Seconda maia roèna per Manuel Verra

Data

14 de jugn 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La 100 km dei Forti à segnà la seconda tapa del Zircuit Trentin. Sodesfazions per l Fascia Bike
A Lavarone en domenia ai 9 de jugn l’é stat la 100 km dei Forti, garejèda de roda da mont che se dejouc adertura da 24 egn. N clim ideèl à compagnà i atlec sul percors Marathon, lonch 94,5 chilometres con n dislivel positif de 2398 metres. Chi che volea, i podea ence dezider de scurtèr la fadìa, se jian l’endesfida sul percors Classic più curt caraterisà da na longheza de 51 chilmetres e n dislivel de 1199 metres.

La 100 km dei Forti la valea desche seconda tapa del Zircuit Trentin e, desche zenza, no l’é mencià la partezipazion di atlec del Fascia Bike. La maor sodesfazion é ruèda con Manuel Verra che l’é stat bon de scombater per posizions autes dal scomenz a la fin de la proa. Tinultima, l’atlet fascian à serà sù la proa Marathon col temp de 4 ores e 25 menuc, se vadagnan la 20^ piaza assoluta, la terza de categorìa M1 e la terza maia provinzièla de la sajon: dò de aer jà vent la maia de Campion Provinzièl te la spezialità UpHill e chela de leader del Zircuit, de gra a chesta prestazion Manuel Verra l se à trat ite ence la maia de Campion Provinzièl Marathon 2019.

Al start se à prejentà desche zenza ence l roman Valerio Bacchiocchi. Seran sù la proa Marathon te 5 ores e 12 menuc, l’atlet del Fascia Bike à desmostrà n bel miorament respet al temp de l’an passà. L se à coscita vadagnà l 10° post de categorìa M2, l’80° assolut e na bela sodesfazion personèla. Tinultima, a corer per la sociazion fascèna ence Claudio Pesaola che, ruan jà mingol destrametù dal Rally de Romagna, garejèda de 5 proes, l’à dezedù de ge fèr front al percors Classic: l’à serà sù te 2 ores e 51 menuc, 30° te la categorìa M2 e 203° assolut.

Doman, en sabeda ai 15 de jugn, sarà la Sellaronda Hero, garejèda che passa ence te val. I atlec ve envìa sul percors a i sostegnir e ge dèr na man, na spenta envers l proscim piz, la proscima erta, l proscim travert.


De più su la Usc nr 23 stampèda ai 14 de jugn  (Daniele Verra)