La Usc di Ladins

L resultat del joen atlet clas 2004 Giovanni Fanton l’é stat la ponta più auta de desvaliva autra bela prestazions de joegn atlec fascegn che se à metù al luster te la garejèdes per i joegn leèdes a la maor competizion internazionèla. Segn che l lurier di pascioné de paslonch taca a dèr si fruc ence te Fascia.

Giovanni Fanton l fèsc la 2^ clas del Liceo Scientifich de Fascia e l fèsc pèrt de la sozietà U.S. Monti Pallidi. L’à tacà fin da picol a fèr paslonch, con sie père Cristiano Fanton che amò ades l’é sie arcedador te la squadra agonistica de la Monti che porta inant i atlec fascegn: ensema con Giuseppe Chenetti, ex alenador de la Nazionèla talièna de Copa del Mond, i arcedea n picol grop de joegn, e n bel grop de na ventina de atlec più picoi col didament de Luigino Croce.

Cristiano Fanton l’é ence l responsabol per Fascia de la Marcialonga e da volontadif l se cruzia de coordenèr la logistica e i desvalives setores rencuré da la preziousa machina del volontariat.

Giovanni donca l’à semper arfià la pascion per l paslonch te cèsa, l’à fat sia pruma Marcialonga de 6 egn, se sà ben la Mini che vegn fata la sabeda, e dapò ogne an, fin a ruèr chest an per la pruma outa a la venta, n resultat emportant ajache l premia i sacrifizies e l dèsc gaissa per jir inant con empegn.

Te la Marcialonga di joegn troon ence l bel secondo post de Alessandro Chiocchetti Pelin da Moena (Fiamme Gialle) anter i Giovani, e anter i Allievi, apede a la venta de Giovanni Fanton, aon 4 atlec del Ski College de Fascia ti prumes 15: Christian Leso (4°), Stefano Mazzel (5°), Gloria Gabrielli (9^ de eles) e Damiano Rasom (15°). Amò da segnalèr anter le Ragazze l’11° post de Ilenia Gabrielli. Complimenc a duc chisc joegn!  (lg)