La Usc di Ladins

Alex Vinatzer de Sëlva vën ju tla segonda manche dl slalom de Schladming, do la sesta posizion tla prima manche. L fej na bona garejeda. Canche l ruva japé lùnel su l prim post, cun 56 centejims danora. Granda la cuntëntëza dl atleta jëunn de Sëlva.

Ma: colp de scena!

Na persona nia miec identificheda, na sort de UFO, furnida o miec mesa desnuda cun na sort de tanga dala fiertles, ova passà l travert mpue’ dan ël, fajan fermé l tëmp.

Do la ilujion la realtà.

Alex Vinatzer fova nscila, per ntant, de 13 centejims dovia, te terza posizion, do Maurberger segondo, che à fat na gran manche.

Ma ala fin dla finedes ie Alex Vinatzer sesto y Maurberger cuinto.

Gran prestazions di doi jëuni dla scuadra azzurra.

Prim ie Henrik Kristoffersen, segondo Alexis Pinturault a 34 centejims, terzo Daniel Yule a 83 centejims. Cuarto pona Clément Noël, che à fat n gran recuper dala 30ejima posizion, 99 centejims dovia, cuinto Simon Maurberger a 1,07 secunc, y sesto Alex Vinatzer de Sëlva, destacà de 1,12 secunc. Danz che l auter ladin, Stefano Gross, 10.ejim do la prima manche, ie tumà ora propi sun l ërt.

Emuzions ne àl mancià, a Schladming.

Ma a la dì duta: chi ne dij pa nia che zënza la nvajion ëssa Alex pudù fé n miëur tëmp?

La cuestion resta dessegur davierta, almanco dal pont de ududa dl sport, ajache na tel persona UFO possa nce te dsaré ite, sce la cumparësc ora de nia dan té, ma pona resta la situazion nce davierta dal pont de ududa dl regulamënt y nce de chël legal, sce n uel.

Tlo iel danz mo da ti cialé plu avisa, a dut cant!

David Lardschneider  


Sun la foto de archif iel da udëi Alex Vinatzer n azion.