17 outes Marcialonga Running!

Data

05 de setember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La garejèda Moena-Ciavaleis se à dejout al prum de setember. Serèda sù ence la Craft, con Marcialonga Cycling e Skiing
En domenia al prum de setember i é stac 1500 i atlec enscinué a la Marcialonga Coop, ruèda chest an a sia 17^ edizion. L zenter de Moena ge à dat alberch al gran numer de runner che da mesa les 10 dadoman i à ciapà sù e i é ponté via envers l travert de Ciavaleis, 26 chilometres più inant. L prum grop a se mever l’é stat chel di atlec elite e senatores, donca i atlec profescionisć e chi che à tout pèrt a duta canta la edizions de chesta garejèda.

Da piaz de Sotegrava la longia fila de coridores se à coscita slongià per la strèdes de Moena. A ruèr per prum al travert l’é stat Ngigi Kariuki te 1h24’22”, con la corsa resa venta enveze da Jane Wanja Nganga te 01h38'16".

Desche vigni an la Marcialonga Coop ge à dat lèrga ence a la garejèda a stafeta. Te chesta edizion la formula a squadres la é stata endrezèda col zil de la solidarietà: la iscrizions les era defati avertes demò tras na organisazion no-profit anter cheles dezidudes dal Comitat de endrez, con gran atenzion a la regoeta economica destinèda a projec solidai. A venjer chesta classifica i bec de »La Squadra Allegra« coi components Alessio Gottardi, Willi Piller e Alessandro Chiocchetti, enceben che te chesta sort de competizion, duc à podù se sentir venjidores. Na menzion ence per la squadra »Azzurri per la Vita«, olache à coret con na maieta biencia de la LILT (Lega Tumores del Trentin) i trei ex atlec olimpionics Cristian Deville, Chiara Costazza e Cristian Zorzi.

Desche zenza, con la Marcialonga Coop se à serà sù ence la classifiches de la Craft, soma di resultac de la 3 competizions de Marcialonga (Skiing, Cycling e apontin Running). I venjidores l’é stat Lorenzo Busin e Monica Confortola.


Su la Usc nr 35 stampèda ai 6 de setember troède ence i resultac di atlec fascegn!  (Daniele Verra)