Döes ladines mëss tremoré: la 2a categoria vëgn emozionanta

Data

21 de mei 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Chësta domënia él les ultimes partides dl campionat de secunda categoria rode C. Por La Val y la Val Badia vëgnera dassënn strënta. Öna dles döes tomará dessigü jö te terza, tl piec di caji intrames. I ves dijun valgügn scenars poscibli
Tl rode C dla secunda categoria éra iniann plü che interessanta. Le Lijun á bele davagné le campionat 5 jornades dan la fin y jará porchël sö te pröma. Zitia vëgnera jödapé dla classifica, olache al é döes ladines che manacia da tomé zoruch te terza: La Val y Val Badia. Tignon cunt che les ultimes döes toma jö, él trëi scuadres che mëss trá fora i dënz: Val Badia cun 16 punc, Vandoies cun 15 y La Val cun 13. La Val Badia incunta chësc fin dl’edema le San Laurënz, Vandoies incunta Lijun y La Val incunta l’Alta Val de Puster. Dötes trëi les scuadres soga fora de ciasa y val’ é bele sigü: öna dles döes ladines sogará le proscim campionat te terza categoria. Stá ma a odëi ciüna.

La Val l’á dër ria
La pert plü ria á chi da La Val: sce ai parejëia o perd, tomi sigü jö te terza. La Val mëss davagné cuntra l’Alta Val de Puster y speré che la Val Badia perdes. Sce chësc sozeda, foss les döes ladines ala pér cun i punc y messass s’la soghé fora te na partida de dezijiun. Che che davagna, resta te categoria. Dessigü n derby interessant.

La Val Badia á les mius chertes
La Val Badia á les speranzes plü concretes da resté te secunda: sce ai ó se salvé dessigü, mëssel dé ca na devënta cuntra i pustri, deache cun 19 punc ési sön tera frëma. Sce ai arjunj n pér, spo mëss le Vandoies perde o parejé. La Val Badia pó cinamai ince perde, mo iló mëss intrames les atres döes scuadres ince jí a ciasa a mans ötes.

Le Vandoies mëss bate chi che n’á mai pordü
Le Vandoies podess se salvé sigü sce al davagnass la partida te ciasa dl Lijun y les atres ladines parejëia o perd. Indere: le Lijun é bele campiuns y n’á te chësc campionat pordü gnanca na partida sora. Te ciasa él cinamai dui agn che ai ne perd nia. Al é rî ponsé che ai ois se roviné la classifica pordon avisa cuntra öna dles ultimes. Dessot ciamó valgügn scenars de chëstes partides

Scenar 1 - Val Badia davagna: Sce la Val Badia davagna, spo arjunjera 19 punc y les atres döes scuadres n’á plü degöna chance: Vandoies y La Val toma jö te terza
Scenar 2 - Vandoies davagna: Sce le Vandoies davagna röiel a 18 punc. I pustri se salva dessigü sce la Val Badia parejëia o perd, deache iló él les döes ladines che toma jö.
Scenar 3 - La Val davagna: Sce La Val davagna, mëssel a vigni moda speré che la Val Badia perdes, por rové a na partida de dezijiun.
Scenar 4 - Val Badia perd, Vandoies parejëia y La Val davagna: Te chësc caje foss dötes trëi les scuadres cun 16 punc. Chësc ó dí che ares messass s’la fá fora te n torné triangolar. La scuadra che davagna resta te secunda, les atres döes toma jö.

Inscioma: n fin dl’edema plü che interessant por i apascioná dl palé. Les partides vëgn sogades en domënia ai 26 de ma dales 16:00: La Val soga a Toblach cuntra l’Alta Val de Puster y la Val Badia a San Laurënz cuntra la formaziun de ciasa. Al é rî da fá aodanzes, savon che öna na ladina tomará dessigü jö. L’aodanza plü neutrala é chëra che ares ne tomes nia jö intrames.


 (pablo)