La Usc di Ladins

Chësta fin dl’edema él a Umhausen tl’Austria le gran final dla Copa dl Monn de Liösa sön pista naturala. Tla categoria dl dopl sará i davagnadus bonamënter indó Patrick Pigneter y Florian Clara, che s’arjigna insciö da brancé do süa 11. Copa dl Monn. I dui pluricampiuns ess bele podü stlü le sach tl ultim fin dl’edema a Laas, mo iló él sté i rusci Pavel Porshnev y Ivan Lazarev che é saltá söl scalin plü alt y á porchël söl papier ciamó na minima chance matematica. A Umhausen se presentëia Pigneter y Clara sciöche "leaders" dla classifica cun 570 punc, che é avisa 85 deplü co i rusci. Terzi tla classifica é i atri südtirolesc Patrick y Matthias Lambacher, che á cun 440 punc ciamó la poscibilité matematica da se porté al secundo post.  (pablo)