Manifestazions atuales speziales

Data

10 de mei 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 10 de mei
Conzert d'aisciöda dla Müjiga Calfosch-Corvara
La Müjiga Calfosch-Corvara tëgn le conzert en vëndres ai 17 de ma, sot ala bachëta dl dirighënt Gerhard Mohr
Le conzert mët man dales 20:30, tl salf dles manifestaziuns Franz A. Rottonara a Corvara cun le toch »Tannhäuser« de Richard Wagner por passé ala »Festive Overture«. »Dichter und Bauer« é le titul dl toch che gnará porté dant dala Müjiga denanche al ti vëgnes surandé les onoranzes a n valgügn mëmbri. Tla secunda pert podarán aldí toc plü moderns sciöche »My Way«, la composiziun »The Greatest Showman« tuta dal film cun le medem inom y les plü beles melodies di films d'animaziun dla Walt Disney cun »Disney Fantasy«. La Müjiga Calfosch-Corvara stlüj jö le conzert cun la marcia »Alpenwelt«. Düc é bel inviá da gní a ascuté sö y passé na serada en compagnia.

I ëi en prozesciun da Porsenú a Neustift
L'Uniun di Ëi (kmb) dla Val Badia inviëia, en lönesc ai 13 de ma. Al vëgn organisé na coriera dala Val Badia demez
Düc i ëi y jogn é inviá da tó pert ala prozesciun cun linternes o ciandëres (da se tó para), en lönesc ai 13 de ma dales 21:00. An pëia ia da Porsenú (plaza Acquarena) y an jará por za. n'ora cina Neustift, olache al vëgn dit la santa mëssa.
Al vëgn organisé na coriera dala Val Badia. Chi che oress jí para dess s'anunzié pro le surastant de paisc o pro Salvester Vittur al 333 7247516 anter incö vëndres ai 10 de ma.
Orars dla coriera: 18:45 a San Ciascian (stödafüch); 18:50 La Ila (plaza dl Ladinia); 19:00 Badia (dan Comun), 19:15 Pidrô (dan le Posta); 19:20 Picolin (burcia San Martin); 19:30 Longega.

Mujiga eletronica sperimentela
N sada ai 11.5. dala 18.00 tla sala dl Circolo a Urtijëi
La Lia Mostra d'Ert/Circolo mët a jì tla sala dla mostres a Urtijëi sun Plaza S. Antone n cunzert de "experimental electronic music". Se nuzan de aparac eletronics de uni sort cëla i musicisć de ti dé ite ala mujiga fazions de sonn particuleres, che porta pro a n stil de mujiga defin autramënter.
I musicisć che à bele sperimentà chësc stil, chësta maniera de fé mujiga ie Davide Gheno, Mirko Insam, Stefan Moser, David Rainer, Simon Senoner y Benjamin Stuppner y ëi lascerà audì n sada sëira ai 11 de mei na cërcia de pec y cumposizions.
Duc ie nviei a unì a scuté su. La ntreda ie liedia.

Mont de Sëuc Balance
A Ciastel, Sëuc, Fie y Tiers, dai 6.5. nchin ai 29.6.2019
Avenimënc top per na ansciuda plëina de atività y sanità.
Manifestazions desferëntes che à da n fé cun muvimënt che fej bon al corp, na spëisa sana y se refé tla natura da d'ansciuda ie la fundamënta ideéla per pië via de viers dla sajon ciauda.
Sibe che la se trate de na spazireda daduman cun n bon gusté, de n viac tl mond dla ierbes y craitles, de n bani tl bosch o n pandalanuef bon y sann, unirëis for acumpaniei da esperc.
Manifestazions y events n chësc cont n iel uni ena nchin ai 29 de juni 2019 ti luesc de Ciastel, Sëuc, Fie, Tiers y sun Mont de Sëuc. L ie da se lascé nuté su danora tla Lies dl Turism dl raion Mont de Sëuc. Cuntat Seiser Alm Marketing; info@seiseralm.it, tel. 0471 709600.
Nfurmazions y l program plu avisa ie da udëi sota a www.seiseralm.it/balance

L vën cialà do la bombules da destudé l fuech
Duman sada ai 11.5. tl magasin di Destudafuech de Urtijëi
Nëus destudafuech raton che l sibe de gran mpurtanza avëi te cësa na bombula da destudé l fuech, da tò ca riesc te n cajo de bujën y pudëi nsci schivé suvënz n majer dann. Y acioche la bombula sibe bën da pudëi avëi canche l romp ora n meldefuech, cunsions de la lascé cialé do regularmënter.
I Destudafuech de Urtijëi pieta nce chëst ann l servisc de cialé do la bombules y plu avisa duman sada, ai 11 de mei, dala 8.00 nchin la 12.00 y dala 13.00 nchin la 15.00 tl magasin di Destudafuech tla streda Purger a Urtijëi.

"Nebula"
I studënc dla Scola d'Ert "Cademia" gëura si mostra n lunesc ai 20.5. tl Circolo a Urtijëi
Nëus dla 5. tlasses dla Scola d'Ert "Cademia" de Urtijëi, meton a jì na mostra sot al inuem "Nebula". Te chësta metons ora nosc lëures coche simbul de nosc percurs de maduranza di ultimi cin' ani. Ve nvion de cuer a nosta vernissage n lunesc ai 20 de mei dala 16.00 tla sala dla mostres dla Lia Mostra d'Ert/Circolo a Urtijëi.
La mostra resterà davierta nchin ai 26 de mei, uni di dala 10:00-12:00 y dala 16:00-19:00.

