mët man insciö, él bëgn feter da s'aspeté, che "na cëna perfeta" devënta... "da temëi"! Y tosc él la cöga che savaia d'ester na modela y aturia, na modela che mëss cujiné na cëna tailandeja, y n om stressé sö pro, che prô da ti cacé sö, dan dai edli de süa fomena, süa amanta a so plü bun compagn, che é instës l'amant dla fomena. Ince na baujia indolatra, por porvé da salvé la situaziun y da se gorné les trëi ëres, ne jô nia, deache "massa cöghes rovina la jopa"... y nia ma la jopa.
Jobleri é Christian Clara, Melanie Clara, Roland Flöss, Sabine Castlunger, Anna Deiaco y Daniele Pescollderungg. La regia é de Matteo Rubatscher.
Rapresentaziuns
Les rapresentaziuns vëgn tignides te salf a San Martin de Tor. Premiera é en vëndres ai 29 de merz dales 20:00; les atres rapresentaziuns é la domënia ai 31 de merz dales 20:00, le mercui ai 3 d'aurí dales 20:00, la sabeda ai 6 d'aurí dales 20:00 y la domënia ai 7 d'aurí dales 15:00.
Prenotaziuns
Les chertes pó gní apostades danfora al 333/4768558 (SMS o WhatsApp). Le teater é dejaconsié sot i 12 agn.
Aron Demetz tl dialogh cun Alexander Tinei
Giaurida dla mostra n sada ai 30.3. dala 19.00 tla Galaria Doris Ghetta a Puntives Sud 8
La Galaria Ghetta gëura chëst ann si program cun doi mostres persuneles te n dialongh, cun i artisć Aron Demetz y Alexander Tinei. Dan la giaurida, dala 17.48, nvieia Aron Demetz mo a jì a ti cialé a si atelier a Puntives Nord 13, ulache l sarà mesun dé na udleda a si maniera de lauré criativa.
Do la bela mostra tl museum de archeologia a Napoli, ulache Aron Demetz à metù si lëures a cunfront cun la scultures y i esponac storics, à l artista ntan l ultim ann crià na lingia de lëures defin nueves. La Galaria Doris Ghetta se ncunforta à prejenté chësta opres d'ert, a chëles che l se jonta ite i lëures de pitura dl artista dla Moldavia, Alexander Tinei, che viv y lëura tla Ungaria.
Duc ie nviei de cuer ala giaurida y a unì a t cialé ala mostra, che resterà davierta nchin ai 20 de mei.