Manifestazions atuales speziales

Data

17 de mei 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 17 de mei
»Sherlock Gnomes« a La Ila
Proieziuns cinematografiches a La Ila, incö vëndres ai 17 y en vëndres ai 24 de ma, dales 17:00
Le Consëi Cultural dl Comun de Badia inviëia da gní a ti ciaré al film »Baby Boss«, incö vëndres ai 17 de ma dales 17:00, tla Ciasa dla Cultura a La Ila. Le film vëgn mostré incö, deache le iade da denant n'éra nia garatada. Na secunda proieziun sará spo en vëndres ai 24 de ma dales 17:00, tres tla Ciasa dla Cultura. En chësc iade sarál da odëi le film animé »Sherlock Gnomes«.

Classich incunta modern
La Musiga d'Al Plan inviëia a so conzert d'aisciöda, indoman sabeda ai 18 de ma da sëra, le pröm iade sön paiun de paisc
»Classical music meets modern sounds«. Chësc é le titul y motto dl conzert d'aisciöda dla Musiga »Catarina Lanz« d'Al Plan, che sará da aldí indoman sabeda ai 18 de ma dales 20:00, sön paiun de paisc. Le program pîta indöt 8 toc, dal classich al modern, che gnará en pert ince acompagná. Sön paladina sarál insciö i solisć Sofia Pisching (sopran) y Damiano Colombi (tenor) y la band cun Daniel Willeit (keyboard), Patrick Pedevilla (chitara) y Victor Obojes (bas). Danter la pröma y la secunda pert gnarál surandé valgünes onoranzes. L'entrada al conzert é lëdia, por na spënora vëgnel rengrazié. Le preisdënt Samuel Winkler y le dirighënt Georg Plazza se conforta da ves saludé.

De Internazional tl Museum Ladin
En domënia ai 19 de ma, cun entrada debann. Al vëgn pité manifestaziuns particolares, te intrami i museums: a San Martin y
San Ciascian
A San Martin pitunse la rapresentaziun teatrala »Stachio n'ó nia partí«, n teater por pici y gragn sot ala rejia de Erika Castlunger. Les rapresentaziuns é dales 14:30 y dales 16:30.
A San Ciascian presentunse dales 14:30 la publicaziun por mituns nöia dl Museum Ladin, dal titul »ANDER–le gigant dles Dolomites«. Le ilustradú Emil Valentini dessëgna dal ví imajes fora dl liber, dedô pón pastelné mascores dla laurs »Ander« cun materiai dla natöra. Le devertimënt por döta la familia é garantí.
Les entrades y i programs é debann. L'orar de daurida é dales 13:00 ales 18:00.

Maratona por escurjonisć »Tru di pra«
Le paisc da La Val, reconesciü sciöche tera de escurjionisć, organisëia la sabeda al 1. de jügn por le cuarto iade na picera maratona por düc i amanc dla natöra
Pro chësta maratona ne cunta nia tan le tëmp, mo deplü la belëza dla contrada y i corusc dla natöra, che an pó amiré tratan chësc de, sciöche ince vire momënc liá al monn ladin. Dales 9:00 pëion ia dal zënter dl paisc por jí cuntra S. Berbura, Ciablun, Runch y Biëi, rovan cina sö dala Crusc da Rit, por jí spo cuntra Ciamplorët. Da chiló demez do le tru nr. 15B röion cina sö La Crusc, por gní fora y jö por i pra de Armentara cina Al Bagn y zoruch te paisc. La lunghëza dla maratona é de 26,6 km por n deslivel de 820m. Tres le percurs él plü staziuns, olache al vëgn dé fora da mangé y da bëre y olache al ne manciará nia intratignimënt y ativités. Da doman pón tó pert al gosté vital cun produc locai y da sëra vëgnel stlüt jö le de cun na cëna te salf dles manifestaziuns y musiga de n DJ. Implü vëgnel metü a desposiziun n sorvisc de trasport, por chi che oress fá n percurs plü cört. Les iscriziuns por la maratona é de 65,00€, y ares vëgn tutes sö por e-mail a laval@altabadia.org o diretamënter sön la plata internet www.laval-altabadia.com

