Manifestazions atuales speziales

Data

05 de auril 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 5 de auril
Duc "Supereroes" sun Ciampac
En domenia ai 7 de oril "Destroy the Winter"
Gran festa chesta domenia sun Ciampac per l'event che sera sù la sajon en colaborazion con Katsuto, Canazei Events, Scola de Schi Cianacei Marmolada, Fabio & Mirko e Val di Fassa Lift.
L tem chest an l'é "Supereroi", duc pel se regolèr aldò e chi che se enscinua i ciapa na bela maia da "Supereroe" e i pel tor pèrt a la gran endesfida: sutèr sorafora la nodadoa de 23 metres con schi, brees o etres mesi. Dapò premiazion con de bie pesć e musega con DJ DANY e DJ DENNY.
La families con bec podarà se goder tel parch di jeghes "Ciampark" e con l'animazion de Marijene – picoi da mont.
Forenadoa fin les 18.30 con park gratis, biliet rebassà a 7 euro e debant sot i 14 egn; marena a 15 euro ti refuges Tobià del Giagher, Baita Valeruz e Crepa Neigra.
Su www.valdifassalift.it e www.destroythewinter.com informazions e formulèr per se enscinuèr: i joegn sot i 18 egn cogn l desćiarièr e l consegnèr a l'info point sotescrit da duc 2 i genitores.
Su Facebook l'event Destroy the Winter 2019 "Supereroi".

"Sciöche tl cil, insciö söles munts"
Chësc le titul dla proieziun de fotografies cun Georg Kantioler, un di premiá pro le "Wildlife Photographer of the Year". L'apuntamënt é por en jöbia ai 11 d'aurí dales 20:30, tl Istitut Ladin "Micurá de Rü" a San Martin de Tor
Le Fotoclub Val Badia á le plajёi de invié a na proieziun de fotografies dl fotograf Georg Kantioler. Al é na bela ocajiun da odëi fotografies dla natöra de n livel dër alt, y le tema che al á chirí fora é "Sciöche tl cil, insciö söles munts". Georg Kantioler fej pert di fotografs dla natöra "Strix", á davagné pesć a livel internazional y á ince dé fora libri dla natöra.
Le team dl Fotoclub s'la inconforta da podëi Ves saludé ala serada.

S'orëi bun, se respeté, se pordené
Le KVW y la Cöra da La Ila inviëia a n referat cun siur Tone Fiung, sön la vita de copia
"Vita de copia: s'orëi bun, se respeté, se pordené": chësc é le titul de n referat cun siur Tone Fiung - referënt dla Diozeja por le matrimone y la familia, che á dé fora plü libri. Le referat é en mertesc ai 9 d'aurí dales 20:00, tla scora mesana da La Ila. Düc é bel inviá a chësta sëra cun discusciun, metüda da jí dal KVW La Ila adöm cun la Cöra da La Ila.

Stënteste da dormí?
"Stënteste da dormí? Sëgn ói ciafé finalmënter na soluziun!" Chësc le titul de n referat, en mercui ai 10 d'aurí dales 20:00, te biblioteca a La Ila
Ci ó pa dí dormí indortöra? Ci ó pa dí dormí assá? Tröpes porsones á dificolté cun le dormí. Le dormí é n elemënt fondamental por nosta sanité fisica y psichica tla vita da vignidé. Porsones che stënta da dormí prô gonot fora de vigni sort, da produc naturai a medejines, da momënc de relassamënt a mudé la manira de mangé. Nia tres ne ciafon atira la dërta soluziun y nia vigni soluziun vá bun por vigni porsona.
L'ester bogn da dormí y lapró dormí saurí, depënd da tröc faturs de nosc stil de vita y dl ambiënt incër nos ia. Sce les regoles dl "bun dormí" ne vëgn nia respetades, spo pó chësc gonot porté pro a ne ester nia plü bogn da dormí indortöra.
Tratan la sëra nes cuntará la psicologa dra. Antonietta Mastrandrea ci che an pó fa por mioré le dormí te na manira scëmpla y ütla. Le referat vëgn organisé dal Consëi de Formaziun de Badia.

32. Roda de Col Toronn
La schitour por scuadres de trëi porsones vëgn metüda da jí en domënia ai 14 de aurí
Ara é indô tan inant. La domënia ai 14 de aurí vëgnel metü da jí sön la Munt de Fanes la 32. Roda de Col Toronn. La gara por scuadres da trëi porsones pëia ia dales 9:30 pro la Ücia de Fanes y al sará da despassé n percurs de 8 km, cun n deslivel de 450 metri, cun travert tla medema ütia. Al sará cin' categories: ëres, ëi cina 100 agn deboriada, ëi cun passa 100 agn deboriada, ëi cun passa 150 agn deboriada y scuadres dl aiüt alpin (che á da despassé staziuns tecniches). L'iscriziun costa 40,00€ por scuadra (45,00€ al start) y pó gní fata tl ofize turistich d'Al Plan anter le vëndres ai 12 de aurí. Telefon 0474/501566, mail info@sanvigilio.com. Iló ciafon ince infos plü menüdes.

