La Usc di Ladins

En sabeda ai 4 e en domenia ai 5 de jené l’é stat a Piani di Liuzza te la provinzia de Udin i campionac taliegn joegn de biathlon. En sabeda i atlec se à confrontà te la gara sprint e en domenia te chela a engorsa. Te la gara sprint no l’é stat na neva l podie del primierot de le Fiamme Gialle Tommaso Giacomel te la Under 22, enveze l’é stat na sorpresa l bron de Elia Zeni da Tieser che cor te la Under 19, n atlet de la Cauriol che l’é dò che l se met al luster, ruà tedò al furlan Fabio Piller Cottrer e a Stefano Canavese de l’Eserzit che se à vadagnà l prum post. 

L biathlon l’é na disciplina che é dò a ciapèr semper più pe ence anter i atlec del Ski College de Fascia che fèsc de bie resultac te chesta garejèdes che conjobia paslonch e trata al tulac. 

Te la Under 19 defat l’é da uzèr fora l resultat de Samuele Lorenzoni del Ski College de Fascia che se à classificà 23° e l 20° post de Gabriel Casagrande te la Under 17.

Anter la eles enveze l’é l bel 6° post de Fabiana Carpella, l 30° de Elisa Lorenzoni e l 35° de Beatrice Chiocchetti.

En domenia te la gara a engorsa l’é ruà l beliscim arjent de l’atleta Fabiana Carpella de la Under 17 che auza fora amò de più l’inom del Ski College de Fascia. Pruma l’é l’atleta furlana Sara Scattolo con n vantac de 53 seconc, enceben che Fabiana sie stata miora al tulac. Anter si compagnes de la scola de Fascia l’é dapò l 27° post de Elisa Lorenzoni e l 33° de Beatrice Chiocchetti.

Anter ic meton al luster l 22° post de Samuele Lorenzoni e l 24° de Gabriel Casagrande.

L podie de la Under 19 é stat vent chest’outa da Elia Zeni che l’é stat bon de fèr demò doi fai al tulac e coscita chest’outa l’à passà via Stefano Canavese per 47 seconc.


 (mci)