La Usc di Ladins

En jebia ai 12 e en vender ai 13 de mé la 6 clas prumes di trei licees de Fascia à tout pèrt a na atività dassen gustegola endrezèda a Sèn Jan tel pra apedejù la senta de l’Union di Ladins de Fascia. En colaborazion con la Biblioteca de Cianacei e sie bibliotecarie Daniele Verra i studenc à podù descorir, tras n dialogh avert, l roman per joegn gregn (per ingleis ‘young adult)’ "M.J. Viver al temp del malac". La scontrèda à serà su n curt percors de reflescion pontà via te scola che à revardà l temp del lockdown.

L liber l é stat dat fora da l’Union di Ladins a la fin del 2020 ampò, a cajon di tempes ries de la pandemia, no l é mai stat prejentà ofizialmenter al publich. Se trata de n roman scrit da 10 joegn scritores fascegn: ogneun scrif na pèrt de la storia, spartida apontin de diesc capitoi. L projet l é nasciù da Daniele Verra, ades bibliotecarie de Cianacei, che à tegnù l’enteressanta scontrèda.

M.J. l é Mary Jane, na tousa da Cianacei che te sia joeneza à da ge fèr front a n temp dassen senester, chel de la pandemia. La joena vif desvaliva esperienzes uniches, che ge dèsc l met de crescer e de entener l’emportanza de la picola robes.

Su La Usc stampèda de vender ai 20 de mé se pel lejer de più su la scontrèdes coi studenc.
L roman, per poder se oujer a n publich maor, l é scrit tant per ladin che per talian e l é stat prejentà chisc dis passé da l'Union di Ladins de Fascia ence a Cianacei, semper en colaborazion con la Biblioteca. L liber é a la leta te senta de l'Union a Sèn Jan.

 (Nicoletta Riz)