Tel team de skicross de la Federazion Talièna di Sport da d'Invern l’é ence 6 joegn atlec trentins. Chest l resultat de n projet spezialisà per chesta disciplina acrobatica scomenzà via acà 3 egn e che à dat de bogn resultac.
Te chest team del Comitat trentin l'é ence doi fascegn: Nathalie Bernard e Jannes Debertol, chest ultim stat ence convocà de jené passà a la olimpiades di joegn de Losanna te la Svizra, ventes enlouta per la disciplina del skicross dal svedeis Erik Wahlberg (classificà dant da Artem Bazhin e Andrei Gorbachev) e da la svizra Marie Karoline Krista (ruèda dant de Fiana Choleska e Vladislava Baliukina). »L’é stat bel, na bela esperienza – ne à dit Debrtol – ma me endespièsc percheche no son stat bon de fèr dut chel che aesse podù. Aboncont falèr fèsc pèrt del jech e serf per miorèr«.
L'obietif de tor pèrt a la olimpiades se met dant de an en an per i atlec e ades chest travert somea possibol per duc i 6 components de la squadra trentina, squadra agonistica formèda da 4 bezes e 2 bec. Dessema a Andrea Chesi (2003), Giorgia Graifember (2003), Rebecca Paoli (2003) e Samuele Cheller (2002), sarà descheche aon dit ence i doi fascegn Jannes Debertol (2002) e Nathalie Bernard (2003). Seguramenter n orgolie per la val e per l Ski Team Fascia.
De più su La Usc 29 de angern, vender ai 24 de messèl (Daniele Verra)
Ensomech? La olimpiades travert possibol!
Data
25 de messel 2020
Grandeza scritura
Social
Ence 2 fascegn anter i 6 atlec trentins che fèsc pèrt del team de skicross de la Fisi, en vista la olimpiades di joegn
