La Usc di Ladins

En domenia ai 2 de firé a Rivoli Veronese se à dejout la 8^ XC Winter La Mesa Easy, garejèda con la roda, spezialità Cross Country, endrezèda da Asd Giomas e che la valea desche pruma proa del Zircuit de trei garejèdes “MTB Cross Country – Garda Veronese XCO”.
Ence na cobia de atlec de Fascia se à pissà de partezipèr a chesta garejèda che à tinultima avert la sajon de roda, per se sciudèr ite la giames e se enjignèr a l'istà che pian pian taca a se lascèr veder ti pensieres e te la preparazion di ziclisć.
L fascian Gabriele Depaul à tout pèrt a chesta proa coi colores del Team SpaceBikes, squadra che oramai jà da vèlch an conta sul clasc '88 de Dèlba. Con l temp de 1 ora e 13 menuc spaché, Depual se à vadagnà la medaa de bron, al terzo post tedò a Daniele Ratto del 2r Bike Store, prum te 1h11'39”, e a Michele Righetti del Team Bertasi, arjent col temp de 1h12'00”.
A tor pèrt a la garejèda veneta ence Valerio Bacchiocchi del Fascia Bike Racing Team. Ence l'atlet roman se à prejentà al start col met de troèr la mior forma e a la fin l'à serà sù sia proa col temp de 1h32'24”. L resultat arjont enceben l'infortunie per aer falà la strèda slongian la fadìa, l ge à consentì a l'atlet de la sociazion sportiva fascèna de se vadagnèr la 5^ piaza te la categorìa Senior2.  (Daniele Verra)