La Usc di Ladins

Desche duc, ence i atlec del bal sui feres i à cognù serèr sù sia sajon a cauja del Coronavirus. Endèna chest stop aon volù rejonèr con la arcedadora de la squadra agonistica su la giacia Adele Battisti, che dessema a dut l staff di Pavei d'arjent la ge stèsc apede ai joegn talenc.

Co ela pa jita la sajon agonistica 2019-2020 per l'Artistico Ghiaccio de Fascia?

Adele Battisti: En general la sajon la se à serà sù con resultac che ne fèsc ben sperèr per l davegnir. Enceben che fossa stat amò vèlch garejèda da fèr duc nesc atlec à arjont i ponts per passèr te na categorìa più auta o te na fascia de merit maora. Son dassen contenta e é de bona speranzes per la sajon che vegn.

Él vèlch atlet en particolèr che à arjont traverc de nonzech?

Matteo Marchioni l'à portà a cèsa na copa te vigni garejèda che l'à fat, con n muion de prumes posć. Ence la sor, Martina, con cater medaes la se à fat valer te na categorìa senestra, fajan ben ence a livel internazionèl: la se à coscita vadagnà l'azess te la categorìa Junior Elite, la maora per sia età. À enveze portà a cèsa doi secondi posć Giovanni Pezzei, dapodò conton n podie per Selene Dantone, Elisa Planchensteiner, Ginevra Seneca, Sophia Sommavilla e Emily Fosco.

Co éla pa stata col stop de la sajon a cauja del coronavirus?

La sajon la se à serà sù fora de n bel nia. No à podù se dejoujer la ultima proes de calificazion e la finèles di campionac: n gran pecià ajache assane podù tor pèrt con n gran numer de atlec per se vadagnèr vèlch bon resultat. Apede chest, l'é sutà ence la garejèdes intersozièles di neves picoi atlec.

Dò de chesta interuzion forzèda, co ve aede pa endrezàé per tegnir en forma vosc atlec?

Sion cec da zirca n meis su la giacia, ma volon pontèr via endò con la miora forma fisica. Per chest aon endrezà na lingia de video-lezions: no l'é seguramenter valif che se arcedèr su la giacia, ma de gra a chesta ativitèdes se pel mentegnir l moviment tecnich. Chest l fajon trei ores en setemèna, dapodò ogne atlet à sia scheda con n program da poder fèr a cèsa a livel individuèl.


Podede lejer duta l'intervista su La Usc stampèda de vender ai 10 de oril 2020.  (Daniele Verra)