Erwin y Patric: nia butà tl singul

Data

15 de agost 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Nia butà ne ti àla ai doi matadores raionei Erwin Tröbinger y Patric Prinoth ntan si doi partides de singul n mierculdi ai 14 de agost, pra l bel turnoi nternaziunel de tennis ITF a Santa Cristina. Erwin Tröbinger à perdù contra Tim Heger 6/2 6/3, Patric Prinoth contra Andrea Guerrieri 6/1 6/1. Dlongia la "desfertuna" de abiné doi averseres veramënter stersc, iel da auzé ora che i doi jugadëures jëuni sentiva mefun mpo deplù la tenscion, a fé n cësa, te Gherdëina, dan si jënt. N mierculdi fòvel veramënter na bela cumpëida de jënt a cialé pro. Y nce sce la ne ti ie nia jita fata de vëncer ai doi de Gherdëina, à duc chëi che cialova pro udù che la cualiteies ie tlo, l publich savova sambën nce che a fé a cësa iel mefun mpo plu rie. Plu butà ti àla n merdi tla partida de dopl, ai doi jëuni de Gherdëina: i à venciù te trëi set.

Cherc, semifineles y fineles
N vënderdi ai 16 de agost iel i cherc de finela dl singuler y la semifineles dl dopl. N sada ai 17 de agost la semifineles dl singuler dala 10:00 inant, dala 15:00 la finela de dopl. La gran finela dl singul ie n dumënia dala 11.00. Dutes y duc ie sambën nviei de cuer a unì y a fé l tifo. Na nuvità ie che chiche vënc giapa nce 10 ponc ATP.

Aspet bio
L diretëur Wanker à sotrissà la valuta dl turnoi, ma nce auzà ora l "Green Project Val Gardena": "On na natura y cuntreda scialdi bela che fej da curnisc al turnoi. Nscila ons nce ratà drët de tenì cont dl ambient y dl spirt vërt che l ie cun rejon al didancuei: i auti che mëina ncantëur i atlec va a lectrisc, per l maië ons chëst ann pestech de lën y taieresc biodegradabli."

David Lardschneider

FOTO: Da man ciancia: Erwin Tröbinger y Patric Prinoth.

Galaria retrac