Deberieda per la vita
Cunzert a fin de bën n lunesc ai 15.4. y n merdi ai 16.4. dala 20.00 tla Cësa de Cultura a Urtijëi
Problematiches sozieles y la mujiga: bele d'autonn iel unì scumencià cun n proiet per i sculeies dla tlasses de mujiga dla Scola Mesana de Urtijëi deberieda cun i Helios y i mujizisć Tobias Dellago, Günther Demetz y Gregor Pasolli. Ntan i doi dis de cunzert lascerà, duc deberieda y nce te grupes despartides, audì cianties plu y manco cunesciudes cun cuntenut soziel y che fej pensé do, ora dl repertore Pop y Rock. Cuordinadëures dl proiet ie la nsenianta de mujiga Donatella Valletta y la dirighënta di Helios Irene Kostner.
Ciantà vëniel per n bon fin y cie che l unirà dat de bona man pra i cunzert, unirà dat inant ala Lia Sustëni ala Vita, che à daniëura urëdles y uedli davierc per chëi che à de bujën de aiut.

Cajónes y Opas Diandl da aldí te SaJ.un
Incö ai 5 d'aurí dales 21:00 inant él indô la 1.st.friday.live.session@saj.un tl Zënter Cultural SaJ.un a La Ila. En chësc iade cun i Cajónes de Fascia y le stil particolar di Opas Diandl
Chësta sëra aldiarán le grup Cajónes, n terzet acustich metü adöm da trëi jogn de Fascia. Da cianties di agn '60 fina a toc musicai d'aldedaincö, sarál da aldí n program plajor y da tröpes variaziuns.
Le conzert jará inant cun le grup südtirolesc Opas Diandl che sona y cianta da diesc agn incá sön paladines dl Südtirol, mo nia ma. Cun le tëmp ái svilupé so stil de musiga, moscedan le iodelné cun le punk y le stil folk cun la musiga classica. Vigni musizist porta ite sü influsc musicai a na moda da formé na musiga plëna de energia y emoziuns.

Conzert gospel "Hymns of worship"
Le cor Kyrios inviëia dër bel a so conzert, adöm cun le Vinzentiner Knabenchor da Porsenú, na orchestra cun apresciapüch 30 musizisć y na band
En chësc ann se mostra i Kyrios te na manira n pü' desvalia al publich: ai sará da aldí cun i mituns y i jogn dl Vinzentiner Knabenchor da Porsenú, na orchestra cun plü o manco 30 musizisć, y na band. L'idea da mëte adöm i dui cors Kyrios y Vinzentiner Knabenchor, portada dant da so dirighënt Andrea Tasser, é atira gnüda tuta sö cun entusiasm nia ma da pert dl comité mo da düc i mëmbri dl cor Kyrios. Chësc proiet á na gran importanza por trami i cors sides a livel musical co ince sozial. N ciantarin di Kyrios dij insciö: "A me me sál beliscim da fá musiga y da cianté adöm cun mi compagns. Spo sce an cianta val' iade cun d'atres porsones che an ne conësc nia ciamó y che á ince magari n'atra eté, mo che partësc la pasciun por la musiga, spo me sál ciamó plü interessant, deache an pó ince imparé dër tröp dai atri".
I dui cors gnará acompagná da na orchestra che tol ite deplü stromënc: vidora, viola, violoncello, cuntrabas, fabló traversal, oboa, clarinet, cor, trombëta, posauna y tuba. Fora de chësc sarál da aldí na band cun na chitara eletrica, n bas eletrich, n clavier, n "synthesizer", na bateria y deplü sorts de percusciuns.
Ti ultims mëisc se á i stromentalisć incunté regolarmënter de sabeda por porvé i toc. Ai á desmostré n gran impëgn, desponibilité, lezitënza y motivaziun da imparé ite le program nia tan saurí, sciöche sambëgn ince düc i ciantarins di dui cors.
Do avëi fat por plü mëisc proes despartides ti singui grups, se á spo i Kyrios, le Vinzentiner Knabenchor, l'orchestra y la band incunté tratan i dis de proa düc adöm tl Vinzentinum, olache an á spo metü adöm les usc y düc i stromënc.
I cater grups metüs adöm pitará n program religius cun cianties gospel inglejes, che lalda y glorifichëia le Signur. I tesć alza fora la gran fortüna che i un da podëi cunté sön Chël Bel Dî, so aiüt y süa misericordia. Les cianties ó partí cun le publich i valurs de nosta religiun: la speranza de podëi ponsé a na vita do la mort, na pésc sota che vëgn ma da Idî, y suradöt l'amur de Gejú che á dé ca la vita por nos y é mort por nos sön la crusc.
Le conzert gnará tigní indöt trëi iadi: vëndres ai 12 de aurí dales 20.00 y domënia ai 14 de aurí dales 18.00 tl Parzivalsaal dl Vinzentinum y ciamó n iade mercui ai 17 de aurí dales 20:00 tla Ciasa dla Cultura a La Ila. I Kyrios cun amisc se conforta da se odëi tröc! (Maria Kostner y Simona Ploner)

Curs de tennis
Dai 18. ai 27.4. tl zënter dal tennis a Runcadic
L Tennis Club Urtijëi mët a jì cursc de tennis per mutons y mutans da 6 nchin a 14 ani cun l maester Alberto Cestarollo.
l cursc ie da n juebia ai 18 de auril nchin n sada ai 27 de auril, per i pitli for dala 9.00 danmesdì y per i majeri for dala 10.00 danmesdì. L priesc per de ndut 8 ëura ie de 60 €.
Se scrì ite pòssen tl zënter dal tennis a Runcadic, cherdan su l 0471 797275 do la 14.00 o scrijan a info@tennis-valgardena.com. Nfurmazions giapèn dal maester Alberto cherdan su l 338 7048909 o scrijan a albertocestarollo@hotmail.it.