La Usc di Ladins

No l é tempes storics sorii chi che sion do a passèr fora. Dant l malac da Covir 19 te dut l mond, dapò la vera te l’Ucraina che à endò vedù omegn che cogn ciapèr te man la èrmes e femenes, chiò sun usc de l’Europa, che cogn se n sciampèr dalonc per chierir de portèr al segur si bec.

Te chest chèder fosch i studenc de la Scola Ladina de Fascia à metù ensema n nef numer de Filoreflex e do l numer 9, che l era demò online, chesta edizion da cedean arà endò sia bela viesta de papier.

L titol cernù chest’outa l é »Donne: lavori in corso« e i articoi ne porta dant l davegnir de la femenes con na veièda piena de speranza e da desvalives ponts de veduda. 

La soracuerta de Andreas Rizzi ne recorda ogne sort de violenza contra la eles, che ge nea l derit de revendichèr sia identità e degnità e daite la rubrica de sondajes Radar ne met dant i dac su la condizion de la femenes.

Etres articoi declinea l besegn de na maor conscidrazion de la eles te ogne ambient, da la politica a la scienza, enscin a l’èrt e la musega.

Chest numer, che la redazion à volù ge dedichèr en particolèr a duta la eles che à vivù o é do a viver conflic de ogne sort, l sarà prest a la leta te la Scola Ladina de Fascia e se podarà l domanèr ence te la senta de la redazion de La Usc di ladins a Sèn Jan. 

Podarede descorir de più te na intervista a componenc de la redazion su La Usc stampèda de vender ai 10 de jugn.  (Lucia Gross)