Turnoi ITF cun Erwin y Patric

Data

14 de agost 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L gran turnoi nternaziunel de tennis ITF ie te chisc dis a Santa Cristina. Manifestazion de sport, ma nce cun na gran fazion de marketing. I doi matadores raionei Patric Prinoth y Erwin Tröbinger tl tabelon prinzipel. Auti a lectrisc y pestech biodegradabl.

Ncuei mierculdi Erwin y Patric
N mierculdi ai 14 de agost ntëur la 11.15 scumenciova la partida de Erwin Tröbinger, da dedò la partida de Patric Prinoth.


Patric Prinoth y Erwin Tröbinger
Patric Prinoth à dit che l ti "sà bel a fé pea pra l turnoi tlo a cësa, dajeré sambën l mascimo, speran che la bute nce cun la cumposizion dl tabelon, che l ne sibe nia tan ncomper sciche l ann passà." Erwin Tröbinger à abù paroles de rengraziamënt per i urganisadëures, nce che l ebe "pudù fé pea tl tabelon prinzipel": "Spere de fé n saut permez al ann passà y de vëncer una na partida."

Cherc, semifineles y fineles
L turnoi va inant cun la partides dl tabelon prinzipel, n vënderdi iel i cherc de finela dl singuler y la semifineles dl dopl. N sada ai 17 de agost la semifineles dl singuler dala 10:00 inant, dala 15:00 la finela de dopl. La gran finela dl singul ie n dumënia dala 11.00. Dutes y duc ie sambën nviei de cuer a unì y a fé l tifo. Na nuvità ie che chiche vënc giapa nce 10 ponc ATP.

Auti a lectrisc y pestech biodegradabl
L diretëur Wanker à stlarì la mudaliteies dl turnoi, la cumposizions di tabelons, i orares de juech che muessa tenì cont nce dl tëmp che San Piere uel cunzeder, ma l à nce auzà ora l "Green Project Val Gardena": "On na natura y cuntreda scialdi bela che fej da curnisc al turnoi. Nscila ons nce ratà drët de tenì cont dl ambient y dl spirt vërt che l ie cun rejon al didancuei: i auti che mëina ncantëur i atlec va a lectrisc, per l maië ons chëst ann pestech de lën y taieresc biodegradabli."

David Lardschneider

FOTO: Atletes y atlec, trainadëures y autoriteies pra la cunferënza stampa a Santa Cristina.

Galaria retrac