Les badiotes é campionësses provinziales

Data

02 de setember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La fasa finala dl campionat a scuadres s’á ruvé cun la devënta dles sogadësses y n terz post por sogadus dl’ASV TC Ladinia
Al campionat a scuadres jü a piz chisc dis á tut pert deplü atlec dl’uniun dal tennis dl’Alta Badia. Indöt é stades cater scuadres scrites ite a chësc campionat. Na scuadra feminina y öna masculina tla categoria D4 che chësc ann á tut pert por le pröm iade, y na scuadra masculina y feminina tla categoria D3 che â bele soghé en l’ann passé y â arjunt la promoziun. Da d’aisciöda â les scuadres soghé deplö partides cuntra scuadres de döt Südtirol. Les döes scuadres dla categoria D3 s’â spo cualifiché ala fasa finala, che á metü man a mez agost.
La scuadra masculina á davagné tla fasa finala cuntra i sogadus de döes scuadres dl Balsan (TC Bolzano y TC Comune). Chisc dis ái spo soghé la semifinala cuntra i sogadus dl Rungg. Do partides dër combatüdes y ince cun döt l’impëgn di sogadus ái messü ti la zede ai aversars.
La scuadra feminina indere á davagné la semifinala cuntra les sogadësses dl Marling y spo arjunt la finala che s’á tigní en sabeda ai 31 de agost sön i ciamps de tennis curis da Corvara cuntra les sogadësses dl Maran. Les sogadësses badiotes á davagné i dui singui y le dopl, portan a ciasa insciö le titul provinzial.
Complimënc ales sogadësses che á davagné le titul provinzial: Vinatzer Nadine, Dalle Grave Giorgia, Pezzedi Heliane y Profunser Tanya y ince ai sogadus Dallapiazza Fabio, Kilian, Simone, Renzo, Sartori Manuel y Orrú Filippo por le terz post. Trames les scuadres á arjunt la promoziun tla categoria D2.
N gran giulan ti vá te chësta ocajiun al alenadú Dallapiazza Fabio che acompagnëia döt l’ann i atlec tratan i alenamënc y les partides y ti trasmët la vëia de chësc sport. (Tennisclub Ladinia)

Söi retrac:

Retrat 1:
Da man ciampa: Pezzedi Heliane, Profunser Tanya, Vinatzer Nadine, Dalle Grave Giorgia.

Retrat 2:
Da man ciampa: Dallapiazza Renzo, Simone, Fabio, Orrú Filippo, Sartori Manuel; dancá: Dallapiazza Kilian.