Pec dl museum che va a cuer
L Museum Gherdëina nvieia al "Di nternaziunel di museums" n dumënia ai 19 de mei
L moto da chëst ann ie "I Museums y la tradizion viva!". N ucajion dl "Di nternaziunel di museums", cun di dla porta davierta, vëniel pità da uni ëura vijites menedes per granc y pitli, cun la grupa nueva che à fat pea l curs de furmazion y che fajerà cunëscer a na maniera nterativa pec reprejentatifs per la storia, natura y cultura de Gherdëina. L sarà nce l'ucajion per n dialogh persunel y co crì su ubiec di museums de Südtirol tl catalogh online.
L Museum Gherdëina sarà daviert n dumënia ai 19.5. dala 14:00 nchin la 18:00.
La ntreda ie debant!
Ve aspiton y se ncunferton sun vosta vijita.

»La musiga cunta...«
Conzert d'aisciöda dla Musiga da La Val, indoman sabeda ai 11 de ma
La Musiga da La Val cun so presidënt Markus Complojer inviëia bel al conzert d'aisciöda, indoman sabeda ai 11 de ma dales 20:30, te palestra da La Val. Sot la bachëta de Stephan Ploner gnarál porté dant tla pröma pert dl conzert la »Fanfare No. 3« de Haydn Wood, »Cassiopeia" de Carlos Marques y »Pompeji« de Mario Bürki. Cin' toc gnará pitá tla secunda pert: danter chisc »Taktgefühl« de Martin Rainer, »Baba Yetu« de Christopher Tin (ar. Jay Bocook) o »Danubia« de Julius Fucik. Danter la pröma y la secunda pert sarál l'ocajiun da surandé valgünes onoranzes.

Classich incunta modern
La Musiga d'Al Plan inviëia a so conzert d'aisciöda ai 18 de ma da sëra, le pröm iade sön paiun de paisc
»Classical music meets modern sounds«. Chësc é le titul y motto dl conzert d'aisciöda dla Musiga »Catarina Lanz« d'Al Plan, che sará da aldí en sabeda ai 18 de ma dales 20:00, sön paiun de paisc. Le program pîta indöt 8 toc, dal classich modern, che gnará en pert ince acompagná. Sön paladina sarál insciö i solisć Sofia Pisching (sopran) y Damiano Colombi (tenor) y la band cun Daniel Willeit (keyboard), Patrick Pedevilla (chitara) y Victor Obojes (bas). Danter la pröma y la secunda pert gnarál surandé valgünes onoranzes. L'entrada al conzert é lëdia, por na spënora vëgnel rengrazié. Le preisdënt Samuel Winkler y le dirighënt Georg Plazza se conforta da ves saludé.

De Internazional tl Museum Ladin
Ai 19 de ma, cun entrada debann. Al vëgn pité manifestaziuns particolares, te intrami i museums: a San Martin y San Ciascian
A San Martin pitunse la rapresentaziun teatrala »Stachio n'ó nia partí«, n teater por pici y gragn sot ala rejia de Erika Castlunger. Les rapresentaziuns é dales 14:30 y dales 16:30.
A San Ciascian presentunse dales 14:30 la publicaziun por mituns nöia dl Museum Ladin, dal titul »ANDER – le gigant dles Dolomites«. Le ilustradú Emil Valentini dessëgna dal ví imajes fora dal liber, dedô pón pastelné mascores dla laurs »Ander« cun materiai dla natöra. Le devertimënt por döta la familia é garantí.
Les entrades y i programs é debann. L'orar de daurida é dales 13:00 ales 18:00.

»I sun nasciüs por ester contënc«
Capí nosc corp, relaziuns y emoziuns, se sté bëgn y lauré sön se instësc. A Calfosch cinch incuntades cun la meta-medejina
Le Consëi de Formaziun inviëia a de plü incuntades, olache ara nen vá dla meta-medejina. Le pröm iade é en vëndres ai 17 de ma dales 20:00, tla Ciasa Tita Alton, palestra a Calfosch. L'animadëssa Rossella Schneiter-Malpangotti presentëia la metoda dla meta-medejina tres emoziuns y sintoms. Chësta sëra é debann.
Inant vára ai 18 y 19 de ma cun cater workshops pro la Pensiun Edelweiss a Calfosch. Chisc i temesc: 1. workshop: Capí i messaji de nosc corp; 2. Se sté mal cun les emoziuns, se sté inré fisicamënter – relaziuns; 3. Vire o suravire; 4. Reconësce y trasformé les ecuaziuns dla memoria emozionala«.
Le pinsier che stá doía é che la porsona pó fá val' por cambié, lauré sön so »lingaz« tres i sintoms dl corp. P.ej.: lauré sö n preiudize o pinsier negatif pó daidé sté damí, mioré le raport cun nost y cun i atri. Informaziuns y prenotaziuns pro Alessandra Rossi al 339 3671571.

Guido Tavella: mostra a Bornech
La mostra dl artist da La Val é metüda fora cina ai 31 de ma tla Raiffeisen Galerie
L'artist Guido Tavella da La Val mët fora sües operes te na mostra particolara, arjignada ite tla Raiffeisen Galerie a Bornech, str. Europa nr. 19. Tles operes él da odëi n bel moscedoz di stils che Tavella á porvé fora te süa ativité artistica lungia: natöra morta, portraits, contrades, motifs da ciacia y operes astrates. La mostra é da odëi dai 10 cina ai 31 de ma, cun chisc orars: lönesc, mertesc, mercui y vëndres dales 8:00 ales 12:30 y dales 14:30 ales 16:30; la jöbia dales 8:00 ales 12:30 y dales 17:00 ales 18:30.