7 ponts ladins!

Data

03 de otober 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Bela venta a la pruma te cèsa per i Falcons. Rua ponts da duta trei la ladines. INSNET L DERBY LADIN anter Gherdena e Fascia!
En jebia ai 26 e en sabeda ai 28 de setember l campionat de Alps Hockey League à fat n nef saut inant. L Wipptal Broncos Weihenstephan à confermà i bogn resultac moscé te la pruma endesfides de sajon; la squadra de Vipiteno con la venta per 10 a 2 ai dans del VEU Feldkirch la se à tegnù la pruma posizion en classifica, dant del Renon al secondo post en classifica batù dal HK SZ Olimpija Ljubljana, che con la venta sui sudtiroleres à arjont l Cortina al terzo post.

La squadra ampezèna à jià chesta setemèna de contra ai Vienna Capitals Silver. L’S.G. Cortina Hafro se à prejentà te la capitèla austriaca con la convinzion de se portèr de retorn te la Tèlia i ponts de la venta e coscita l’é stat: 37 i tiri te gabia per la squadra de Ampez, trei chi che tinùltima se à tramudà ti goi de Lacedelli, Bruneteau e Sanna e che à valù la venta per 1 a 3.

La vitoria te chesta roda de partides la é ruèda ence per l’SHC Fascia Falcons: la squadra se à moscià per la pruma outa dedant a sie publich, su la giacia amica del Scola de Dèlba. La formazion fascèna la é stata chiamèda su la giacia jiador per jiador a la prejenza del president Roberto Ongari e del Conseier provinzièl ladin Luca Guglielmi, che i à volù dir doi paroles dant del prum scigol de scomenz tel stadie de cèsa. Na pruma che ge à dit seguramenter ben ai bienc e bruns, che con na bona prestazion e na partida descombatuta fin a l’ultim menut i se à portà a cèsa la pruma venta sajonèla, ence zenza l fort atacant Lucas Chiodo. I goi che dezedù la partida e sotmetù l’EC 'Die Adler' Stadtwerke Kitzbühel i é stac de Schiavone (2), Mizzi, Castlunger (2) e Iori (2).

Con chesta venta i Falcons arjonc en classifica l Gherdena a quota 4 ponts.

L’HC Gherdëina à cognù ge fèr front a la pesoca trasferta de Lubiana, olache ja VEU Feldkirch e Renon aea cognù zeder la doi partides dant. La squadra ladina la é stata aboncont bona de meter su la giacia una prestazion cinica, desfrutan miec di aversaries la ocajions abudes: demò 28 i tiri te porta, de contra ai 55 di aversaries, ma resultat de 3 a 3 coi goi de Moroder, Nedved e McGowan. Na parità che à dat la garanzia de un pont ai ladins e la possibilità de se jièr ence i shootout, che purampò ge à grignà ai aversaries.

De gra a chisc resultac dassen positives, la classifica de duta trei la ladines se scurta, con Fascia e Gherdena che slongia su la ultimes squadres en classifca, Vienna Capitals Silver a 3 ponts e EC Bregenzerwald e Steel Wings Linz a 0 ponts.

La proscima endesfides les jirà en scena anché, en jebia ai 3 de otober, col Cortina en trasferta de contra al EC Kac II e l derby Ladin anter Gherdena e Fascia al Pranives de Selva.


Su la Usc nr 39 stampèda ai 4 de otober troède i resultat di Falcons te la categorìes mendres!  (Daniele Verra)