Palé: Le Mareo vá te pröma categoria

Data

17 de jugn 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La dezijiun a Roma é tomada. Le ASC Mareo davagna le campionat 2019/20 de secunda categoria y pó fá le salt tla pröma
En mertesc él sté a Roma na sentada dla comisciun, che â da tó ince na dezijiun sön le dagní dla secunda categoria amatoriala dl palé, grup C. Por via dl "coronavirus" n’án nia podü soghé le rode de retüda, porchël êl gnü fat fora che la promoziun i jô ales scuadres che ê prömes do le pröm rode. Tla 2a grup C êl indere na costelaziun particolara: campiuns d’altonn é le Valdaora y la Val Badia, che á intrames 19 punc. Al terzo post él le Mareo, che á 18 punc, mo na partida demanco. La ultima partida dl Mareo cuntra le San Laurënz n’â nia podü gní rovada y é gnüda architada al 57° por gauja dla plöia, cun le Mareo en vantaje por 1 a 0. I ultims menüc n’án gnanca plü podü sciafié da recuperé te n secundo momënt.
Öna na poscibilité foss stada chëra da i lascé avarëi al Mareo la devënta, che l’ess porté al pröm post cun 22 punc. Na secunda varianta ê da nia la lascé avarëi y cerne a val’ moda na davagnadëssa danter i valdaores y la Val Badia.

Mesaria di punc a partida
La comisciun a Roma á indere tut na terza soluziun: al é gnü fat la mesaria di punc danter les partides che an á soghé. Valdaora y la Val Badia á insciö arjunt na mesaria de 1,73 punc a partida, le Mareo é rové sön la mesaria de 1,8 punc. Chësc á insciö orü dí che le Mareo é campiun d’invern, mo ince davagnadú dl campionat 2019/2020. Insciö él garaté chësta promoziun a sorpresa, che porta le Mareo por le secundo iade tla storia a soghé tla pröma categoria. Complimënc ai sogadus y döt le bun por l’aventöra nöia.  (pablo)