La Usc di Ladins

Can aede scomenzà a jir stroz a far i Trei Rees?
Chest l'é l 5° an. Dut l'é nasciù beleche per n sgherz coi Bontemponi. Roberto Florian l'à dit che assane podù jir a far i Trei Re dai autres de la compagnìa. Aon tacà noi trei (Thomas, David e Roberto), se aon emparà la cianzon classica, l'an dò l'é vegnù ence Leo e Vincenzo Rasom a far i pastres e ciantar e dapò l'é ruà ence Massimo Dondio Macia. Pian pian l'é doventà na roba seria... Chest an se à jontà ite Pierpaolo Rasom, Marco Forian e ence Stefano Lazzer, coscì se mencia un o l'auter podon istesc far le ciantie a trei ousc, e col mus depent de neigher l'é Antonio al post de Roberto che l laora.

Ciantade per fascian o per talian?
Fajon 2 cianzon per fascian, chela classica di Trei Re e »L'é nasciù l Divin Bambin« con le parole fasciane adatade da na cantia franzousa, e 5 per talian. Ge aon domanà al maester Stefano Lazzer che l ne deide, aon troà fora ence ciantie n muie veie, desché »Viva il Celeste«: su la part l'é scrit 1866, la era stata portada da Simonin de Ciout e la jent più de età i se la recorda e ge sà bel la sentir ciantar. Ence chesta l l'à metuda jù Stefano a trei ousc.