La Usc di Ladins

Prum suzess en Copa Europa per Federico Liberatore. Tel slalom a Vaujany te la Franzia ai 6 de jené l joen fascian, 24 egn, de gra al temp de 1’44”5 l’é stat bon de ruèr sul sciaier più aut del podie passan via l norvegeis Lie Atle McGrath e l todesch Julian Rauchfuss. 

Dò aer ressolt i problemes a la schena che i l’aea condizionà te la pruma doi garejèdes de Copa del Mond, l fascian se à desćiadenà se logan dant 8° te la garejèda de en domenia ai 5 de jené e dò l’é stat bon de se enventèr na seconda manche da marevea olache l’à despassà via duc.

Terzo a metà garejèda tedò McGrath e Rauchfuss, Liberatore à fat la desferenza se vadagnan l suzess con 21 centeisemes sul norvegeis e 23 sul todesch. 

Per l joen da Mazin l’é n resultat de gran valuta, l mior en cariera te Copa Europa conscidran che inant da anché l’era stat bon de ruèr ite anter i prumes trei te chesta competizion demò te Fascia del 2017 (te chela ocajion l’era ruà secondo semper te n slalom).

L’é stat na giornèda n muie positiva ence per l badiot Tobias Kastlunger che l’é ruà sesto palesan miorament e crescimonia respet al slalom de en domenia olache l’era ruà setim. Te la medema competizion l’auter badiot Hannes Zingerle l’é ruà al 9° post.