Plan de Corones ciafa indó la Copa dl Monn

Data

20 de mei 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La gara de schi dles ëres söla "Ërta" portada ite por i proscims trëi agn. Tl calënder sambëgn ince les classiches di ëi te Gherdëna y tl’Alta Badia, y i campionac de Cortina l’ater ann de forá


Do n ann de palsa, ciafa Al Plan de Mareo con Plan de Corones indó la gara de copa dl monn de schi dles ëres, che gnará tignida sön la "Ërta" ai 26 de jená dl 2021. Chësc é ci che an vëiga dal calënder FIS publiché sön la plata ofiziala. Iló él ince la proieziun por les sajuns 2021/22 y 2022/23, olache le gigant feminil vëgn ince dant, mo les dates é ciamó da odëi. Bonamënter tres de jená.
Por ci che reverda la sajun che á da gní, él sambëgn ince cotan d’atres gares tla Ladinia, in primis i campionac dl monn de schi a Cortina d’Ampëz, dai 8 ai 21 de forá 2021. Tla copa dl monn di ëi ne manciará sambëgn nia les classiches de Gherdëna ai 18 y 19 de dezëmber 2020 y chëres dl’Alta Badia atira dedó ai 20 y 21 de dezëmber.
Co che chëstes gares gnará spo desfirades, chël é n ater pér de cialzá, deache le Covid–19 é na ambria che ascüra ciamó cotan le dagní, y che mët ince i comités d’organisaziun dan da desfides daldöt nöies.  (pablo)