Operes de Otto Irsara
Le Consëi Cultural tl Comun de Badia inviëia ala mostra de Otto Irsara de Michîl. Incö vëndres la daurida
Incö vëndres ai 17 de ma dales 18:00 vëgnel daurí tla Ciasa J. B. Runcher a Badia na mostra de operes dl artist defunt Otto Irsara de Michîl. La mostra vëgn metüda a jí dal Consëi Cultural tl Comun de Badia. An podará jí a ti ciaré dai 18 ai 26 de ma dales 10:00 ales 12:00 y dales 16:00 ales 19:00.

Proieziun »Adöm tl dagní«
Annamaria Pernstich y Valter Pallaoro, en jöbia, ai 23.05.2019, dales 20.30, tl Istitut Ladin »Micurá de Rü« a San Martin de Tor
Le Fotoclub Val Badia á le plajëi da Ves invié, en jöbia ai 23 de ma dales 20:30, tl Istitut Ladin »Micurá de Rü« a San Martin de Tor, a na proieziun de fotografies di fotografs Annamaria Pernstich y Valter Pallaoro. Le tema sará »Adöm tl dagní«; ai nes condujará tl monn di tiers y an podará odëi che ai laora cun gran pasciun amesa la natöra por arjunje n livel dër alt tl monn dla fotografia. Le team dl Fotoclub s'la inconforta da podëi Ves saludé.

Jogn danter dietes y palestra
Le Sorvisc ai Jogn inviëia al referat »Il culto del corpo–giovani tra diete e palestra«, ai 22 de ma tl Saj.un a La Ila
Raffaela Vanzetta dl Forum Prevenziun (Infes) portará dant en mercui ai 22 de ma dales 20:00 tl Zënter dla Jonëza y dla Cultura SaJ.un n referat sön le tema »Il culto del corpo–giovani tra diete e palestra«. Ara baiará dles tendënzes atuales y cai che é por jones y jogn i prighi coliá a chësc tema. Geniturs, insegnanc y düc i interessá é dër bel inviá.

Rumon su nosc luech
L Chemun de Sëlva deberieda cun la Lia per l Turism nvieia nce chëst ann a fé pea pra l di ecologich n sada, ai 25 de mei 2019
N se anconta te Sëlva, dan la Cësa de Cultura "Oswald von Wolkenstein", dala 8.00 daduman.
Tlo saràl i destudafuech y i stradins de Chemun, che cuordinerà l'azion, metan adum la grupes y les destinan ai ridli. Ëi partirà ora a duc chëi che vën a fé pea, sac, manëces y n gurmel (che l Chemun à lascià fé aposta per chësta azion), dan che n pierà ora per l luech a tlupé su l refudam lascià ncantëur.
Duta la lies, assoziazions y duta la jënt de Sëlva ie drët bel nvieda a judé pea a rumé su nosta Sëlva!

Pec dl museum che va a cuer
L Museum Gherdëina nvieia al »Di nternaziunel di museums« cun di dla porta davierta, n dumënia ai 19 de mei dala 14:00 nchin la 18:00
La ntreda ie debant!
Program per granc y pitli. Tres dut l domesdì vëniel pità per granc y pitli na raida tres duta la culezions dl Museum per mparé a cunëscer cun l aiut de materiai nueves i pec reprejentatifs dla Natura, Storia y Cultura de Gherdëina y dla Dolomites!
L sarà nce l'ucajion per n dialogh persunel y per scuvierjer i ubiec dl depot tres l catalogh KIS (Kulturgüter in Südtirol) online.
L'azion vën realiseda dala grupa nueva per la mediazion culturela che à fat pea l curs de furmazion.
Ve aspiton de trueps y se ncunferton sun vosta vijita!

