Scuadres ladines se anconta

Data

16 de agost 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N dumënia ai 11 de agost iel stat l prim turnoi ladin sun l ciamp artefiziel nuef de Urtijëi. Per ntant - per gaujes logistiches - mé cun trëi scuadres, tl daunì uelen tré ite sambën duta la Ladinia.

Trianguler
N dumënia passeda dala cinch’ domesdì inant iel stat n bel trianguler cun trëi scuadres ladines. L turnoi ie unì urganisà dal trainadëur dla prima scuadra Marco Maraner deberieda cun l Cunsëi dl FC Gherdëina cun a cë l presidënt Alfred Runggatscher. Dlongia la scuadra patrona de cësa dl FC Gherdëina àl fat pea l ASC Mareo y l ACD Val Badia. Da coche conta Maraner iel stat na ucajion de sport, dantaldut per cialé dla ntegrazion di jugadëures jëuni, ma nce n mesun de se ancunté danter ladins, stajan n cumpania per se baraté ora esperienzes y minonghes.

L FC Gherdëina à venciù
Venciù à l FC Gherdëina. Tlo i resultac dla partides: l ACD Val Badia à batù l ASC Mareo per 10-9 do i undescmetri, do che la partida fova jita ora 2 a 2. Tla proscima partida à l FC Gherdëina batù l ASC Mareo per 3 a 0 y nce l ACD Val Badia per 3 a 0. Nscila ie l Gherdëina prim, la scuadra Val Badia segonda y l Mareo terzo.

I miëur jugadëures
Coche miëur jugadëur iel unì lità Max Schrott dl ACD Val Badia, segondo Christian Jenegger dl FC Gherdëina, terzo Filippo Daverda dl ASC Mareo. L miëur verdiaporta ie stat Lukas Demetz dl FC Gherdëina.

Aurela curta
Do la partides y la premiazion à l presidënt Runggatscher y si staff cujinà na bona pasta y na bona liania, l cunselier y trainadëur di verdiaporta dl FC Gherdëina Max Tiozzo à tizà ite coche DJ. L trainadëur Marco Maraner y l presidënt Alfred Runggatscher tol l’ucajion "de rengrazië mo n iede nce tres La Usc la doi scuadres, chëla marora y chëla badiota, per avëi fat pea cun sportività pra chësc bel di de sport."

David Lardschneider

FOTO: La trëi scuadres ladines che à fat pea pra l turnoi ladin a Urtijëi.

Galaria retrac