La Usc di Ladins

L Liceo artistich l é na fojina de creatività, bona de slarièr fora sia gaissa e sie spirit de inovazion con efec positives ence sui etres Licees e sun duta la comunanza de Fascia. L é n conzet che é vegnù fora più outes ti doi dis de festa per i  80 egn (+1 a cajon del sburlament per la pandemia) de la Scola d’èrt de Fascia e che vegn confermà dal crescer de la iscrizions ence da man de studenc da fora de val che cern la Scola Ladina de Fascia. Na Scola che à vent l’endesfida no sorida del mudament e che é stata bona de portèr te n contest modern e contemporan i valores più classics de la storia de l’èrt e i temes de la tradizion del teritorie. 

Ades la veia Scola d’èrt ge à lascià l post al Liceo artistich: la senta storica, oramai fora da ogne norma, é stata batuda ju per n fèr su una neva più grana, lumenousa e moderna, che é stata averta d’uton del 2019, ma che à podù aer sia festa de inaudazion demò ades, apontin a cajon del Covid. 

»Tel ruèr ite te la neva senta - à dit l sorastant Federico Corradini – se troa amò chel sentiment de la fona tradizion artistica che viventèa sie fondator Giuseppe Soraperra e i dozenc che con el i à metù a jir n’azion didatica e culturèla amò anchecondì feruscola e bona de esser fontèna de ispirazion.«

Se zachei aea amò dubies, i à podù l veder con si eies en vender ai 21 de otober, canche la neva senta de Liceo artistich de Fascia a Sèn Jan ge à avert i ujes a duta la comunanza per festejèr l cedean da canche, del 1941, nascea ofizialmenter la Scola d’èrt te Fascia.

De più su La Usc stampèda de vender ai 28 de otober.  (Lucia Gross)