Se scrì ite al FC Gherdëina
Uni vënderdi nchin ala fin de mei ta la plaza dal sport de Urtijëi
L FC Gherdëina fej a l savëi che duc i nteressei, mutons y mutans, che ulëssa gën pratiché l sport dl juech dala codla ie nviei a unì a se lascé scrì ite pra l club.
Nce per chëi che fej bele pert dl club iel inò da se scrì ite per la sajon 2019/20.
La iscrizions vën tëutes su tla cësa dl club pra la plaza dal juech al palé de Urtijëi, uni vënderdi nchin ala fin de mei, ai 17.05. – ai 24.05. – ai 31.05. for dala 17:30 nchin la 19:00.
Per nfurmazions cherdé su Christof Rifesser, tel. 3707003788.

Rujenon dl'Europa
N lunesc ai 20.5. dala 20.30 tla Cësa de Cultura a Urtijëi
Amez ite danter doi cultures y doi raions economics ti à la Comunità Europea purtà vantajes cuncrec y mpurtanc ala jënt dl Südtirol. La veles che ie śën dan porta, arà scialdi da n dì per coche la jirà inant cun l'Europa. La se trata al didancuei plu che zënza de abiné sinergies y de crië perspetives nueves. Per chësta ucajion uel la SVP nvië duc canc a na sëira de descuscion n con' dl'Europa.
Do la paroles de salut uniràl fat na ntroduzion al argumënt "Rujenon dl'Europa: ciuldì che l cunvën cuncretamënter a fé pert dl'Europa".
Herbert Dorfmann rujenerà dla ndesfidedes y pusciblteies dl'Europa.
Da dedò passeràn ala descuscion.
Nuzëve duc de chësta ucajion per ve nfurmé y rujené pea.

Reunion generela dl Schi Club Gherdëina
N merdi ai 21.5. dala 20.00 tla gran sala dl Chemun de S. Cristina
L Schi Club nvieia duc i nteressei a si reunion generela, ulache l unirà nce unerà i atlec che se à fat merit ntan la sajon passeda.
Do la paroles dla presidënta Lidia Bernardi y dla autoriteies prejëntes, uniràl mustrà n pitl film dai caposezion, che prejenterà la disciplines defrëntes y nce la sezion sport dl ITE. Inant jiràla cun la pert ufiziela, cun protocoi, rëndicont y dé pro di conc. N passerà pona ala descuscion te sala, ulache duc ie nviei a dì la sia y a fé prupostes. N ultima saràl mo la uneranza di atlec y stlut ju vëniel cun n pitl buffet per sté mo mpue n cumpania.

»Run the world (Girls)«
Giaurida dla mostra coletiva n vënderdi ai 24.05. dala 19:00 tla Galaria Doris Ghetta a Puntives/Urtijëi
Bele per l cuarto iede vëniel giaurì tla galaria Doris Ghetta a Puntives/Sud, na mostra de grupa, chëst iede dut cun artistes ëiles ora dl ambient dl'ert nternaziunela, danter chëstes nce Barbara Tavella dla Val Badia.
La mostra dal titul Run the word (Girls) – nce titul de n video de Beyoncé y che fej referimënt nce a cianties y films dl mond dl spetacul – ie dedicheda al'ëiles o plu che auter o coche l'ëila y si feminilità vën rafigureda al didancuei dala artistes de nosc tëmps. La mostra vën cureda da Adam Budak y Sabine Gamper y l sarà da udëi lëures de Alketa Ramaj, Barbara Gamper, Barbara Tavella, Pakui Hardware, Sari Ember, Ursula Mayer y Valentyna Janu.
Duc ie nviei de cuer ala giaurida cun performance de Barbara Gamper cunzepita aposta per chësta ucajion. N puderà mo jì a ti cialé ala mostra nchin ai 20 de lugio 2019.