La Usc di Ladins

Na gran sodisfazion rua ence al projet de la Scola Ladina “Filoreflex” l giornal rencurà dai studenc di Licees ensema a le professore Marianna Cadorna e Tiziana Natalicchio.

Tel meis de mé de chest an l é vegnù fora l numer 10, na edizion speziala dedicada a le femene, per sotrissar l ruol che le à tel mond te desvalives setores, n argoment che se sent rejonar de spes te maniere più o manco positive. I articoi scric l é l frut de dute le enrescide e i aprofondimenc fac dai bec, che à moscià na gran sensibilità envers l argoment. 

I tesć é stac scric per talian, ladin e ingleis, moscian estro de far passar a duc n messaje, ascorc de l’emportanza de l’inclujion e del respet per n mond global, ma se recordan ence de noscia realtà ladina per tegnir vif lengaz e cultura. 

Dute cheste carateristiche ge à fat vadagnar al projet l pest del concors nazional di giornai de scola ‘Penne sconosciute’, che la redazion  Filoreflex se à vadagnà con dut l merit e che l é stat dat su ai 21 de otober te la Toscana a Piancastagnaio (SI).

Complimenc donca al projet, a dute le studente e i studenc che seghitarà a endrezar neves articoi e a le professore che ge stasc apede.  (NL)