La Usc di Ladins

Do l bon ejit abù da la tradizionèla Festa del Rengraziament, l’atività de la sociazion va inant. De november ve sporjaron neva proponetes de cultura e gustegoi momenc de comunanza per ladin. 

En colaborazion col chef Stefano Ghetta e la joena Asia Corradi vegn endrezà n cors spartì te cater scontrèdes te la pruma doi setemènes del meis de november, per cognoscer rezetes per fèr pan te cèsa e consees e cunsć per miorèr vesc douces.

L an passà la sociazion aea portà na trentina de persones a Persenon e Neustift do la pedies del prum e soul prinz vescof ladin Daniel Zen: la scomenzadiva era stata dassen aprijièda e aane emprometù de endrezèr amò giornèdes de chesta sort. Belimpont ence chest uton ve porton dant na raida per descorir vèlch melaur, enst’outa te la Val Badia.

En domenia ai 13 de november se pea via da les 9:15 da Sèn Jan e se rua entorn les 11:00 a Ciaminades de Pedraces. Chiò l program perveit n confront te atelier su l’èrt e la poejia con la poeta de nonzech Roberta Dapunt e con sie om, l scultor internazionèl Lois Anvidalfarei. Da marena n bon bèst da paur lo dal Lüch de Survisc a Cians, La Val.

Do marena via, anter i colores più bie de la natura da d’uton, na raida sorida vidé dal president Fernando Brunel enscin a la gejia de Sènta Berbola, sora su l paisc de La Val. Entorn les 16:30 se é da nef lo dal mèsc de Survisc per n bon Törggelen e do se vegnarà de retorn te Fascia.

I posć é limité e i enteressé cogn se resservèr l post a l’Union di Ladins de Fascia al più pret e aboncont dant da en lunesc ai 7 de november (tel 0462 764545). L cost per chesta raida l é de € 50,00 a persona e l tol ite trasport e magnadiva.