Nutizies dal Aiut Alpin Dolomites

Data

31 de messel 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N fin dl’ena cun scialdi note, cun vel’ ntervënt sa mont y nce sun streda. Nsci àn danter l auter nce messù fé n ntervënt pra n camion cun petoniera che se à drusà sun streda de Tluses. L dutor ie stat bon de jì ite te cabina per judé l sciafer, ntan che i destudafuech à taià la banda per pudëi pona l tò ora.
Puech do ie ruveda ite na cherdeda per gauja de un dala roda che ie tumà furnan da Plan de Gralba ju. Doi ntervënc iel stat per reazions alergiches n sada dan otodì. 
La prima a Fie, pervia de n pic de n’eva, la segonda a Sëuc, sun l ciamp dal palé. Riesc do à cherdà i Judacrëp de Gherdëina che l fova da jì a tò n’ëila de 44 ani de Roma sun l troi sot ala Fermedes ite, ulache la se à nzutà y fat mel ala ciavidla. Cun ot metri de binda iesen stac boni de la tré su tl joler. Sun l tert domesdì àn pona mo messù tré su doi persones te joler. Dut chësc pra la utia Scotoni, sot al plu bel temporal. Dala undesc da sëira àn pona mo messù julé te spedel cun na americana de 23 ani, che ie unida meneda sot da n auto, y chësc nia dalonc dala zentrela dl AAD, plu avisa a Runcadic.
N dumënia ai 24 de lugio àn danmesdì messù julé sun Furcia. N turist de Bologna ne se n stajova nia drë’ bën. Do marënda pona na cherdeda per n ntervënt a Curvea. Un dala roda, che furnova da Ciaulonch ju, ie tumà burt y se à fat n drë’ mel. Al jëunn de 23 ani ti iel unì cunstatà n politrauma.
Dan la ot da sëira pona, iel stat da ntervenì sun la streda de Colfosch, ulache n jëunn badiot, che avisova n quad, se à drusà limpea y fova n fin de vita. L dutor à fat dl dut per l tré n vita, ma l ne n’ie nia stat bon de l varenté.
N lunesc àn messù jì a crì na persona ntëur la Furcela dal’Ega ju, tla grupa dla Odles. Do avëi cris n pez l’àn abineda sun na cresta drët strënta dlongia La Furchëta. Coche l uem à fat a ruvé iló su ne n’àn nia capì. Cun vint metri de binda l’àn pona trat su tl joler y tëut pea nchin tla zentrela de Puntives.
A Latzfons ie n mut tumà ju dal trampolin y l à batù cun l cë sun l peton. Giut alalongia iel restà iló da nescia. L joler dl AAD l’à menà cun si oma tl spedel de Bulsan.